រាជធានីភ្នំពេញ ៖ យុវជនម្នាក់បានរងរបួសធ្ងន់ធ្ងរ និងត្រូវបានក្រុមសង្គ្រោះអង្គភាព៧១១ ដឹកយកទៅសង្គ្រោះបន្ទាន់នៅមន្ទីរពេទ្យព្រះកុសុមៈភ្លាមៗ ខណៈជនរងគ្រោះរូបនេះជិះម៉ូតូ១គ្រឿងក្នុងល្បឿនលឿនជ្រុលទៅបុកជាមួយម៉ូតូសណ្ដោងរ៉ឺម៉កដឹកទឹកសុទ្ធ១គ្រឿងទៀត ដែលកំពុងបើកឆ្លងផ្លូវ ។ ឧប្បត្តិហេតុនេះ បានកើតឡើងកាលពីវេលាម៉ោង៤និង៥០នាទីល្ងាច…
រាជធានីភ្នំពេញ ៖ យុវជនម្នាក់បានរងរបួសធ្ងន់ធ្ងរ និងត្រូវបានក្រុមសង្គ្រោះអង្គភាព៧១១ ដឹកយកទៅសង្គ្រោះបន្ទាន់នៅមន្ទីរពេទ្យព្រះកុសុមៈភ្លាមៗ ខណៈជនរងគ្រោះរូបនេះជិះម៉ូតូ១គ្រឿងក្នុងល្បឿនលឿនជ្រុលទៅបុកជាមួយម៉ូតូសណ្ដោងរ៉ឺម៉កដឹកទឹកសុទ្ធ១គ្រឿងទៀត ដែលកំពុងបើកឆ្លងផ្លូវ ។
ឧប្បត្តិហេតុនេះ បានកើតឡើងកាលពីវេលាម៉ោង៤និង៥០នាទីល្ងាច ថ្ងៃទី២៣ ខែមីនា ឆ្នាំ២០២៥ នៅតាមផ្លូវជាតិលេខ៣ ត្រង់ចំណុចខាងមុខបុរីជា រី ស្ថិតនៅក្នុងភូមិព្រៃព្រីងត្បូង២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
សាក្សីនៅកន្លែងកើតហេតុបាននិយាយថា នៅវេលាម៉ោងខាងលើគាត់បានឃើញយុវជនរងគ្រោះរូបនោះជិះម៉ូតូ១គ្រឿងម៉ាកហុងដា ស្កូបពី(Honda Scoopy)ពណ៌ស ពាក់ស្លាកលេខភ្នំពេញ 1LA-1232 ធ្វើដំណើរក្នុងទិសដៅពីជើងទៅត្បូង ។ ខណៈនោះ បានបើកបរក្នុងល្បឿនលឿនគ្រាន់បើដែរ លុះពេលទៅដល់ត្រង់ចំណុចកើតហេតុ ក៏បានវាក់ជាមួយម៉ូតូសណ្ដោងរ៉ឺម៉កដឹកទឹកសុទ្ធ១គ្រឿង គ្មានស្លាកលេខ ដែលកំពុងបើកឆ្លងផ្លូវជាតិលេខ៣ ក្នុងទិសដៅពីលិចទៅកើត ។
សាក្សីដដែលបាននិយាយទៀតថា ពេលនោះដោយសារតែជិះលឿនទើបគេចចេញក៏មិនទាន់ ហើយជាន់ហ្វ្រាំងឈប់ក៏មិនទាន់ ក៏បានជ្រុលទៅបុកត្បុលចូលក្រោមម៉ូតូសណ្ដោងរ៉ឺម៉កដឹកទឹកសុទ្ធនោះទាំងកម្រោល ។ បណ្ដាលឲ្យយុវជនអ្នកជិះម៉ូតូរូបនេះ រងរបួសធ្ងន់ធ្ងរដួលដេកនៅនឹងកន្លែង ដោយឡែកម៉ូតូ Honda Scoopy របស់គាត់ជាប់ពីក្រោមពោះម៉ូតូសណ្ដោងរ៉ឺម៉កដឹកទឹកសុទ្ធរងការខូចខាតយ៉ាងដំណំ ។
ប្រភពខាងលើបានបញ្ជាក់ប្រាប់ឲ្យដឹងបន្តទៀតថា ក្រោយពេលឃើញបែបនេះ អ្នកដែលនៅជិតនោះបាននាំគ្នាជួយសង្គ្រោះបឋម និងលើកគ្រាយុវជននោះ ដាក់អែបខាង រួចហៅក្រុមសង្គ្រោះអង្គភាព៧១១ ដឹកយកទៅសង្គ្រោះបន្ទាន់នៅមន្ទីរពេទ្យព្រះកុសុមៈ ។
ក្រោយពេលកើតហេតុនគរបាលប៉ុស្តិ៍ចោមចៅទី៣ និងនគរបាលចរាចរណ៍នៃអធិការដ្ឋាននគរបាលខណ្ឌពោធិ៍សែនជ័យ បានចុះទៅសម្រួលចរាចរណ៍មិនឲ្យមិនឲ្យកកស្ទះ ។ បន្ទាប់មកធ្វើការវាស់វែង រួចនាំយកម៉ូតូសណ្ដោងរ៉ឺម៉កដឹកទឹកសុទ្ធខាងលើរួមទាំងម៉ូតូ Honda Scoopy របស់ជនរងគ្រោះទៅរក្សាទុករង់ចាំការដោះស្រាយនៅពេលក្រោយ ៕
ចែករំលែកព័តមាននេះ