អន្តរជាតិ ៖ យោងតាមប្រភពពីទីភ្នាក់ងារសារព័ត៌មាន Reuters បានរាយការណ៍ថា តម្លៃមាសបានស្ថិតលើដំណើរសម្រាប់ការកើនឡើងប្រចាំសប្តាហ៍ទី៣ជាប់ៗគ្នា នៅថ្ងៃទី២១ ខែមីនា ឆ្នាំ២០២៥ ដែលត្រូវបានជំរុញដោយសញ្ញានៃការកាត់បន្ថយអត្រាការប្រាក់របស់ធនាគារកណ្តាលអាមេរិក…
អន្តរជាតិ ៖ យោងតាមប្រភពពីទីភ្នាក់ងារសារព័ត៌មាន Reuters បានរាយការណ៍ថា តម្លៃមាសបានស្ថិតលើដំណើរសម្រាប់ការកើនឡើងប្រចាំសប្តាហ៍ទី៣ជាប់ៗគ្នា នៅថ្ងៃទី២១ ខែមីនា ឆ្នាំ២០២៥ ដែលត្រូវបានជំរុញដោយសញ្ញានៃការកាត់បន្ថយអត្រាការប្រាក់របស់ធនាគារកណ្តាលអាមេរិក និងតម្រូវការមាសកើនឡើងខ្លាំង ចំពេលមានភាពមិនប្រាកដប្រជាភូមិសាស្ត្រនយោបាយ និងសេដ្ឋកិច្ចពិភពលោក។
តម្លៃមាសអន្តរជាតិបានធ្លាក់ចុះ ០.៥% ក្នុងតម្លៃ ៣,០៣០ដុល្លារក្នុង១អោន ឬ ៣,៦៥០ដុល្លារក្នុង១តម្លឺង គិតត្រឹមម៉ោង២:៣០នាទីរសៀលថ្ងៃទី២១ ខែមីនា បន្ទាប់ពីហក់ឡើងដល់កម្រិតខ្ពស់បំផុតគ្រប់ពេល ៣,០៥៧ដុល្លារក្នុង១អោន ឬ ៣,៦៨២ដុល្លារក្នុង១តម្លឹង កាលពីថ្ងៃទី២០ ខែមីនា កន្លងទៅ ពោលឡើងប្រហែល ១.៥%។
លោក Kelvin Wong អ្នកវិភាគទីផ្សារជាន់ខ្ពស់ប្រចាំតំបន់អាស៊ីប៉ាស៊ីហ្វិកនៅក្រុមហ៊ុន OANDA បានថ្លែងយ៉ាងដូច្នេះថា «មាសកំពុងជួញដូរបានធ្លាក់ចុះតម្លៃបន្តិចនៅអាស៊ីថ្ងៃនេះ ដោយសារតែភាពរឹងមាំនៃប្រាក់ដុល្លារអាមេរិកក្នុងចំណោមរូបិយប័ណ្ណសំខាន់ៗផ្សេងទៀត»។
ប្រភពពី Reuters បានរាយការណ៍ថា កាលពីថ្ងៃពុធ ធនាគារកណ្តាលអាមេរិកបានរក្សាអត្រាគោលរបស់ខ្លួនក្នុងចន្លោះ ៤.២៥%-៤.៥០% ដូចការរំពឹងទុក។ អ្នកបង្កើតគោលនយោបាយបានមើលឃើញថា ធនាគារកណ្តាលអាមេរិកអាចនឹងផ្តល់នូវការកាត់បន្ថយអត្រាការប្រាក់ចំនួន២លើក នៅចុងឆ្នាំនេះ។
លោក Jerome Powell ប្រធានធនាគារកណ្តាលអាមេរិកបានលើកឡើង បន្ទាប់ពីបញ្ចប់កិច្ចប្រជុំគោលនយោបាយថា គោលនយោបាយដំបូងរបស់ប្រធានាធិបតីអាមេរិក លោក ដូណាល់ ត្រាំ (Donald Trump) រួមទាំងពន្ធនាំចូលផងនោះ ហាក់ដូចជាបានធ្វើឱ្យសេដ្ឋកិច្ចអាមេរិកមានកំណើនយឺត និងយ៉ាងហោចណាស់ក៏អាចបង្កើតអតិផរណាខ្ពស់ជាបណ្ដោះអាសន្ន។
កត្តាជំរុញតម្លៃមាស រួមមានសង្គ្រាមពន្ធ ការកាត់បន្ថយអត្រាការប្រាក់តាមការរំពឹងទុក និងការត្រឡប់មកវិញនៃភាពតានតឹងនៅតំបន់មជ្ឈិមបូព៌ា បានជំរុញឱ្យតម្លៃមាសហក់ឡើងខ្ពស់ដ៏គួរឱ្យភ្ញាក់ផ្អើលនៅឆ្នាំនេះ ដោយឡើងដល់កម្រិតខ្ពស់បំផុតចំនួន១៦លើកក្នុងនោះ៤លើកលើសពីតម្លៃ ៣,០០០ដុល្លារក្នុង១អោន។
មាស គឺជារបាំងការពារដ៏រឹងមាំប្រឆាំងនឹងភាពមិនច្បាស់លាស់ភូមិសាស្ត្រនយោបាយ និងសេដ្ឋកិច្ចពិភពលោក ហើយតម្លៃលោហៈធាតុដ៏មានតម្លៃនេះ តែងតែងើបឡើងនៅ ពេលមានអត្រាការប្រាក់ទាប៕ ប្រភព ៖ Reuters
ចែករំលែកព័តមាននេះ