ខេត្តព្រះសីហនុ ៖ លោក ឡុង ឌីម៉ង់ អភិបាលរង និងជាអ្នកនាំពាក្យរដ្ឋបាលខេត្តព្រះសីហនុ បានឱ្យដឹងថា កោះរ៉ុង នឹងរៀបចំសង្ក្រាន្ត…
ខេត្តព្រះសីហនុ ៖ លោក ឡុង ឌីម៉ង់ អភិបាលរង និងជាអ្នកនាំពាក្យរដ្ឋបាលខេត្តព្រះសីហនុ បានឱ្យដឹងថា កោះរ៉ុង នឹងរៀបចំសង្ក្រាន្ត ដោយមានលក្ខណៈប្លែក និងទាក់ទាញ់ខុសពីឆ្នាំមុនៗ ដើម្បីបង្កភាពសប្បាយរីករាយជូនបងប្អូនប្រជាពលរដ្ឋ ពិសេសភ្ញៀវទេសចរបរទេសឱ្យបានស្គាល់ពីទំនៀមទំលាប់ប្រពៃណីជាតិខ្មែរ ក្នុងពិធីបុណ្យចូលឆ្នាំខ្មែរ ។
លោក ឡុង ឌីម៉ង់ អភិបាលរង និងជាអ្នកនាំពាក្យរដ្ឋបាលខេត្តព្រះសីហនុ បានមានប្រសាសន៍ថា ក្នុងឱកាសបុណ្យចូលឆ្នាំថ្មីប្រពៃណីជាតិខែ្មរ ខាងមុខនេះ ក្រោមការដឹកនាំរបស់លោកអភិបាលខេត្ត បានណែនាំដល់រដ្ឋបាលក្រុង-ស្រុកទាំង៦ រួមទាំងបណ្ដាវត្តអារាមមួយចំនួន ដែលមានទីប្រជុំជនដែរនោះ រៀបចំព្រឹត្តិការណ៍សង្ក្រាន្ត នៅក្នុងមូលដ្ឋានរបស់ខ្លួន ដើម្បីផ្តល់ភាពសប្បាយរីករាយជូន ប្រជាពលរដ្ឋ ភ្ញៀវទេសចរជាតិ និងអន្តរជាតិ ដែលនឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥។ ក្នុងនោះ អាជ្ញាធរក្រុងកោះរ៉ុង បាននិងកំពុងសហការរៀបចំជាមួយនឹងបណ្ដាវិស័យឯកជន ដើម្បីរៀបចំជាព្រឹត្តិការណ៍សង្ក្រាន្ដកោះរ៉ុង បម្រើឱ្យអ្នកទេសចរជាតិ និងអន្តរជាតិ បានលេងកម្សាន្ត ប្រកបដោយ ភាពសប្បាយរីករាយ ។
លោកអភិបាលរង បន្ថែមថា បច្ចុប្បន្ននេះ អាជ្ញាធរកោះរ៉ុង បាននិងកំពុងរៀបចំ តុបតែងលម្អសោភ័ណភាព ផ្កាភ្ញី ភ្លើងគោម រៀបចំខ្លោងទ្វារសង្ក្រាន្ត រូបទេវតាបាចផ្កា និងអក្សរសួស្ដីឆ្នាំថ្មីជាដើម។ មិនតែប៉ុណ្ណោះ អាជ្ញាធរក្រុងកោះរ៉ុង ក៏បានត្រៀមបង្កើត នូវកម្មវិធីសប្បាយភាពជាច្រើន ក្នុងការផ្សព្វផ្សាយពីវប្បធម៌ ប្រពៃណីដ៏ល្អ ផូរផង់តាមរយៈការលេងល្បែងប្រជាប្រិយ ដើម្បីបង្ហាញដល់ភ្ញៀវជាតិ ពិសេសភ្ញៀវបរទេស ឱ្យស្គាល់ពីទំនៀមទម្លាប់ប្រពៃណីជាតិ ដ៏ល្អផូរផង់របស់ខ្មែរ ។
លោកអភិបាលរងបន្ថែមថា សង្ក្រាន្តកោះរ៉ុង ក្នុងឆ្នាំ២០២៥នេះ អាជ្ញាធរគ្រោងរៀបចំ គឺនៅតំបន់ឆ្នេរក្រុងកោះរ៉ុង តែម្តង ដោយសារទីតាំងនោះ គឺសម្បូរទៅដោយបណ្តុំភ្ញៀវទេសចរអន្តរជាតិច្រើន ម្យ៉ាងទៀតនៅទីនោះ មានសណ្ឋាគារ មានPub Street មាន Restaurant ជាច្រើន សម្រាប់ភ្ញៀវទេសចរ ។
លោក ឡុង ឌីម៉ង់ បញ្ជាក់ថា «ភាគច្រើនភ្ញៀវទេសចរ ដែលបានទៅលេងកម្សាន្តកោះរ៉ុង សុទ្ធសឹងតែជាជនបរទេសស្បែកស មកពីប៉ែកខាងអឺរ៉ុប អាមេរិក ដែលអាចនិយាយបានថា សឹងតែច្រើនជាងភ្ញៀវជាតិទៀតផង។ បើតាមរយៈការឆ្លងកាត់ធ្វើដំណើរតាមកំពង់ផែទេសចរណ៍ ពីក្រុងព្រះសីហនុទៅនោះ មួយថ្ងៃៗ មិនក្រោម១ពាន់នាក់នោះទេ។ ដូច្នេះគាប់ជួនខាងមុខនេះ គឺជាឱកាស នៃពិធីបុណ្យចូលឆ្នាំខ្មែរ ភ្ញៀវបរទេស និងសម្រុកចូលមកលេងកោះរ៉ុងច្រើនដែរ ហើយយកឱកាសនោះរៀបចំពិធីឱ្យមានការលេងល្បែងប្រជាប្រិយខ្មែរ ដូចជា បោះអង្គញ់ ចោលឈូង ទាញព្រ័ត្រ ឡើងសសរខ្លាញ់ ជាដើម។ ក្នុងនោះក៏រៀបចំឱ្យមានការប្រគំតន្ត្រីផងដែរ ដើម្បីបង្កើនបរិយាកាសកាន់តែសប្បាយរីករាយ។ មិនតែប៉ុណ្ណោះយើងក៏មិនភ្លេចផង ដែរនូវការរៀបចំពិធីបែបលក្ខណៈសាសនា ដូចជាការពូនភ្នំខ្សាច់ ដោយយើងធ្វើនៅវត្តអារាមនៅទីនោះក៏ពិតមែន ប៉ុន្តែយើងនឹងត្រៀម ដើម្បីឱ្យភ្ញៀវបរទេសបានដឹងកាន់តែជ្រួតជ្រាបអំពី ភាពសម្បូរ ផ្នែកខាងវប្បធម៌ប្រពៃណីជាតិរបស់យើង» ។
លោក ឡុង ឌីម៉ង់ ឱ្យដឹងទៀតថា កាលពីឆ្នាំកន្លងទៅ ប្រជាពលរដ្ឋដែលធ្វើការ និងរស់នៅ ក៏ដូចជាភ្ញៀវទេសចរជាតិ និងអន្តរជាតិ បានសាទរយ៉ាងខ្លាំង ក្នុងការរៀបចំសង្ក្រាន្តនៅលើកោះរ៉ុងដ៏ស្រស់ ស្អាតមួយនេះ ។
ទន្ទឹមនឹងនោះ លោកអភិបាលរង ក៏បានអំពាវនាវដល់ប្រជាពលរដ្ឋ ពិសេស ទេសចរអន្តរជាតិ សូមមេត្តាជ្រាប អំពីការរៀបចំសង្ក្រាន្ត ក្នុងព្រឹត្តិការណ៍ចូលឆ្នាំថ្មី នៅតាមបណ្ដាទីប្រជុំជន ក្នុងខេត្តព្រះសីហនុ ជាពិសេសនៅកោះរ៉ុងតែម្ដង សូមអញ្ជើញទៅលេងកម្សាន្ត ខណៈអាជ្ញាធរខេត្តបានត្រៀមរៀបចំ ផែនការជាច្រើន ដើម្បីការពារសន្តិសុខសណ្ដាប់ធ្នាប់ របៀបរៀបរយជូនដល់អ្នកទៅកម្សាន្ត ក្នុងទឹកដី នៃខេត្តព្រះសីហនុ គ្រប់ទីកន្លែង គ្រប់រមណីយដ្ឋាន មិនថា តំបន់កោះ និងឆ្នេរ ដោយមានការផ្លាស់ប្តូរវេនយាមកាម ដើម្បីធ្វើយ៉ាងណាផ្តល់នូវទំនុកចិត្ត និងភាពកក់ក្តៅ នៅពេលដែលប្រជាពលរដ្ឋ ភ្ញៀវទេសចរបរទេស មកកម្សាន្តនៅក្នុងឱកាសបុណ្យចូលឆ្នាំខ្មែរខាងមុននេះ ៕
ចែករំលែកព័តមាននេះ