ខេត្តបាត់ដំបង ៖ ទីតាំងកែច្នៃរថយន្តនិងលួចនាំរថយន្តចូលដោយខុសច្បាប់ ត្រូវបានកម្លាំងអាវុធហត្ថខេត្ត បានសហការជាមួយមន្ត្រីគយ និងមន្ត្រីរដ្ឋបាលព្រៃឈើ ក្រោមការសម្របសម្រួលនីតិវិធី ដោយលោក ទុត វីនីត…
ខេត្តបាត់ដំបង ៖ ទីតាំងកែច្នៃរថយន្តនិងលួចនាំរថយន្តចូលដោយខុសច្បាប់ ត្រូវបានកម្លាំងអាវុធហត្ថខេត្ត បានសហការជាមួយមន្ត្រីគយ និងមន្ត្រីរដ្ឋបាលព្រៃឈើ ក្រោមការសម្របសម្រួលនីតិវិធី ដោយលោក ទុត វីនីត ព្រះរាជអាជ្ញារងអមសាលាដំបូងខេត្ត កាលពីថ្ងៃទី២២ ខែមីនា ឆ្នាំ២០២៥ បានចុះបង្ក្រាបទីតាំងកែច្នៃរថយន្តនេះ ស្ថិតនៅភូមិបឹងអំពិល ឃុំស្តៅ ស្រុករតនមណ្ឌល ខេត្តបាត់ដំបង ។
មេបញ្ជាការរងអាវុធហត្ថខេត្តបាត់ដំបង លោកវរសេនីយ៍ឯក បានថ្លែងកាលពីព្រឹកថ្ងៃទី២៣ ខែ
មីនា ឆ្នាំ២០២៥ថា ក្រោមការបញ្ជារបស់លោកឧត្តមសេនីយ៍ត្រី ហែម វុទ្ធី មេបញ្ជាការអាវុធហត្ថខេត្ត លោកបានដឹកនាំកម្លាំងអាវុធហត្ថចូលរួមជាមួយមន្ត្រីគយ និងមន្ត្រីរដ្ឋបាលព្រៃឈើ បានចុះទៅបង្ក្រាបទីតាំងមួយនេះ ដែលមានម្ចាស់ទីតាំងឈ្មោះ លី យ៉ុងកួយ ភេទប្រុស ជនជាតិចិន អាយុ៥៥ឆ្នាំ និងអ្នកតំណាងទីតាំងឈ្មោះ វ៉ាន់ សុជាតា ភេទស្រី អាយុ៣៣ឆ្នាំ ដែលមានតួនាទីជាគណនេយ្យ ។
លោកវរសេនីយ៍ឯក ជា តារា បានឱ្យដឹងថា ក្រោយការចុះបង្ក្រាប កម្លាំងកងរាជអាវុធហត្ថខេត្តបាត់ដំបង និងមន្ត្រីពាក់ព័ន្ធ បានធ្វើការត្រួតពិនិត្យរកឃើញថាមានរថយន្តខុសច្បាប់ និងធ្វើការឃាត់ទុករួមមាន ៖
១-ក្បាលរថយន្តសណ្តោងរ៉ឺម៉កចង្កូតស្ដាំចំនួន១៤គ្រឿង ។
២-រថយន្តទេសចរណ៍ម៉ាកចម្រុះចង្កូតស្តាំចំនួន១០គ្រឿង ។
៣-រ៉ឺម៉កសណ្តោងមានស៊ីទែនចំនួន២គ្រឿង។
៤-សាមីរ៉ឺម៉កចំនួន៤គ្រឿង ។
សម្រាប់ការដកហូតគឺរថយន្តកែច្នៃទាំងនេះ ត្រូវបានប្រគល់ជូនមន្ត្រីគយចាត់ការតាមនីតិវិធី។
ដោយឡែក ឧបករណ៍សម្រាប់ដាប់លេខតួរថយន្ត១ឈុត ត្រូវបានយកមករក្សាទុកនៅបញ្ជាការដ្ឋានកងរាជអាវុធហត្ថខេត្តបាត់ដំបងដើម្បីអនុវត្តតាមនីតិវិធី ហើយឈើមួយចំនួនដែលរឹបអូសត្រូវបានប្រគល់ឲ្យរដ្ឋបាលព្រៃឈើចាត់ការតាមនីតិវិធីបន្តទៀត ៕
ចែករំលែកព័តមាននេះ