ខេត្តតាកែវ ៖ ព្រះធម្មវិជ្ជា ជួន កក្កដា ព្រះវិន័យធម៌គណខេត្តតាកែវ និងជាព្រឹទ្ធបុរសរងនៃពុទ្ធិកសកលវិទ្យាល័យព្រះសីហនុរាជ នាយកសាលាពុទ្ធិកបឋមសិក្សាប្រាសាទនាងខ្មៅ បានលាចាកសិក្ខាបទហើយនៅព្រឹកថ្ងៃទី១៩ ខែមីនា…
ខេត្តតាកែវ ៖ ព្រះធម្មវិជ្ជា ជួន កក្កដា ព្រះវិន័យធម៌គណខេត្តតាកែវ និងជាព្រឹទ្ធបុរសរងនៃពុទ្ធិកសកលវិទ្យាល័យព្រះសីហនុរាជ នាយកសាលាពុទ្ធិកបឋមសិក្សាប្រាសាទនាងខ្មៅ បានលាចាកសិក្ខាបទហើយនៅព្រឹកថ្ងៃទី១៩ ខែមីនា ឆ្នាំ២០២៥នេះ ។
ព្រះធម្មវិជ្ជា ជួន កក្កដា បានសាងផ្នួសជាសង្ឃក្នុងវ័យ១៣ឆ្នាំ កាលពីឆ្នាំ១៩៩៨ ដែលមកដល់ពេលនេះមានរយៈពេល២៧ឆ្នាំហើយ ។ ជាទូទៅព្រះអង្គត្រូវបានគេស្គាល់ថាមុតស្រួចណាស់ ជាមួយដៃគូព្រះអង្គក្នុងការទេសនាគ្រែ២ជាមួយព្រះអង្គ ភិន វុទ្ធី ចៅអធិការវត្តប្រាសាទនាងខ្មៅ ។
ក្នុងពិធីលាចាកសិក្ខាបទនេះ ក៏មានការនិមន្តចូលរួមពីគណសង្ឃជាន់ខ្ពស់ជាច្រើនអង្គ បានស្រោចព្រះសុគន្ធវារីនៅមុខប្រាសាទនាងខ្មៅ មុនពេលផ្លាស់ប្ដូរពីការស្លៀកពាក់ចីវរមកស្លៀកពាក់សពានាក្រមា ។
លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ពុទ្ធសាសនិក ដែលតែងស្តាប់ធម៌ទេសនារបស់អតីតព្រះតេជគុណ ជួន កក្កដា ជាអតីតព្រះអង្គមុនីបាលោ ជួន កក្កដា បានចំណាយពេលវេលា កម្លាំងកាយ កម្លាំងចិត្ត ជួយដល់ព្រះពុទ្ធសាសនានៅកម្ពុជាកន្លងមកនេះ ជួយក្នុងការអប់រំតាមរយៈឱវាទរបស់ព្រះពុទ្ធ ។
លោកជំទាវស្ត្រីទី១ បានដាក់ក្ដីរំពឹងថា លោក ជួន កក្កដា ក្នុងភេទជាគ្រហស្ថ ក៏នៅតែជួយដល់ព្រះពុទ្ធសាសនា បំពេញកាតព្វកិច្ចក្នុងនាមជាពលរដ្ឋជួយដល់សង្គមកម្ពុជា ជាពិសេស គឺការអប់រំយុវជន យុវតីជំនាន់ក្រោយ ឱ្យមានសីលធម៌ សុជីវធម៌ មេត្តាធម៌ និងគុណធម៌ ។ លោកជំទាវក៏សូមជូនពរលោក ជួន កក្កដា ឱ្យមានសំណាងល្អក្នុងភាពជាគ្រហស្ថ ។
ចំណែកលោកឧញ៉ា ម៉ុង ឫទ្ធី បានសម្ដែងអារម្មណ៍សោកស្ដាយរកអ្វីមកប្រៀបផ្ទឹមពុំបាន ក្រោយព្រះអង្គគ្រូ ជួន កក្កដា បានលាចាកសិក្ខាបទ ដោយបានបង្ហោះសារថា ពុទ្ធបរិស័ទដែលមកចូលរួមក្នុងពិធីនេះ រួមទាំងខ្ញុំផង ពិតជាមានការសោកស្ដាយណាស់ រហូតស្រុះស្រួលគ្នាប្រមូលបច្ច័យយកទៅកួចជាចំណងដៃថែមទៀតផង ។
គេនៅចាំសង្ឃដីការបស់ព្រះអង្គ ជួន កក្កដា ខណៈដែលព្រះអង្គ សាន សុជា លាចាកសិក្ខាបទនោះ មានពុទ្ធបរិស័ទសុំព្រះអង្គកុំសឹក ហើយអ្នកខ្លះក៏ឆ្ងល់ថា ព្រះអង្គ សាន សុជា សឹកហើយទៅណា ? ព្រះអង្គមានសង្ឃដីកាថា កុំឆ្ងល់ សឹកការប្រពន្ធ បើមិនការប្រពន្ធសឹកធ្វើអី ?
ព្រះអង្គ ជួន កក្កដា បានជួយដល់នេនគ្មានទីពឹងរាប់រយអង្គ
វត្តប្រាសាទនាងខ្មៅ មិនត្រឹមតែជាទីកន្លែងស្នាក់អាស្រ័យសម្រាប់ព្រះសង្ឃ និងជាទីកន្លែងសម្រាប់ធ្វើបុណ្យទានរបស់ពុទ្ធបរិស័ទប៉ុណ្ណោះទេ ថែមទាំងជាទីកន្លែងផ្តល់ការរៀនសូត្រ ដល់កូននេនតូចៗជាកូនកសិករក្រីក្ររាប់រយអង្គផងដែរ ។
បច្ចុប្បន្នវត្តប្រាសាទនាងខ្មៅ មានព្រះសង្ឃគង់នៅចំនួន ៣៤៥អង្គ ដែលភាគច្រើនគឺជាកុមារគ្មានទីពឹង ។ ដោយសារតែមានព្រះសង្ឃគង់នៅច្រើនបែបនេះ ទើបវត្តត្រូវចំណាយអង្ករដល់ ១៥០គីឡូក្រាមសម្រាប់ចង្ហាន់ពេលព្រឹក ថ្ងៃត្រង់ និងត្រូវចំណាយថវិកាធ្វើម្ហូបចន្លោះពី ២លាន ៥០ម៉ឺនរៀលទៅ ២លាន ៦០ម៉ឺនរៀលក្នុង១ថ្ងៃ ។ ព្រះសង្ឃចំនួន ៣៤៥អង្គ គឺមានព្រះជន្មចន្លោះពី៥ឆ្នាំទៅ២០ឆ្នាំ កំពុងស្នាក់នៅសិក្សារៀនសូត្រនៅក្នុងវត្តប្រាសាទនាងខ្មៅ ដែលមានទីតាំងស្ថិតនៅភូមិចារ ឃុំរវៀង ស្រុកសំរោង ខេត្តតាកែវ ។
ព្រះអង្គ ជួន កក្កដា ជាព្រះវិន័យធម៌គណខេត្តតាកែវ និងជានាយកវិទ្យុត្រៃរ័ត្ន នៅក្នុងវត្តប្រាសាទនាងខ្មៅ មានថេរដីកាថា បច្ចុប្បន្នវត្តប្រាសាទនាងខ្មៅ មានភិក្ខុនិងលោកនេនចំនួន ៣៤៥អង្គគង់នៅដើម្បីសិក្សារៀនសូត្រ ដែលមានព្រះសង្ឃាភិរ័ត្ន ភិន វុទ្ធី ជាព្រះចៅអធិការវត្ត ។ ភិក្ខុនិងលោកនេនទាំងនោះ សុទ្ធតែជាក្មេងមកពីគ្រួសារទីទ័លក្រ ក្មេងដែលត្រូវឪពុកម្តាយលែងលះគ្នា ហើយមកពីទីជិតឆ្ងាយទាំង២៥ខេត្ត-រាជធានី ។
ព្រះអង្គបន្តថា មូលហេតុដែលមានក្មេងៗមកបួសច្រើននេះ ដោយសារពុទ្ធបរិស័ទ្ធជិតឆ្ងាយដឹងថា ព្រះអង្គគង់នៅវត្តប្រាសាទនាងខ្មៅ និងដឹងតៗគ្នាតាមរយៈការទេសនារបស់ព្រះអង្គ និងការទេសនារបស់ព្រះសង្ឃាភិរ្ន័ ភិន វុទ្ធី ជាព្រះចៅអធិការវត្ត ។ ចំពោះការសិក្សារៀនសូត្រវិញ ព្រះអង្គបានបើកសាលាពុទ្ធិកថ្នាក់បឋម ដើម្បីឱ្យលោកៗរៀនអក្សរសាស្ត្រខ្មែរ ភាសាអង់គ្លេស ភាសាបាលី និងរៀនជំនាញកុំព្យូទ័រ ។
ព្រះអង្គមានថេរដីកាថា «នៅទីនេះលោកអាចរៀនបានទាំងមតេ្តយ្យ ទាំងភាសាអង់គ្លេស ទាំងថ្នាក់កុំព្យូទ័រ ហើយមិនឱ្យលោកចេញបច្ច័យទេ ។ លោកមិនបាច់ចេញអ្វីទាំងអស់ គឺចាំតែរៀនតែមួយមុខទេ អ្វីៗវត្តចេញទាំងអស់» ។
ចំពោះបច្ច័យវិញ បានពីការបរិច្ចាគរបស់ពុទ្ធបរិស័ទជិតឆ្ងាយ និងរួមទាំងពុទ្ធបរិស័ទរស់នៅក្រៅប្រទេសផងដែរ ។ ទាំងភិក្ខុនិងលោកនេន បន្ទាប់ពីពួកគេរៀនចប់សាលាពុទ្ធិកបឋមសិក្សា ក៏ត្រូវរៀនបន្តទៀតនៅតាមវត្តក្នុងរាជធានីភ្នំពេញ ដែលលោកត្រូវរកអ្នកផ្គត់ផ្គង់បន្ត ។
ព្រះអង្គបន្តទៀតថា «មានថ្ងៃខ្លះញាតិញោមគាត់កាន់កាប់យកចង្ហាន់១ពេលហ្នឹងដាច់ទៅយើងរួចខ្លួនដោយសារអត់ចាយ ខែខ្លះក៏ពិបាកដែរ តែក៏នៅមានញាតិញោមគាត់ចូលរួមខ្លះ ។ ចំពោះលោកនេននៅអាយុតិច ពេលដំបូងៗពិបាកដែរ ព្រោះអត់ឆាន់ល្ងាច តែមានការអប់រំញឹកញយទៅ លោកក៏សប្បាយជាមួយគេជាមួយឯងវិញទៅ» ។
ព្រះអង្គមានថេរដីកាបន្តទៀតថា នៅក្នុងវត្តប្រាសាទនាងខ្មៅ ក៏មានប្រាសាទបុរាណមួយដែរ គឺប្រាសាទនាងខ្មៅដែលកសាងក្នុងឆ្នាំ៩២១ សាងសង់ឡើងអំពីថ្មភក់ និងឥដ្ឋក្នុងរាជព្រះបាទជ័យវរ្ម័នទី៤ ។ ប្រាសាទនេះ ក៏មានពុទ្ធបរិស័ទមកបែបន់ និងលាមាត់លាពាក្យជាហូរហែ ។ តែបើថាឱ្យល្បីល្បាញខ្លាំងក៏អត់ដែរ តែមានអ្នកខ្លះគាត់បែរបន់សមប្រកបគាត់ក៏ជឿទៅ ។ ចំពោះចំណុចដែលទាក់ទាញរបស់វត្តប្រាសាទនាងខ្មៅ សំខាន់គឺព្រះអង្គទេសនា ហើយមានអ្នកស្គាល់ច្រើន ហើយម្យ៉ាងទៀតញាតិញោមដឹងថា វត្តនេះជាទីកន្លែងសិក្សារៀនសូត្រ ។ ព្រោះញាតិញោមឱ្យតម្លៃថា ជាកន្លែងបណ្តុះបណ្តាលធនធានមនុស្ស ព្រោះវាមិនត្រឹមតែបានប្រយោជន៍តែសាសនាមួយទេ ព្រោះកុលបុត្រខ្មែរទាំងអស់ដែលគ្មានទីពឹង នឹងត្រូវមកវត្តប្រាសាទនាងខ្មៅ ។
ក្នុងចំណោមព្រះសង្ឃជាង ៣៤០អង្គ បើនិយាយពីកំព្រាស្មើនឹង៩៥ភាគរយ ពោលគឺក្នុង១០០អង្គមានម្តាយ-ឪពុកតែ៥ភាគរយទេ ហើយមានឪពុក-ម្តាយលែងលះគ្នាទៀត ។ នៅក្នុងវត្តប្រាសាទនាងខ្មៅ មានសាលាបង្រៀនថ្នាក់ភាសាបាលីដំបូង និងមានសាលាឆាន់១ខ្នង ៕
ចែករំលែកព័តមាននេះ