កីឡា និងលំហាត់ប្រាណ គឺពិតជាអ្វីដែលក្រុមគ្រូពេទ្យបានលើកទឹកចិត្តមនុស្សគ្រប់រូបឲ្យស្វែងរកពេលវេលា ឬលៃលកយ៉ាងណាអនុវត្តវាឲ្យបានជាប្រចាំ ប៉ុន្តែមិនមែនបានន័យថា មនុស្សគ្រប់រូបអាចលេងកីឡា ឬធ្វើលំហាត់ប្រាណបានគ្រប់វិញ្ញាសារ ឬប្រភេទកីឡាតាមដែលខ្លួនស្រលាញ់ និងចូលចិត្តបាននោះឡើយ ។…
កីឡា និងលំហាត់ប្រាណ គឺពិតជាអ្វីដែលក្រុមគ្រូពេទ្យបានលើកទឹកចិត្តមនុស្សគ្រប់រូបឲ្យស្វែងរកពេលវេលា ឬលៃលកយ៉ាងណាអនុវត្តវាឲ្យបានជាប្រចាំ ប៉ុន្តែមិនមែនបានន័យថា មនុស្សគ្រប់រូបអាចលេងកីឡា ឬធ្វើលំហាត់ប្រាណបានគ្រប់វិញ្ញាសារ ឬប្រភេទកីឡាតាមដែលខ្លួនស្រលាញ់ និងចូលចិត្តបាននោះឡើយ ។
ថ្មីៗកន្លងទៅនេះ មន្ត្រីជាន់ខ្ពស់មួយរូប ដែលស្និទ្ធនឹងប្រមុខរដ្ឋាភិបាលបានជួបគ្រោះថ្នាក់រហូតដល់បាត់បង់ជីវិតនៅក្នុងវ័យត្រឹមតែ៥៦ឆ្នាំ ដោយសារបញ្ហាបេះដូង ពេលកំពុងចូលរួមទាត់បាល់ក្នុងកម្មវិធីប្រកួតបាល់ទាត់មិត្តភាពយុវជនអន្តរក្រសួង-ស្ថាប័ន កាលពីល្ងាចថ្ងៃអង្គារ ទី១៨ ខែមីនា ឆ្នាំ២០២៥ កន្លងទៅថ្មីៗនេះ ។
ក្រៅពីករណីនេះនៅមានជនរងគ្រោះជាច្រើនដែលបានទទួលមរណភាពពីព្រោះតែកីឡា ទាំងខ្លួននៅក្មេងហើយប្រភេទកីឡាទាំងនោះមិនមែនមានតែបាល់ទាត់មួយនេះទេ គឺមានតាំងពីអ្នករត់ អ្នកជិះកង់ អ្នកហែលទឹក…។ល។ សម្រាប់ជនរងគ្រោះដែលបានរលត់សង្ខារទៅ គឺផុតទុកផុតទោសហើយ ប៉ុន្តែសម្រាប់សមាជិកគ្រួសារ និងមិត្តរួមការងារ ឬរួមអាជីពវាជាសោកនាដកម្មនៅពេលដែលមានរឿងបែបនេះកើតឡើង ។ ការស្លា.ប់ភ្លាមៗនៅលើទីលានកីឡាឬនៅក្នុងអំឡុងពេលនៃការធ្វើលំហាត់ប្រាណអាចបណ្តាលមកពីកត្តាផ្សេងៗ រួមទាំងលក្ខខណ្ឌវេជ្ជសាស្ត្រ ដូចជាបញ្ហាបេះដូងដែលបណ្តាលមកពីជនរងគ្រោះមិនបានធ្វើរោគវិនិច្ឆ័យច្បាស់លាស់ ឬសូម្បីតែការខ្វះជាតិទឹកធ្ងន់ធ្ងរ ។
ក្នុងករណីខ្លះ អ្នកលេងឬធ្វើលំហាត់ប្រាណប្រហែលជាមិនដឹងអំពីបញ្ហាសុខភាពមូលដ្ឋាន ដែលអាចនាំឱ្យមានការគាំងបេះដូងភ្លាមៗ ឬជួបគ្រោះមហន្តរាយសុខភាពធ្ងន់ធ្ងរផ្សេងទៀត ។
ដើម្បីសុវត្ថិភាពនៅមុនពេលធ្វើលំហាត់ប្រាណ ឬលេងកីឡាណាមួយដែលត្រូវការបញ្ចេញថាមពលខ្លួន បុគ្គលម្នាក់ៗគួរតែចាំបាច់ជួប និងពិគ្រោះយោបល់ជាមួយនឹងវេជ្ជបណ្ឌិតជំនាញនានា ហើយស្តាប់យោបល់ពួកគេ ។ មនុស្សគ្រប់រូបចាំបាច់បំផុត គឺលំហាត់ប្រាណ ដើម្បីសុខភាព ប៉ុន្តែប្រភេទ ឬវិញ្ញាសារនៃលំហាត់ប្រាណគេក៏មានក្បូនខ្នាត ហើយក៏មានបម្រាមផងដែរមិនមែនឲ្យតែយើងចង់យើងចេះតែហាត់បានគ្រប់គ្នាឡើយ។
ក្រៅពីសុខភាពផ្ទាល់ខ្លួនហើយនោះលំហាត់ប្រាណក៏ត្រូវតែផ្ទៀតផ្ទាត់ និងគួរធ្វើនៅក្នុងបរិយាការដែលមានស្ថានភាពអំណោយផលផ្សេងៗមិនមែនហាត់ក្រោមកំដៅថ្ងៃ ឬដំណកទឹកភ្លៀងឡើយ ។
ក្រៅពីការគាំងបេះដូងដូចជា ករណីមន្ត្រីជាន់ខ្ពស់ខាងលើហើយនោះកន្លងមកក៏មានជនរងគ្រោះមិនតិចឡើយដែលបានបាត់បង់ជីវិតដោយសារតែអាការៈស្ត្រូក ។ អាការៈបែបនេះវាគ្រោះថ្នាក់នៅពេលដែលជនរងគ្រោះធ្វើលំហាត់ប្រាណក្នុងស្ថានភាពអាកាសធាតុមិនអំណោយផល ។
បរិយាកាសដែលក្តៅខ្លាំងអាចនាំឱ្យកើតជំងឺដាច់សរសៃឈាមខួរក្បាលដែលអាចបណ្តាលឱ្យស្លា.ប់ ប្រសិនបើមិនមានការសង្គ្រោះ និងព្យាបាលទាន់ពេលវេលាឬពេលខ្លះវាដាច់ចំសរសៃដែលសំខាន់ ។
ក្រៅពីនោះនៅពេលដែលធ្វើលំហាត់ប្រាណ ឬលេងកីឡា ក៏គួរតែយកចិត្តទុកដាក់លើការបំពេញជាតិទឹក ឬរក្សាអតុល្យភាពអេឡិចត្រូលីត ។ ជាទូទៅនៅក្នុងអំឡុងពេលធ្វើលំហាត់ប្រាណសកម្មភាពរាងកាយខ្លាំងដោយគ្មានជាតិទឹកត្រឹមត្រូវ ឬតុល្យភាពអេឡិចត្រូលីតអាចនាំឱ្យមានផលវិបាកធ្ងន់ធ្ងរ ហើយក៏មានអ្នកដែលបាត់បង់ជីវិតជាច្រើននាក់ផងដែរ ។
សរុបទៅការលេងកីឡា ឬធ្វើលំហាត់ប្រាណ គឺជារឿងចាំបាច់ដែលមនុស្សគ្រប់រូបតម្រូវឲ្យអនុវត្តនៅក្នុងសកម្មភាពប្រចាំថ្ងៃ ប៉ុន្តែដើម្បីសុវត្ថិភាពមនុស្សគ្រប់រូបក៏ត្រូវតែដឹងថា តើលំហាត់ប្រាណ ឬកីឡាប្រភេទណាដែលខ្លួនយើងលេងទៅមានសុវត្ថិភាព និងមានអត្ថប្រយោជន៍ មិនមែនលេងទៅ ឫហាត់ទៅនាំមកនៅគ្រោះថ្នាក់ដល់ខ្លួន ។ ដើម្បីគេចចេញពីគ្រោះមហន្តរាយនេះ យើងទាំងអស់គ្នាចាំបាច់ត្រូវតែធ្វើការត្រួតពិនិត្យសុខភាព និងពិគ្រោះយោបល់ជាមួយនឹងវេជ្ជបណ្ឌិតជំនាញ ។
នៅក្នុងពេលធ្វើលំហាត់ប្រាណ ឬលេងកីឡា គឺគួរតែគិតគូរនូវបញ្ហាតុល្យភាពជាតិទឹក និងអាហារូបត្ថម្ភគ្រប់គ្រាន់ ហើយក៏ត្រូវតែចេះស្ទាបស្ទង់កម្លាំង និងសកម្មភាពរាងកាយ ៕
ចែករំលែកព័តមាននេះ