អន្តរជាតិ ៖ តម្លៃមាសអន្តរជាតិបំបែកកំណត់ត្រាខ្ពស់បំផុតចំនួន ៣,០៧៧ដុល្លារក្នុង១អោន ឬស្មើប្រមាណ ៣,៧១០ដុល្លារក្នុង១តម្លឹង គិតត្រឹមម៉ោង១០ព្រឹកថ្ងៃទី២៨ ខែមីនា ឆ្នាំ២០២៥ ស្របពេលដែលភាគហ៊ុននៅអាស៊ីបានធ្លាក់ចុះយ៉ាងខ្លាំង…
អន្តរជាតិ ៖ តម្លៃមាសអន្តរជាតិបំបែកកំណត់ត្រាខ្ពស់បំផុតចំនួន ៣,០៧៧ដុល្លារក្នុង១អោន ឬស្មើប្រមាណ ៣,៧១០ដុល្លារក្នុង១តម្លឹង គិតត្រឹមម៉ោង១០ព្រឹកថ្ងៃទី២៨ ខែមីនា ឆ្នាំ២០២៥ ស្របពេលដែលភាគហ៊ុននៅអាស៊ីបានធ្លាក់ចុះយ៉ាងខ្លាំង ក្រោយការប្រកាសពន្ធចុងក្រោយរបស់ប្រធានាធិបតីអាមេរិក លោក ដូណាល់ ត្រាំ (Donald Trump) បានធ្វើឱ្យបណ្តាអ្នកវិនិយោគព្រួយបារម្ភកាន់តែខ្លាំងឡើងពីសង្គ្រាមពាណិជ្ជកម្មពិភពលោក។ នេះបើតាមប្រភពពីទីភ្នាក់ងារសារព័ត៌មាន Reuters ចេញផ្សាយមុននេះបន្តិច។
លោក ត្រាំ បានប្រកាសដាក់ពន្ធ ២៥% លើការនាំចូលរថយន្ត និងគ្រឿងបន្លាស់រថយន្តទាំងអស់មកកាន់សហរដ្ឋអាមេរិក ដោយចាប់ផ្តើមនៅសប្តាហ៍ក្រោយ ពោលនៅថ្ងៃទី២ ខែមេសា ឆ្នាំ២០២៥ ដោយទាញការរិះគន់យ៉ាងខ្លាំងក្លាពីសំណាក់បណ្តាអ្នកនយោបាយ និងនាយកប្រតិបត្តិឧស្សាហកម្មនៅទូទាំងពិភពលោក ព្រមទាំងការព្រមានពីបណ្តាក្រុមហ៊ុនផលិតរថយន្តពិភពលោកថា ការដំឡើងតម្លៃលក់រថយន្តទំនងជាចាប់ផ្តើមហើយ។
ការរីករាលដាលខ្លាំងនៃសង្គ្រាមពាណិជ្ជកម្មពិភពលោកដែលលោក ត្រាំ បានចាប់ផ្តើមនៅពេលលោកចូលកាន់តំណែងឡើងវិញ បានធ្វើឱ្យទីផ្សារពិភពលោកមានភាពរង្គោះរង្គើដោយភាគហ៊ុនរបស់ក្រុមហ៊ុនផលិតរថយន្តពិភពលោកបានរងផលប៉ះពាល់យ៉ាងខ្លាំងជាពិសេស។
នៅអាស៊ី ភាគហ៊ុន Nikkei របស់ប្រទេសជប៉ុនបានធ្លាក់ចុះជាង ២% ដែលដឹកនាំដោយការធ្លាក់ចុះយ៉ាងខ្លាំងក្នុងក្រុមហ៊ុន Toyota និង Honda។ ចំណែកសន្ទស្សន៍ភាគហ៊ុនគោលរបស់កូរ៉េខាងត្បូង (KS11) បានឈានដល់កម្រិតទាបរយៈពេលពីរសប្តាហ៍ ហើយបានធ្លាក់ចុះ ១.៣% ខណៈដែលឧស្សាហកម្មរថយន្តគឺជាសសរស្តម្ភនៃសេដ្ឋកិច្ចរបស់ប្រទេសទាំងពីរនេះ។
ដោយឡែក សន្ទស្សន៍ភាគហ៊ុន Hang Seng របស់ហុងកុង (HSI) គឺខ្ពស់ជាង ០.៦% ស្របពេលលោក ត្រាំ បានប្រកាសកាលថ្ងៃពុធថា លោកនឹងមានឆន្ទៈកាត់បន្ថយអត្រាពន្ធលើប្រទេសចិនតិចតួច ប្រសិនបើក្រុមហ៊ុនបច្ចេកវិទ្យាខ្នាតយក្សចិន ByteDance ដែលជាក្រុមហ៊ុនមេរបស់ក្រុមហ៊ុន TikTok យល់ព្រមលក់ប្រតិបត្តិការបណ្តាញសង្គមដ៏ពេញនិយមមួយនេះមកឱ្យសហរដ្ឋអាមេរិក។
លោក Fred Neumann ប្រធានសេដ្ឋវិទូប្រចាំតំបន់អាស៊ីនៅក្រុមហ៊ុន HSBC បានថ្លែងថា «ពន្ធរបស់សហរដ្ឋអាមេរិកលើការនាំចូលរថយន្តមិនមែនជាការភ្ញាក់ផ្អើលដ៏ធំនោះទេ ដោយក្នុងកម្រិតខ្លះ ក្រុមហ៊ុនផលិតអាចផ្លាស់ប្តូរខ្សែសង្វាក់ផ្គត់ផ្គង់ និងទីតាំងផលិតកម្ម ដើម្បីកាត់បន្ថយផលប៉ះពាល់ទាំងនេះ។ ជាមួយគ្នានេះ ពួកគេក៏អាចនឹងដំឡើងតម្លៃមួយចំនួនដល់អ្នកប្រើប្រាស់នៅអាមេរិកផងដែរ ដោយសារតែពន្ធរបស់លោក ត្រាំ ប៉ះពាល់ដល់ក្រុមហ៊ុនផលិតស្ទើរតែទាំងអស់»។
ក្រុមហ៊ុនផលិតរថយន្តមួយចំនួន រួមទាំង Volvo, Audi របស់ក្រុមហ៊ុន Volkswagen, Mercedes-Benz និង Hyundai សុទ្ធតែបានប្រកាសរួចហើយថា ពួកគេនឹងផ្លាស់ប្តូរផ្នែកផលិតកម្មរបស់ពួកគេ។ ចំណែកឯក្រុមហ៊ុន Ferrari ដែលផលិតរថយន្តទាំងអស់របស់ខ្លួនក្នុងប្រទេសអ៊ីតាលីក៏បានអះអាងថា ខ្លួននឹងដំឡើងថ្លៃរហូតដល់ ១០% លើម៉ូដែលមួយចំនួន៕ ប្រភព ៖ Reuters
ចែករំលែកព័តមាននេះ