ខេត្តកណ្តាល ៖ ជនសង្ស័យ០២នាក់ បានឆក់ទូរសព្ទដៃប្រជាពលរដ្ឋ នៅម្ដុំផ្សារថ្នល់ទទឹង បានសម្រេច ហើយជិះរត់គេចខ្លួន បើកម៉ូតូតាមផ្លូវបេតុង ត្រូវសមត្ថកិច្ចតាមទាន់ពីក្រោយ ឃាត់ខ្លួនបានម្នាក់…
ខេត្តកណ្តាល ៖ ជនសង្ស័យ០២នាក់ បានឆក់ទូរសព្ទដៃប្រជាពលរដ្ឋ នៅម្ដុំផ្សារថ្នល់ទទឹង បានសម្រេច ហើយជិះរត់គេចខ្លួន បើកម៉ូតូតាមផ្លូវបេតុង ត្រូវសមត្ថកិច្ចតាមទាន់ពីក្រោយ ឃាត់ខ្លួនបានម្នាក់ ចំណែកម្នាក់ទៀត រត់ទ្បើងលើផ្លូវល្បឿនលឿន ដកកាំភ្លើងភ្ជង់ប្លន់ រថយន្តប្រជាពលរដ្ឋ បន្តរត់គេចខ្លួនបាត់ ខណៈដែលសមត្ថកិច្ចម្នាក់ រងរបួសបាក់ជើង ដោយសារជនល្មើសបើករថយន្តបំបុក ។
ហេតុការណ៍នេះ បានកើតទ្បើងនៅវេលាម៉ោង១០និង៣០នាទីព្រឹកថ្ងៃទី២៩ ខែមីនា ឆ្នាំ២០២៥ ស្ថិតនៅក្នុងស្រុកអង្គស្នួល ខេត្តកណ្ដាល ។
ភ្លាមៗបន្ទាប់ពីទទួលបានព័ត៌មាននេះ កម្លាំងនគរបាល នៃស្នងការដ្ឋាននគរបាលខេត្តកណ្តាល ដឹកនាំបញ្ជារដោយលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល សហការជាមួយកម្លាំងនគរបាល នៃស្នងការដ្ឋាននគរបាលរាជធានីភ្នំពេញ បានដាក់កម្លាំងធ្វើការចេញស្ទាក់ រហូតឈានដល់ការបង្ក្រាបបានភ្លាមៗ ដោយចាប់ជនសង្ស័យម្នាក់ ដកហូតរថយន្តរបស់ជនរងគ្រោះមកវិញ ខណៈជនសង្ស័យម្នាក់ទៀត ដែលជាបក្ខពួក និងជាអ្នក ដែលមានកាំភ្លើងនៅក្នុងដៃនោះ កំពុងគេចខ្លួន ។
លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាក់ថា ចំពោះករណីខាងលើនេះ ជាករណីឆក់ទូរសព្ទដៃ ដោយមានមុខសញ្ញា ចំនួន០២នាក់ ជិះម៉ូតូ០២គ្រឿង ធ្វើសកម្មភាពឆក់ទូរសព្ទ ទៅលើជនរងគ្រោះកំពុងជិះម៉ូតូ នៅចំណុចផ្លូវជាតិលេខ៤ ភ្លាមៗនោះ កម្លាំងសមត្ថកិច្ចបានធ្វើការឃាត់ខ្លួនជនសង្ស័យម្នាក់ និងជនសង្ស័យម្នាក់ទៀតរត់គេចខ្លួន។ ក្នុងពេលកិច្ចប្រតិបត្តិការដែលសមត្ថកិច្ច ដេញតាមជនសង្ស័យរត់គេចខ្លួននេះ ជនសង្ស័យបានផ្ទុះអាវុធមកលើកម្លាំងសមត្ថកិច្ចយើង ហើយកម្លាំងសមត្ថកិច្ចបានស្ទាក់ និងបានដេញមុខសញ្ញានេះត្រឡប់មកខាងផ្លូវជាតិលេខ៥១វិញ ក៏ទៅបុកសមត្ថកិច្ចម្នាក់ បាក់ជើងរងរបួសធ្ងន់ ចំណែកម្នាក់ទៀតរបួសស្រាល ។ ពេលនោះ សមត្ថកិច្ចបានឃាត់ខ្លួនជនសង្ស័យបានម្នាក់ ចំណែកជនសង្ស័យម្នាក់ទៀតរត់គេចខ្លួនទៅផ្លូវល្បឿនលឿន និងបានភ្ជង់ជនរងគ្រោះក្នុងរថយន្ត ដូចក្នុងរូបភាពនោះជិះគេចខ្លួន ។
ស្នងការដ្ឋាននគរបាលខេត្តកណ្តាល បានបញ្ជាក់ទៀតថា ករណីនេះ មិនមែនជាករណី ប្លន់នៅផ្លូវល្បឿនលឿននោះទេ ជាករណីឆក់ទូរសព្ទ ជនរងគ្រោះ ដែលកំពុងជិះម៉ូតូ នៅចំណុចផ្លូវជាតិលេខ៤ ពេលនេះ កម្លាំងជំនាញពាក់ព័ន្ធកំពុងតាមស្វែងរកជនសង្ស័យ ដែលរត់គេចខ្លួន ។
សូមបញ្ជាក់ថា ពេលដែលជនសង្ស័យរត់គេចខ្លួនមកផ្លូវល្បឿនលឿននោះ ក៏បានឃើញរថយន្តជនរងគ្រោះម៉ាកលុចស៊ីស GX470 ពណ៌ស ឈប់នៅលើផ្លូវ ល្បឿនលឿនម្តុំអូរក្រាំងអំបិល ស្រាប់តែ ជនសង្ស័យភ្ជង់ជនរងគ្រោះ រួចបើករថយន្តជនរងគ្រោះគេចខ្លួនតែម្តង រហូតត្រូវបានកម្លាំងនគរបាលខេត្តកណ្តាល សហការជាមួយកម្លាំងនគរបាលរាជធានីភ្នំពេញ ដេញតាម និងចេញពួនស្ទាក់ ដើម្បីចាប់ជនសង្ស័យរូបនេះ ហើយបន្ទាប់ពីដឹងថា សមត្ថកិច្ចកំពុងតាមជនសង្ស័យក៏បើករថយន្តយកទៅប្លង់ចោលនៅក្នុងភូមិសាស្ត្រ ស្រុកអង្គស្នួល ខេត្តកណ្តាល ហើយបានទៅភ្ជង់អ្នកបើករថយន្តលុចស៊ីស ពណ៌ខ្មៅ មួយគ្រឿងទៀត ដោយបង្ខំឲ្យជនរងគ្រោះបើកជូន ដើម្បីគេចខ្លួនពីសមត្ថកិច្ច រហូតបើកចូលក្នុងភូមិសាស្ត្រខណ្ឌកំបូល ក៏ត្រូវកម្លាំងនគរបាលមូលដ្ឋានរាជធានីភ្នំពេញស្ទាក់ រួចជនសង្ស័យក៏ចុះពីរថយន្តរត់គេចខ្លួនតែម្តង ពេលនេះ សមត្ថកិច្ចកំពុងសហការគ្នាតាមចាប់ជនសង្ស័យខាងលើ ៕
ចែករំលែកព័តមាននេះ