ប៉ុន្មានឆ្នាំចុងក្រោយនេះ របាយការណ៍ស្ដីពីការជួញដូរមនុស្ស កម្លាំងពលកម្មដោយបង្ខំ និងការបោកប្រាស់តាមអ៊ីនធឺណិតបានធ្វើឱ្យមានការព្រួយបារម្ភក្នុងចំណោមអាជ្ញាធរ និងរដ្ឋាភិបាលបរទេស ។ កម្ពុជាប្រឈមមុខនឹងការត្រួតពិនិត្យយ៉ាងតឹងតែងជាអន្តរជាតិលើបណ្ដាញបោកប្រាស់តាមអ៊ីនធឺណិត ដែលកំពុងប្រតិបត្តិការនៅក្នុងប្រទេស ។ ហេតុការថ្មីៗនេះ…
ប៉ុន្មានឆ្នាំចុងក្រោយនេះ របាយការណ៍ស្ដីពីការជួញដូរមនុស្ស កម្លាំងពលកម្មដោយបង្ខំ និងការបោកប្រាស់តាមអ៊ីនធឺណិតបានធ្វើឱ្យមានការព្រួយបារម្ភក្នុងចំណោមអាជ្ញាធរ និងរដ្ឋាភិបាលបរទេស ។ កម្ពុជាប្រឈមមុខនឹងការត្រួតពិនិត្យយ៉ាងតឹងតែងជាអន្តរជាតិលើបណ្ដាញបោកប្រាស់តាមអ៊ីនធឺណិត ដែលកំពុងប្រតិបត្តិការនៅក្នុងប្រទេស ។
ហេតុការថ្មីៗនេះ គឺជាស្នូរជួងព្រមានកាន់តែច្បាស់អំពីការកើនឡើងនៃស្ថានភាពនៃការបោកប្រាស់តាមអ៊ីនធឺណិតនៅក្នុងប្រទេសកម្ពុជា។ កាលពីថ្ងៃទី២៤ ខែកុម្ភៈ ឆ្នាំ២០២៥ បន្ទាប់ពីមានការស៊ើបអង្កេតរយៈពេល៣ខែ ដោយប៉ូលិសថៃ លើការដោះដូរទូរស័ព្ទដែលដំណើរការដោយជនជាតិចិននៅកម្ពុជា ដោយមានការសម្របសម្រួលជាមួយអាជ្ញាធរកម្ពុជា ការឆ្មក់ចូលក្រុងប៉ោយប៉ែត ខេត្តបន្ទាយមានជ័យ ដើម្បីស្វែងរកសកម្មភាពបោកប្រាស់តាមប្រព័ន្ធអ៊ីនធឺណេតខុសច្បាប់ដែលមានជនជាតិបរទេសចំនួន២៣០នាក់ ក្នុងនោះមានជនជាតិថៃចំនួន១១៩នាក់ ។
អាជ្ញាធរ កម្ពុជាបាននិរទេសពលរដ្ឋថៃ១១៩នាក់នេះ ទៅប្រទេសកំណើតវិញពីបទឆ្លងដែន និងធ្វើការងារដោយខុសច្បាប់នៅក្នុងប្រទេសកម្ពុជា ក្នុងនោះមានស្ត្រីចំនួន៥៨នាក់ តាមច្រកទ្វារអន្តរជាតិប៉ោយប៉ែត ។ ជនជាតិថៃទាំងនេះបានសារភាពថា ខ្លួនចូលមកកម្ពុជា តាមបណ្ដាញឧក្រិដ្ឋកម្មតាមប្រព័ន្ធអ៊ីនធឺណេត ព្រោះតែពួកគេត្រូវបានទាក់ទាញដោយប្រាក់ខែខ្ពស់ ជាមួយនឹងការលួងលោម «ការងារស្រាល ប្រាក់ខែខ្ពស់»។
គួរកត់សម្គាល់ថា គណៈកម្មាធិការប្រឆាំងការបោកប្រាស់តាមអ៊ីនធឺណិតដែលទើបបង្កើតថ្មី ដឹកនាំដោយសម្ដេចមហាបវរធិបតី នាយករដ្ឋមន្ត្រី ហ៊ុន ម៉ាណែត បានបើកយុទ្ធនាការបង្ក្រាបលើកដំបូងនៅក្នុងខេត្តមណ្ឌលគិរី កាលពីថ្ងៃទី៨ ខែមីនា ។ អាជ្ញាធរបានឆ្មក់ចូលអគារមេគង្គ ៧៤ កម្ពស់ ៨ជាន់ ក្រុងសែនមនោរម្យ ខេត្តមណ្ឌលគិរី ដោយចាប់ខ្លួនជនបរទេស២៥៨ នាក់ ក្នុងនោះជនជាតិចិន២៤៧ នាក់ មីយ៉ាន់ម៉ា ៩នាក់ ម៉ាឡេស៊ី ១នាក់ និងវៀតណាម១នាក់ ។ យុទ្ធនាការនេះធ្វើឡើង បន្ទាប់ពីមានព័ត៌មានមួយបានផ្ញើចូលក្នុងទំព័រហ្វេសប៊ុកផ្លូវការរបស់ក្រសួងមហាផ្ទៃ ដែលបានឈានទៅដល់ការរកឃើញបណ្តាញជនបរទេសដែលធ្វើសកម្មភាពបោកប្រាស់តាមប្រព័ន្ធអ៊ីនធឺណិតនេះ ។
អ្នកនាំពាក្យសាលាខេត្តមណ្ឌលគិរី លោក នាង វណ្ណៈ មានប្រសាសន៍ថា សកម្មភាពបោកប្រាស់តាមប្រព័ន្ធអ៊ីនធឺណេតសម្ងាត់នេះ ត្រូវបានក្លែងបន្លំជាសកម្មភាពវិនិយោគទុនរបស់ពលរដ្ឋចិន ជាពិសេសផ្តោតលើខេត្តមណ្ឌលគិរី ។
របាយការណ៍ និងការតវ៉ាពីក្រុមគ្រួសាររបស់អ្នកដែលធ្វើការនៅមជ្ឈមណ្ឌលបោកប្រាស់នេះ ទៅស្ថានទូតបរទេសនៅកម្ពុជាបានរួមចំណែកយ៉ាងសំខាន់ក្នុងការស្រាវជ្រាវដែលនាំទៅដល់ការលាតត្រដាងពីមជ្ឈមណ្ឌលទាំងនេះ ។ លោកវណ្ណៈ បញ្ជាក់ជាថ្មីពីការប្តេជ្ញាចិត្តរបស់រដ្ឋបាលខេត្តក្នុងការធានាស្ថិរភាព និងសុវត្ថិភាពជូនប្រជាពលរដ្ឋគ្រប់រូប ។ លោកបន្តថា អាជ្ញាធរខេត្តកំពុងរៀបចំប្រតិបត្តិការបង្ក្រាបបន្ថែមទៀត ដោយមានកម្លាំងដាក់ពង្រាយដើម្បីអន្តរាគមន៍ទាន់ពេលវេលា ។
ដោយជនជាតិចិនចាប់អារម្មណ៍កាន់តែខ្លាំង ចំពោះខេត្តមណ្ឌលគិរី អាជ្ញាធរ និងប្រជាពលរដ្ឋក្នុងមូលដ្ឋានមានកង្វល់ និងព្រួយបារម្ភយ៉ាងខ្លាំងចំពោះសន្តិសុខ និងសុវត្ថិភាពក្នុងខេត្ត ។ ចាប់ពីចុងឆ្នាំ២០២៤ រហូតមកដល់ពេលនេះ ចំនួនជនជាតិចិនដែលចូលទៅខេត្តភាគឦសាននៃប្រទេសកម្ពុជា ដែលក្នុងនោះមានខេត្តមណ្ឌលគិរី កំពុងកើនឡើងតាមរយៈគម្រោងវិនិយោគដីសម្បទានសេដ្ឋកិច្ច។ អាជ្ញាធរមូលដ្ឋានមិនអាចចោទបុគ្គលដោយគ្មានភស្តុតាងបានទេ ព្រោះពួកគេតែងបង្ហាញខ្លួនជាអ្នកវិនិយោគ។
យុទ្ធនាការបង្ក្រាបការបោកប្រាស់តាមប្រព័ន្ធអ៊ីនធឺណិត បានបង្កការព្រួយបារម្ភយ៉ាងខ្លាំងអំពីសន្តិសុខ និងសណ្ដាប់ធ្នាប់ក្នុងខេត្តមណ្ឌលគិរី ។ ប្រជាពលរដ្ឋជាច្រើនមានការភ្ញាក់ផ្អើល ដោយសារតែពួកគេតែងតែភ្ជាប់ការឆបោកទាំងនេះជាមួយកន្លែងនានា ដូចជានៅប៉ោយប៉ែត ខេត្តបន្ទាយមានជ័យ បាវិតក្នុងខេត្តស្វាយរៀង អូរស្មាច់ក្នុងខេត្តឧត្តរមានជ័យ និងរាជធានីភ្នំពេញ ។ ឥឡូវនេះ គេអាចគិតថា សកម្មភាពបោកប្រាស់អាចនឹងលាក់ខ្លួននៅភូមិភាគឦសាននៃប្រទេសកម្ពុជា ដូចជាមណ្ឌលគិរី រតនគិរី ជាដើម។
ការកើនឡើងនៃសកម្មភាពបោកប្រាស់តាមអ៊ីនធឺណិតជំរុញឱ្យរដ្ឋាភិបាលមានវិធានការកាន់តែខ្លាំងក្លាយោងតាមសេចក្តីប្រកាសដែលចុះហត្ថលេខាដោយសម្ដេចនាយករដ្ឋមន្ត្រី ហ៊ុន ម៉ាណែត កាលពីថ្ងៃទី២០ ខែកុម្ភៈ ឆ្នាំ២០២៥ រដ្ឋាភិបាលបានបង្កើតគណៈកម្មាធិការពិសេសកម្រិតខ្ពស់មួយ ដើម្បីប្រយុទ្ធប្រឆាំងនឹងការបោកប្រាស់តាមអ៊ីនធឺណិត ដោយផ្តល់ឲ្យគណៈកម្មាធិការនេះនូវសិទ្ធិអំណាចក្នុងការដាក់ពង្រាយកងកម្លាំងប្រដាប់អាវុធ និងមន្ត្រីអនុវត្តច្បាប់ក្នុងប្រតិបត្តិការប្រឆាំងការបោកប្រាស់តាមអ៊ីនធឺណិត ។ គណៈកម្មាធិការនេះនឹងដំណើរការនៅទូទាំងក្រសួង ស្ថាប័ន និងអាជ្ញាធរមូលដ្ឋានដោយមានអំណាចក្នុងការអន្តរាគមន៍ក្នុងករណីចាំបាច់។
សេចក្តីជូនដំណឹងបានពន្យល់ថា «គណៈកម្មាធិការនឹងត្រួតពិនិត្យ តាមដាន និងវាយតម្លៃការអនុវត្តវិធានការប្រឆាំងការបោកប្រាស់តាមអ៊ីនធឺណិតនៅទូទាំងក្រសួង ស្ថាប័ន និងអាជ្ញាធរថ្នាក់ក្រោម គណៈកម្មការក៏នឹងសហការជាមួយបណ្តាប្រទេសពាក់ព័ន្ធ ដើម្បីប្រយុទ្ធប្រឆាំងនឹងការក្លែងបន្លំតាមអ៊ីនធឺណិត និងចាត់វិធានការចាំបាច់ដើម្បីធានាការអនុវត្តប្រកបដោយប្រសិទ្ធភាព» ។
លើសពីនេះ សម្ដេចនាយករដ្ឋមន្ត្រីផ្ទាល់បានសង្កត់ធ្ងន់លើសារៈសំខាន់នៃការប្រុងប្រយ័ត្នក្នុងការប្រឆាំងនឹងការបោកប្រាស់តាមអ៊ីនធឺណិត ហើយបានចែករំលែកបទពិសោធន៍របស់សម្ដេចដើម្បីបញ្ជាក់ថា សូម្បីតែបុគ្គលល្បីៗក៏អាចក្លាយជាគោលដៅបានដែរ។ សម្ដេចបានផ្តាំផ្ញើដល់អាជ្ញាធរត្រូវពង្រឹងវិធានការបង្ការការពារដល់សាធារណជន។
លោកជំទាវ ជូ ប៊ុនអេង អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងការជួញដូរមនុស្សបានចាត់ទុកការបង្កើតគណៈកម្មាធិការមួយដើម្បីប្រយុទ្ធប្រឆាំងនឹងការក្លែងបន្លំ ការបោកប្រាស់តាមប្រព័ន្ធអ៊ីនធឺណិត ជាកង្វល់របស់រដ្ឋាភិបាល។ លោកជំទាវ មានប្រសាសន៍ថា បច្ចុប្បន្នកម្ពុជាមានគណៈកម្មាធិការជាតិដើម្បីប្រយុទ្ធប្រឆាំងនឹងការជួញដូរមនុស្ស ប៉ុន្តែការក្លែងបន្លំ និងការបោកប្រាស់តាមប្រព័ន្ធអ៊ីនធឺណិតមានភាពស្មុគស្មាញ ដូច្នេះចាំបាច់ត្រូវបង្កើតគណៈកម្មាធិការថ្មីមួយ។
ចំណាត់ការនេះបង្ហាញពីការយកចិត្តទុកដាក់កាន់តែខ្លាំងឡើងរបស់រដ្ឋាភិបាលកម្ពុជាលើការដោះស្រាយឧក្រិដ្ឋកម្មតាមអ៊ីនធឺណិត ដែលកំពុងតែក្លាយជាការព្រួយបារម្ភកាន់តែខ្លាំងឡើងនៅក្នុងតំបន់ និងឆ្លុះបញ្ចាំងពីជំហរនយោបាយរបស់រដ្ឋាភិបាល ដែលការបោកប្រាស់តាមអ៊ីនធឺណិតចាំបាច់ត្រូវតែដោះស្រាយ ។ អ្នកសង្កេតការណ៍មួយចំនួនបានស្វាគមន៍ចំពោះការប្តេជ្ញាចិត្តរបស់រដ្ឋាភិបាល និងគាំទ្រការបង្កើតគណៈកម្មាធិការនេះ ដោយព្រមានថា ការបោកប្រាស់តាមប្រព័ន្ធអ៊ីនធឺណិតបានប៉ះពាល់យ៉ាងធ្ងន់ធ្ងរដល់កំណើនសេដ្ឋកិច្ចរបស់ប្រទេសកម្ពុជា រួមទាំងការវិនិយោគផងដែរ។
បច្ចុប្បន្ន កម្ពុជាក៏កំពុងស្វែងរកការពង្រឹងកិច្ចសហប្រតិបត្តិការអន្តរជាតិ ដែលបានបង្ហាញតាមរយៈកិច្ចខិតខំប្រឹងប្រែងរួមគ្នាជាមួយប្រទេសឥណ្ឌា ថៃ វៀតណាមជាដើម។ ដើម្បីផ្លាស់ប្តូរព័ត៌មានអំពីបណ្តាញបោកប្រាស់តាមអ៊ីនធឺណិតដែលសង្ស័យ និងពង្រឹងកិច្ចសហប្រតិបត្តិការអនុវត្តច្បាប់ ៕ សហការ
ចែករំលែកព័តមាននេះ