រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើឲ្យលោកគ្រូ-អ្នកគ្រូ ត្រូវពង្រឹងលើការបង្រៀនសិស្សានុសិស្សចាប់ពីថ្នាក់ទី១ ដល់ទី១២ ដើម្បីឲ្យមានចំណេះពិតប្រាកដ…
រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើឲ្យលោកគ្រូ-អ្នកគ្រូ ត្រូវពង្រឹងលើការបង្រៀនសិស្សានុសិស្សចាប់ពីថ្នាក់ទី១ ដល់ទី១២ ដើម្បីឲ្យមានចំណេះពិតប្រាកដ ចៀសវាងនៅពេលចូលប្រឡងចូលក្របខណ្ឌរដ្ឋសរសេរអក្សរមិនត្រង់ជួរបន្ទាត់ ។
ថ្លែងក្នុងសម្ពោធអគារសិក្សា និងសមិទ្ធផលនានា ក្នុងវិទ្យាល័យ ហ៊ុនសែន សេរីភាព នាព្រឹកថ្ងៃទី២១ ខែមីនា ឆ្នាំ២០២៥ សម្តេចបវរធិបតីបានលើកឡើងថា ត្រូវតែមានមូលដ្ឋានរឹងមាំចាប់ពីថ្នាក់បឋមសិក្សារហូតដល់វិទ្យាល័យ ដើម្បីមានមូលដ្ឋានគ្រឹះពេលទៅសិក្សាថ្នាក់មហាវិទ្យាល័យ ដើម្បីចេញទៅបម្រើការងារទាំងក្នុងវិស័យរដ្ឋ និងឯកជនត្រូវតែជាអ្នកចេះពិតប្រាកដ ។
សម្តេចបវរធិបតីបានបន្តថា ក្នុងនោះ ក៏ត្រូវរួមគ្នាពង្រឹងអប់រំបណ្តុះបណ្តាលលើអត្តចរិត និងឥរិយាបថផងដែរ ដើម្បីបានធនធានមនុស្សដ៏មួយល្អនៅក្នុងសង្គមជាតិ ។ នៅចំពោះមុខអ្នកគ្រូ លោកគ្រូ និងសិស្សានុសិស្សសម្តេចបវរធិបតី ហ៊ុន ម៉ាណែតបាន គូសបញ្ជាក់ថា «បឋមសិក្សាគឺជាមូលដ្ឋាន មធ្យមសិក្សាកម្រិត១ កម្រិត២ដែលយើងថា អនុវិទ្យាល័យ វិទ្យាល័យនេះ យើងត្រូវតែធ្វើ ។ ដូចខ្ញុំនិយាយ១២ឆ្នាំនេះ បើរឹងមាំ១២ឆ្នាំហើយ គឺយើងអាចមិនព្រួយបារម្ភពេលទៅប្រឡងមន្ត្រី។ មន្ត្រីចូលទៅគាត់អាចមានសមត្ថភាព កុំឲ្យចូលប្រឡងជាប់ចូលទៅសរសេរអក្សរមិនត្រង់ជួរឬយ៉ាងម៉េច?» ។
ជាមួយគ្នានោះដែរ ប្រមុខរាជរដ្ឋាភិបាលបានក៏បានលើកឡើងថា ដូច្នេះ ក្នុងអាណត្តិទី៧ដែល ដឹកនាំដោយសម្តេចផ្ទាល់បានច្បិចយកត្តាអប់រំជាចម្បង ដោយបានបង្កើតគណៈកម្មការអប់រំ ដើម្បីពង្រឹងវិស័យអប់រំកម្ពុជាដែលផ្តោតលើបឋមសិក្សាមុនគេ ។ ក្នុងនោះ បានកំណត់យកសាលាប្រមាណជា៧ពាន់សាលា ក្នុងចំណោមជាង១ម៉ឺនសាលាធ្វើជាគោលដៅក្នុង ការបណ្តុះបណ្តាលឲ្យមានចំណេះវិជ្ជាពិតប្រាកដដោយអនុវត្តជាជំហានៗ ទោះបីជាសាលាខ្លះមានបំពាក់កុំព្យូទ័រ និងអត់កុំព្យូរទ័រក៏ដោយ ក៏ត្រូវពង្រឹងលើចំណេះជំនាញ និងអកប្បកិរិយាបថឲ្យបានសមរម្យ ។
សម្តេចបវរធិបតីក៏បានគូសបញ្ជាក់ថា «ចឹងឪពុកម្តាយ និងគ្រូ ត្រូវតែយល់គ្នា ហើយទុកចិត្តគ្នា សហការគ្នាធ្វើ ដែលពាក្យខ្មែរយើងថា ឪពុកម្តាយបង្កើត គឺជាឪពុកម្តាយទី១ លោកគ្រូ អ្នកគ្រូ គឺជាឪពុកម្តាយទី២ ម្នាក់បង្កើតជីវិត ថែរក្សាឱ្យធំធាត់ចិញ្ចឹមឱ្យរស់ ផ្តល់ឱកាសឱ្យមករៀន ទំនុកបម្រុង លោកគ្រូ អ្នកគ្រូ ឪពុកម្តាយទី២ ជួយបំពាក់បញ្ញាញាណស្មារតី ទៅជាមនុស្សពេញ ចំណេះដឹងសមត្ថភាព ដើម្បីក្លាយទៅជាធនធានល្អ ចឹងឪពុកម្តាយទី១ និងឪពុកម្តាយទី២ ត្រូវរួមគ្នាត្រូវថែរក្សាគ្នា» ។
បន្ថែមលើនេះ សម្តេចក៏បានរំលឹកនូវព្រឹត្តិការណ៍ ដែលសិស្សានុសិស្ស បានប្រព្រឹត្តិនៅកំហុស ដែលលើសពីព្រំដែនវិន័យ និងត្រូវបានលោកគ្រូ អ្នកគ្រូដាក់ពិន័យ ដោយឡែក បន្ទាប់ពីទទួលពិន័យ សិស្សានុសិស្ស បែរជាយករឿងនេះ ទៅប្រាប់ឪពុកម្តាយ ឬអាណាព្យាបាលខ្លួន ដោយផ្ទាល់ ដោយមិនទទួលស្គាល់កំហុសខ្លួន ហើយចោទទៅកាន់លោកគ្រូ អ្នកគ្រូ ប្រើប្រាស់ ហឹង្សាដាក់ខ្លួនជាដើម នាំឱ្យអាណាព្យាបាលប្រតិកម្មភ្លាម បង្កើតទៅជារឿងយល់ច្រឡំនឹងគ្នារវាងគ្រូ
និងអាណាព្យាបាល ។
សម្តេចបវរធិបតីលើកឡើងទៀតថា មានករណីខ្លះ ឪពុកម្តាយ ឃើញថាកូនចេញពីផ្ទះម៉ោង៧ មកសាលា ហើយត្រឡប់ទៅផ្ទះម៉ោង១១ មិនប្រាកដថា កូនៗរបស់ខ្លួនបានរៀនសូត្រដូចសិស្ស ដទៃនោះទេ មានសិស្សានុសិស្សខ្លះ លបលួចមិនចូលរៀនជាដើម ដែលនេះ ទាមទារឱ្យមានទំនាក់ ទំនងរវាងគ្រូ និងអាណាព្យាបាល តួយ៉ាងបច្ចុប្បន្នេះ បើករណីនេះកើតឡើង ច្បាស់ណាស់ ម្តាយឪពុកប្រាកដជាដឹងតាមរយៈការជូនដំណឹងពីលោកគ្រូ អ្នកគ្រូ តាមគ្រុបដូចជាតេឡេក្រាមជាដើម ៕
ចែករំលែកព័តមាននេះ