ខេត្តព្រះសីហនុ ៖ អាជ្ញាធរខេត្តព្រះសីហនុ បានត្រៀមខ្លួនរួចជាស្រេច សម្រាប់ទទួលស្វាគមន៍ភ្ញៀវទេសចរ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ខាងមុខ ដោយមានរៀបចំតុបតែងកែលម្អសោភ័ណភាពក្រុង-ស្រុក និងតាមតំបន់រមណីយដ្ឋានសំខាន់ៗ ដើម្បីបង្កភាពកក់ក្តៅ…
ខេត្តព្រះសីហនុ ៖ អាជ្ញាធរខេត្តព្រះសីហនុ បានត្រៀមខ្លួនរួចជាស្រេច សម្រាប់ទទួលស្វាគមន៍ភ្ញៀវទេសចរ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ខាងមុខ ដោយមានរៀបចំតុបតែងកែលម្អសោភ័ណភាពក្រុង-ស្រុក និងតាមតំបន់រមណីយដ្ឋានសំខាន់ៗ ដើម្បីបង្កភាពកក់ក្តៅ និងភាពសប្បាយ រីករាយដល់ភ្ញៀវទេសចរជាតិ និងអន្តរជាតិ ដែលមកលេងកម្សាន្ត នៅក្នុងខេត្ត ។
លោក ឡុង ឌីម៉ង់ អភិបាលរង ខេត្តព្រះសីហនុ បានមានប្រសាសន៍ថា ខេត្តព្រះសីហនុ ជាគោលដៅមួយក្នុងចំណោមគោលដៅធំៗ នៃការធ្វើដំណើរកម្សាន្តរបស់ប្រជាពលរដ្ឋ ក្នុងឱកាស នៃពិធីបុណ្យចូលឆ្នាំថ្មីប្រពៃណីជាតិខ្មែរ ។ ដូច្នេះហើយ ទើបលោកអភិបាលខេត្ត បានណែនាំដល់រដ្ឋបាលខេត្តជាពិសេសរដ្ឋបាលក្រុង-ស្រុកទាំង៦ ត្រៀមខ្លួនក្នុងការរៀបចំលំនៅឋានក៏ដូចជាមូលដ្ឋានរបស់ខ្លួន ដើម្បីទទួលស្វាគមន៍ប្រជាជន និងភ្ញៀវទេសចរ ព្រោះពិធីបុណ្យចូលឆ្នាំថ្មីប្រពៃណីជាតិខ្មែរ គឺជាពិធីបុណ្យប្រពៃណីដ៏ល្អផូរផង់ ជាវប្បធម៌ដ៏ល្អរបស់ប្រជាជាតិកម្ពុជា ។
លោកអភិបាលរងខេត្តព្រះសីហនុ បានបន្តថា បច្ចុប្បន្ននេះ បណ្ដាក្រុងស្រុកទាំងអស់ ក៏ដូចជាក្រុងកោះរ៉ុង បានត្រៀមលក្ខណៈសម្បតិ្តរួចជាស្រេច សម្រាប់រៀបចំសង្ក្រាន្ត នៅតាមទីវត្តអារាម តាមសាលារៀនឱ្យបានផុសផុល ដោយនឹងរៀបចំឱ្យមានការលេងល្បែងប្រជាប្រិយ ការរាំលេងកម្សាន្ត រៀបចំជាតំបន់ត្រជាក់ ជាដើម ។
លោក ឡុង ឌីម៉ង់ បញ្ជាក់ថា «ដូច្នេះយើងត្រូវតែរៀបចំភូមិឋានរៀបចំមូលដ្ឋានរបស់យើងឱ្យបានស្អាត ចំណុចទី១ គឺនៅតាមទីវត្តអារាម លោកអភិបាលខេត្ត គឺបានណែនាំទៅដល់អាជ្ញាធរក្រុង-ស្រុកទាំងអស់ ត្រូវរៀបចំវត្តអារាមរបស់ខ្លួនឱ្យបានល្អ ហើយសូមឱ្យគណៈកម្មការអាចារ្យវត្ត គណៈគ្រប់គ្រងវត្តទាំងអស់ត្រៀម ក្នុងការបង្កលក្ខណៈ សប្បាយរីករាយទៅដល់ប្រជាពលរដ្ឋ នៅក្នុងឱកាសនៃពិធីបុណ្យចូលឆ្នាំ ក៏ដូចជាការលេងល្បែងប្រជាប្រិយខ្មែរផងដែរ ។ ជាងនេះទៅទៀត ក៏បានត្រៀមរៀបចំផែនការក្នុងការសម្អាតអនាម័យបរិស្ថាន ពីព្រោះនៅពេលដែលមានភ្ញៀវទេសចរមកច្រើន សំរាមក៏ច្រើនផងដែរ ដូច្នេះត្រូវតែបង្កើនការយកចិត្តទុកដាក់ ទាំងអ្នកសម្អាត ទាំងការដឹកជញ្ជូន ទន្ទឹមនឹងនោះ ក៏ទាមទារឱ្យមានការចូលរួមពីអ្នកមកកម្សាន្តដូចគ្នាផងដែរ ត្រូវចេះទុកដាក់សំរាមរបស់ខ្លួន ហើយយកទៅចោលនៅកន្លែងដែលអាជ្ញាធរ បានកំណត់ទៅតាមពេលវេលា» ។
មួយវិញទៀត រដ្ឋបាលខេត្តព្រះសីហនុ ក៏បានត្រៀមខ្លួនក្នុងការថែរក្សា ការពារសន្តិសុខសណ្ដាប់ធ្នាប់ របៀបរៀបរយ នៅក្នុងក្រុងស្រុកទាំងអស់ ដែលនេះក៏ដូចជាចំណុចសំខាន់ ដើម្បីបង្កភាពកក់ក្តៅនិងភាពសប្បាយ ដល់ប្រជាពលរដ្ឋក៏ដូចជាភ្ញៀវទេសចរ ។
ជាងនេះទៅទៀត លោកអភិបាលរងខេត្តព្រះសីហនុ បានបន្តទៀតថា អាជ្ញាធរខេត្តក៏បានរួមសហការជាមួយវិស័យឯកជន រៀបចំទីលានមួយកន្លែង ស្ថិតនៅក្នុងសង្កាត់៤ ក្រុងព្រះសីហនុ ដើម្បីរៀបចំពិធីទទួលទេវតាឆ្នាំថ្មី និងរៀបចំលេងល្បែងប្រជាប្រិយ សម្រាប់ឱ្យយុវជនក៏ដូចជាភ្ញៀវអន្តរជាតិ ឱ្យចូលរួមលេងល្បែងប្រជាប្រិយខ្មែរទាំងអស់គ្នា ។
លោកអភិបាលរងខេត្តព្រះសីហនុ ក៏បានអំពាវនាវដល់ប្រជាពលរដ្ឋនៅក្នុងខេត្តព្រះសីហនុ រួមគ្នារៀបចំសម្អាតមុខផ្ទះរបស់ខ្លួនឯងឱ្យមានភាពស្រស់ស្អាត ដើម្បីបង្ហាញដល់ភ្ញៀវទេសចរជាតិ និងអន្តរជាតិទាំងអស់ដែលមកលេងកម្សាន្តក្នុងខេត្ត បានដឹងថា ប្រជាពលរដ្ឋ រស់នៅក្នុងខេត្តព្រះសីហនុ គឺមានសណ្ដាប់ធ្នាប់ របៀបរៀបរយ ស្អាតស័ក្តិសមជាប្រជាជនរស់នៅក្នុងទីក្រុងទំនើបនិងស៊ីវិល័យ ៕
ចែករំលែកព័តមាននេះ