ខេត្តព្រៃវែង ៖ អាជីវករលក់ដូរជាច្រើននាក់នៅផ្សារស្វាយ ដែលស្ថិតក្នុងភូមិស្វាយ ឃុំព្រៃស្រឡិត ស្រុកពារាំង ខេត្តព្រៃវែង បាទបង្ហាញពីអារម្មណ៍សប្បាយរីករាយ ក្រោយពេលដែលអាជ្ញាឃុំនិងស្រុក ជួយសម្រួលអោយពួកគាត់មានកន្លែងលក់ដូរថ្មី…
ខេត្តព្រៃវែង ៖ អាជីវករលក់ដូរជាច្រើននាក់នៅផ្សារស្វាយ ដែលស្ថិតក្នុងភូមិស្វាយ ឃុំព្រៃស្រឡិត ស្រុកពារាំង ខេត្តព្រៃវែង បាទបង្ហាញពីអារម្មណ៍សប្បាយរីករាយ ក្រោយពេលដែលអាជ្ញាឃុំនិងស្រុក ជួយសម្រួលអោយពួកគាត់មានកន្លែងលក់ដូរថ្មី ប្រកបដោយសុវត្ថិភាព អនាម័យល្អ និងតំលៃតូបធូរថ្លៃ។
ក្នុងពេលជួបសំណេះសំណាលជាមួយអាជ្ញាធរស្រុក នាព្រឹកថ្ងៃទី 21 មីនានេះ អាជីវករជាច្រើនបានលើកឡើងថា ពីមុនពួកគាត់លក់ដូរតាមចិញ្ចើមផ្លូវ គឺប្រឈមនឹងគ្រោះថ្នាក់ខ្លាំង គ្មានកន្លែងចោលសំរាម គ្មានបង្គន់អនាម័យប្រើប្រាស់ ពេលមានភ្លៀងខ្យល់ម្ដងៗ របស់របរលក់ដូរប៉ើងខ្ទាតរប៉ាត់រប៉ាយ ទទឹកខូចអស់ គឺវេទ្ទនាណាស់ តែឥឡូវបានអាជ្ញាធរជួយសម្រួលអោយពួកគាត់មានកន្លែងលក់ដូរថ្មី មានគ្រែមានតូបលក់ដូរត្រឹមត្រូវបរិស្ថានអនាម័យក៏ល្អ សណ្តាប់ធ្នាប់ក៏ល្អ គឺពួកគាត់សប្បាយចិត្តណាស់។
គួររំលឹកផងដែរថា ចំពោះទីតាំងផ្សារស្វាយនេះកន្លងមកមានសភាពលក់ដូររញ៉េរញ៉ៃគ្មានសណ្តាប់ធ្នាប់ ដែលជាហេតុបង្ករអោយមានការកកស្ទះចរាចរណ៍ជាញឹកញាប់ ព្រោះតំបន់ខាងលើនេះគឺតែងតែមានរថយន្តធំតូច ម៉ូតូ រ៉ឺម៉កម៉ូតូ បើកបរឆ្លងកាត់ទីនេះជាច្រើន ហើយអ្វីដែលមានការលំបាកថែមទៀតនោះ គឺគ្មានកន្លែងចោលសម្រាម គ្មានទឹកស្អាត និងបង្គន់អនាម័យប្រើប្រាស់នោះទេ ដូច្នេះហើយទើបអាជ្ញាធរភូមិ ឃុំ ស្រុក សហការគ្នាជាមួយនឹងដីឯកជនមួយកន្លែងបង្កើតជាផ្សារមួយថ្មី ដែលមានចំងាយ១០០ម៉ែត្រពីទីតាំងចាស់ ហើយបើកឱ្យក្រុមអាជីវករ។អាចចូលទៅលក់ដូរនៅទីតាំងថ្មីដោយមិនបង់ថ្លៃសេវា។រយៈពេល 3 ខែ ហើយខែបន្តបន្ទាប់ គឺមានការបង់ថ្លៃក្នុងតម្លៃសមរម្យ ដែលក្រុមអាជីវករបានព្រមព្រៀងទទួលយកបាន។
ទីតាំងផ្សារថ្មីនេះមានទទឹងទំហំ៣៥ម៉ែត្រ បណ្តោយ៦០ម៉ែត្រ ដែលក្នុងនោះមានតូចចំនួនជាង៨០តូប មានកន្លែងសម្រាប់ទុកដាក់សម្រាមត្រឹមត្រូវ មានទឹកស្អាត និងបង្គន់អនាម័យសម្រាប់ប្រើប្រាស់ផងដែរ រីឯតំលៃតូបវិញត្រឹមតែ៥ម៉ឺនរៀលប៉ុណ្ណោះក្នុងមួយខែ គិតចាប់ពីខែទី 4រហូតទៅ ៕
ចែករំលែកព័តមាននេះ