ខេត្តកំពង់ស្ពឺ ៖ ដោយសារតែជីវភាពខ្វះខាត រកព្រឹកខ្វះល្ងាច រកល្ងាចខ្វះព្រឹក ស្ត្រីចំណាស់ម្នាក់ក៏បានចេញទៅលានចានឱ្យគេ ប៉ុន្តែពេលត្រឡប់មកដល់ផ្ទះវិញត្រូវបានអគ្គិភ័យឆាបឆេះផ្ទះអស់គ្មានសល់បានត្រឹមតែទ្រហោយំ ។ ហេតុការណ៍ឆេះផ្ទះស្ត្រីចំណាស់ កាលពីវេលាម៉ោង០៣រសៀល…
ខេត្តកំពង់ស្ពឺ ៖ ដោយសារតែជីវភាពខ្វះខាត រកព្រឹកខ្វះល្ងាច រកល្ងាចខ្វះព្រឹក ស្ត្រីចំណាស់ម្នាក់ក៏បានចេញទៅលានចានឱ្យគេ ប៉ុន្តែពេលត្រឡប់មកដល់ផ្ទះវិញត្រូវបានអគ្គិភ័យឆាបឆេះផ្ទះអស់គ្មានសល់បានត្រឹមតែទ្រហោយំ ។
ហេតុការណ៍ឆេះផ្ទះស្ត្រីចំណាស់ កាលពីវេលាម៉ោង០៣រសៀល ថ្ងៃទី២២ ខែមីនា ឆ្នាំ២០២៥ នៅក្នុងភូមិស្នោរទី១ សង្កាត់រកាធំ ក្រុងច្បារមន ខេត្តកំពង់ស្ពឺ ។
តាមប្រភពព័ត៌មានពីនគរបាលប៉ុស្តិ៍សង្កាត់រការធំ បានឱ្យនិយាយដឹងថា មានករណីឆេះផ្ទះមួយខ្នងដែលសង់ឡើងពីឈើជាប់ដី ប្រក់ស័ង្កសី ទំហំ៥ម៉ែត្រ គុណនឹង៦ម៉ែត្រ ស្ថិតនៅក្នុងភូមិស្នោទី១ សង្កាត់រការធំ ក្រុងច្បារមន ខេត្តកំពង់ស្ពឺ ដែលមានម្ចាស់ឈ្មោះ ពេជ្រ ទូច ភេទស្រី អាយុ៦៥ឆ្នាំ មានមុខរបរស៊ីឈ្នួលលាងចានឱ្យគេ តាមរោងការ រោងបុណ្យ ។
នគរបាលប៉ុស្តិ៍សង្កាត់រការធំដដែលបានបន្តថា នៅមុនពេលកើតហេតុស្ត្រីចំណាស់ម្ចាស់ផ្ទះខាងលើបានទៅស៊ីឈ្នួលលាងចានឱ្យគេ ហើយបានទុកចៅស្រីអាយុប្រហែល១២ឆ្នាំឱ្យនៅចាំផ្ទះ ក្រោយមកនៅម៉ោងកើតហេតុ ស្រាប់តែនៅផ្នែកខាងក្រោយនៃចង្ក្រានបាយក៏មានអណ្តាតភ្លើងឆេះឡើងយ៉ាងសន្ធោសន្ធៅ គ្រានោះរថយន្តបង្ការពន្លត់អគ្គិភ័យនៃស្នងការដ្ឋានខេត្តបានចេញអន្តរាគមន៍ ដើម្បីជួយបាញ់ពន្លត់ តែមិនអាចជួយសង្គ្រោះបានឡើយ ដោយសារតែផ្លូវមានភាពតូចចង្អៀត ហើយត្រូវបានអ្នកភូមិសង់រោងការ និងរោងបុណ្យ អមសងខាង មិនអាចឱ្យរថយន្តសង្គ្រោះចូលជួយអន្តរាគមន៍បានទាន់ពេលវេលាឡើយ ។
បច្ចុប្បន្ន ផ្ទះឈើមួយខ្នងនេះត្រូវបានឆេះអស់ទាំងស្រុង ហើយអីវ៉ាន់ទាំងអស់ដែលស្ថិតនៅក្នុងផ្ទះនោះក៏មិនអាចយកចេញបានដែរ ៕
ចែករំលែកព័តមាននេះ