ទីក្រុងហូជីមិញ៖ សេដ្ឋីអចលនទ្រព្យវៀតណាម លោកស្រីជឿងមីឡាន ត្រូវតុលាការសាលាដំបូងនៃទីក្រុងហូជីមិញរកឃើញថាមានពិរុទ្ធភាពពីរធំៗនៅក្នុងសំណុំរឿងដាច់ដោយឡែកធំៗចំនួន២ករណី។ ទី១-លោកស្រីត្រូវសាលាដំបូងកាត់ទោសប្រហារជីវិតពីបទឆបោកប្រាក់២៧ពាន់លានដុល្លារ និងទី២-លោកស្រីត្រូវសាលាដំបូងដដែលកាត់ទោសឱ្យជាប់ពន្ធនាគារ១ជីវិតពាក់ព័ន្ធនឹងបទចោទប្រកាន់ធំៗចំនួនបីដែលធ្វើឱ្យបាត់បង់ប្រាក់១៧ពាន់លានដុល្លារ។
សំណុំរឿងប្រហារជីវិតនេះត្រូវលោកស្រីជឿងមីឡានប្ដឹងទាស់ទៅសាលាឧទ្ធរណ៍ដើម្បីបន្ធូរបន្ថយទោសនេះ។ ប៉ុន្តែកាលពីបីខែមុន សាលាឧទ្ធរណ៍តម្កល់ទុកការសម្រេចរបស់សាលាដំបូងទុកជាបានការដដែល (មានន័យថានៅតែប្រហារជីវិត)។ ក្រោយពេលបរាជ័យនោះរួចមក លោកស្រីជឿងមីឡានសម្រេចដាក់ពាក្យប្ដឹងមួយទៀតនៅថ្ងៃនេះដើម្បីប្ដឹងទៅសាលាឧទ្ធរណ៍ពាក់ព័ន្ធនឹងការកាត់ទោសឱ្យជាប់ពន្ធនាគារ១ជីវិតវិញម្ដង។
គេរំពឹងថានៅថ្ងៃទី២១ ខែមេសានឹងដឹងលទ្ធផល។ ប្រភពខ្លះថាលោកស្រីជឿងមីឡានត្រៀមមេធាវី៨នាក់ដើម្បីតតាំងក្ដីនៅសាលាឧទ្ធរណ៍ពាក់ព័ន្ធនឹងការកាត់ទោសឱ្យជាប់ពន្ធនាគារ១ជីវិត។ សូមរំលឹកថាកាលពីខែមេសា ឆ្នាំ២០២៤តុលាការរកឃើញថាលោកស្រីជឿងមីឡានបានលួចលុយធនាគារពាណិជ្ជសៃហ្កន (SCB) ដោយបង្កើតក្រុមហ៊ុនខ្យល់រាប់ពាន់ក្រុមហ៊ុន រួចហើយឱ្យក្រុមហ៊ុនខ្មោចទាំងនោះគិតតែពីខ្ចីលុយធនាគាររហូតដល់អស់លុយពីធនាគារ (ក្ស័យធន)។
ចំពោះការស្នើសុំបន្ធូរបន្ថយទោសប្រហារជីវិតនោះ សាលាឧទ្ធរណ៍ពិនិត្យឃើញថាលោកស្រីជឿងមីឡានគ្មានទឡ្ហីករណ៍ (ឬសម្អាងហេតុ) គ្រប់គ្រាន់ដើម្បីដោះបន្ទុក និងបន្ធូរបន្ថយទោសនេះបានឡើយ។ តុលាការនិយាយមួយម៉ាត់ដោយខ្លីថាបើចង់រួចផុតពីទោសប្រហារជីវិតលុះត្រាតែលោកស្រីជឿងមីឡានអាចតម្កល់ប្រាក់យ៉ាងហោចណាស់៣/៤ ឬ៧៥%នៃបំណុលដែលបានបាត់បង់ក្រោមស្នាដៃរបស់លោកស្រី។
នៅថ្ងៃអង្គារនេះ លោកស្រីជឿងមីឡានមើលទៅហាក់ដូចជាលែងភ័យភិតចំពោះការបង្ហាញខ្លួននៅក្នុងតុលាការតទៅទៀតហើយ។ លោកស្រីនិយាយសំណេះសំណាលគ្នាលេងជាមួយអនុរក្សពន្ធនាគារ និងមានអារម្មណ៍ធម្មតា។ ក្មួយស្រីរបស់លោកស្រីជឿងមីឡានត្រូវតុលាការកាត់ទោសឱ្យជាប់ពន្ធនាគារ៥ឆ្នាំកាលពីខែតុលាពីបទកាន់កាប់ទ្រព្យសម្បត្តិពីអំពើឆបោក។ ថ្ងៃនេះ គេឃើញក្មួយស្រីរូបនេះក៏អង្គុយក្បែរម្ដាយមីងរបស់ខ្លួនផងដែរ។
នេះជាលើកដំបូងដែលលោកស្រីជឿងមីឡានបង្ហាញខ្លួននៅក្នុងសវនាការដោយគ្មានវត្តមានរបស់ស្វាមីលោកស្រីគឺលោកឈូណាប់គី (Chu Nap Kee)។ កាលពីខែតុលា ឆ្នាំ២០២៤ ស្វាមីរូបនេះត្រូវតុលាការផ្ដន្ទាទោសឱ្យជាប់ពន្ធនាគារ២ឆ្នាំពីបទសម្អាតប្រាក់។ នៅក្នុងសំណុំរឿងជាប់ពន្ធនាគារ១ជីវិតនោះ លោកស្រីជឿងមីឡានត្រូវតុលាការរកឃើញកំហុសបីករណី។ ១-លាងសម្អាតប្រាក់១៧,៧ពាន់លានដុល្លារ, ២-រត់ពន្ធឆ្លងដែនខុសច្បាប់នូវសាច់ប្រាក់៤,៥ពាន់លានដុល្លារ និង៣-លក់មូលប័ត្របំណុលក្លែងក្លាយ១,២ពាន់លានដុល្លារ។
តុលាការអះអាងថាលោកស្រីជឿងមីឡានជាមេគំនិតធំជាងគេនៅក្នុងរឿងនេះ។ លោកស្រីបានប្រព្រឹត្តអំពើឧក្រិដ្ឋដែលមានការរៀបចំយុទ្ធសាស្ត្រយ៉ាងល្អិតល្អន់ និងស៊ីជម្រៅខ្លាំងណាស់។ មានន័យថាអ្នកល្មមៗមិនអាចដេញជើងគាត់ទាន់ទេ។ គាត់ប្រព្រឹត្តអំពើនេះដដែលៗជាច្រើនដង និងអូសបន្លាយពេលដ៏យូរអង្វែង ជាហេតុធ្វើឱ្យមានផលវិបាកយ៉ាងធ្ងន់ធ្ងរ៕
ចែករំលែកព័តមាននេះ