ថៃ ៖ ការដ្ឋានសាងសង់ផ្លូវអាកាស រាមាទី២ ពិតជាមានភាពល្បីរន្ទឺទូទាំងប្រទេសថៃ ដោយសារការសាងសង់គ្មានទីបញ្ចប់ អូសបន្លាយ ពេលអស់ជាង៥០ឆ្នាំមកហើយនៅឡើយ តែមិនទាន់រួចរាល់ជាស្ថាពរ ជាពិសេសការដ្ឋានសាងសង់មួយនេះតែងតែកើតមានគ្រោះចង្រៃ…
ថៃ ៖ ការដ្ឋានសាងសង់ផ្លូវអាកាស រាមាទី២ ពិតជាមានភាពល្បីរន្ទឺទូទាំងប្រទេសថៃ ដោយសារការសាងសង់គ្មានទីបញ្ចប់ អូសបន្លាយ ពេលអស់ជាង៥០ឆ្នាំមកហើយនៅឡើយ តែមិនទាន់រួចរាល់ជាស្ថាពរ ជាពិសេសការដ្ឋានសាងសង់មួយនេះតែងតែកើតមានគ្រោះចង្រៃ ចៃដន្យជាញឹកញាប់ ដោយបានឆ.ក់យកជីវិតកម្មករ និងអ្នកដំណើររាប់រយនាក់រហូតត្រូវបានគេដាក់រហ័សនាមឱ្យថា «ផ្លូវនរក៧ជាន់» ។
ចម្ងល់ដែលស្ថិតក្នុងចិត្តមនុស្សគ្រប់គ្នា គឺថា តើការដ្ឋានមួយនេះ ពិតជាជើងកប់ដូចគេល្បី ឬត្រូវបណ្តាសាអ្វីអោយប្រាកដ? ដើម្បីស្រាយចម្ងល់ដែលបន្សល់ទុកក្នុងចិត្ត អស់ជាច្រើនឆ្នាំមកហើយនោះ នៅថ្ងៃទី១៨ ខែមីនា ឆ្នាំ២០២៥ សារព័ត៌មានខៅសធ បានទម្លាយចេញនូវរឿងព្រេងនិទានបែបអបិយជំនឿមួយដែលពាក់ព័ន្ធរវាងស្តេចពស់វែកមួយគ្រួសារ និងការដ្ឋានសាងសង់ផ្លូវអាកាសរាមាទី២ ។ សារព័ត៌មានខៅសធ បញ្ជាក់ថា ក្រោយពីកើតឧប្បទវហេតុដ៏រន្ធត់ចុងក្រោយកាលពីថ្ងៃសៅរ៍ ចុងសប្តាហ៍នៅក្នុងការដ្ឋានសាងសង់ផ្លូវអាកាសរាមាទី២ ដែលបណ្តាលឱ្យមានកម្មករជាង៣០នាក់ស្លា.ប់ និងរបួសនោះ អ្នកសារព័ត៌មានរបស់ខ្លួនបានចុះទៅដល់ទីសក្ការបូជា របស់ស្តេចពស់វែកដ៏សាកសិទ្ធមួយកន្លែងដែលមានអាស្រមនៅជាប់នឹងបណ្តោយផ្លូវអាកាសល្បឿនលឿន រាមាទី២ ក្នុងខណ្ឌ Bang Khun Thian ទីក្រុងបាងកក ដោយបានជួបសម្ភាសន៍ជាមួយសាក្សីរស់មួយរូប ដែលចងចាំច្បាស់អំពីសាច់រឿងរបស់ស្តេចពស់វែក ។
អ្នកស្រី ម៉ានី រ៉ាត់ អាយុ៥៨ឆ្នាំ ដែលរស់នៅទីនេះជាង៣០ឆ្នាំហើយ បានអះអាងប្រាប់អ្នកយកព័ត៌មានរបស់គេហទំព័រKhaosod ថា តាមការដំណាលរបស់អ្នកស្រុកនៅទីនោះ គឺថា មុនពេលចាប់ផ្តើមសាងសង់ផ្លូវ ក្រុមកម្មករបានបើកបរគ្រឿងចក្រមកទុកនៅទីតាំងខាងលើនេះត្រៀមឈូសឆាយដីព្រៃ ដើម្បីបើកការដ្ឋាននៅថ្ងៃស្អែក ។ លុះយប់ឡើងនៅពេលកម្មករបើកគ្រឿងចក្រចូលដេក គាត់យល់សុបិនឃើញថា មានស្តេចពស់ស្រីមួយក្បាល មកសុំអង្វរកុំទាន់អោយឈូសឆាយទីតាំងនេះអី ព្រោះពេលនេះពងនៅក្នុងសម្បុករបស់ខ្លួនមិនទាន់ញាស់ទេ ប៉ុន្តែជិតញាស់ហើយ ដោយសន្យាថា ពេលណាកូនៗរបស់ខ្លួនញាស់ចេញមកគាត់នឹងនាំកូនៗផ្លាស់សម្បុកទៅកន្លែងផ្សេង ហើយចាំឈូសឆាយទៅ ។
ប៉ុន្តែក្រោយពីដេកយល់សប្តិបែបនេះ កម្មករបើកគ្រឿងចក្ររូបនោះ គិតថា វាគ្រាន់តែជាការយល់សប្តិតែប៉ុណ្ណោះ ។ ដូច្នេះ នៅព្រឹកឡើងដល់ពេលកំណត់ គាត់ក៏បានបើកគ្រឿងចក្រឈូសឆាយធម្មតា កម្ទេចសម្បុករបស់ពស់នោះ ។
ក្រោយមកមានដំណឹងថា មនុស្សមួយគ្រួសាររបស់កម្មកររូបនោះជួបគ្រោះថ្នាក់ស្លា.ប់ទាំងអស់គ្មានសល់សូម្បីតែម្នាក់ ។ ទើបធ្វើឱ្យអ្នកស្រុកនៅទីនោះលើកឡើងតៗគ្នាថា ជាបណ្តាសារបស់ស្តេចពស់ ព្រោះតែកំហឹងនៃការកម្ទេចសម្បុក និងសម្លា.ប់កូនៗរបស់ខ្លួន ។
អ្នកស្រី ម៉ានី រ៉ាត់ បន្តថា ចាប់តាំងពីកើតរឿងនោះមក វាក៏ក្លាយជាជំនឿដែលបន្សល់ទុកមកដល់បច្ចុប្បន្ន ហើយជាក់ស្តែងកំឡុងពេលដែលដំណើរសាងសង់ផ្លូវអាការ Rama 2 គាត់តែឃើញទាំងមន្ត្រី ទាំងវិស្វករ ក៏ដូចជា កម្មករ ដែលមានជំនឿ តែងតែមកគោរពបន់ស្រន់នៅអាស្រមស្តេចពស់ លើសពីនេះយើងតែងឃើញឧបទ្ទវហេតុគ្រោះថ្នាក់រន្ធត់តែងតែបានកើតឡើងជាច្រើនលើកច្រើនសារ ហើយការសាងសង់នៅតែបន្តមិនចេះចប់ ។
សូមជម្រាបថា ផ្លូវរាមាទី២ បានចាប់ផ្តើមសាងសង់ក្នុងកំឡុងឆ្នាំ ១៩៧០ ហើយបញ្ចប់ និងបើកជាផ្លូវការនៅថ្ងៃទី១ ខែមេសា ឆ្នាំ១៩៧៣ ជាផ្លូវសំខាន់ឆ្ពោះទៅកាន់តំបន់ភាគខាងត្បូង ។ ក្រោយមកពេលមានមនុស្សធ្វើដំណើរតាមផ្លូវនោះច្រើនបានបង្កឱ្យមានការសាងសង់ពង្រីក និងផ្លូវបំបែកជាច្រើន រួមទាំងការជួសជុលផ្លូវជាបន្តបន្ទាប់ ដែលមកដល់ឆ្នាំ២០២៥នេះ ការដ្ឋានសាងសង់កំពុងដំណើរមិនទាន់ចប់នៅឡើយទេ ប៉ុន្តែរដ្ឋមន្ត្រីថ្មីរបស់ថៃ បានប្រកាសកាលពីចុងឆ្នាំ២០២៤ថា ការដ្ឋានមួយនេះគ្រោងនឹងបញ្ចប់ទាំងស្រុងត្រឹមតែមិថុនា ឆ្នាំ២០២៥ ៕
ចែករំលែកព័តមាននេះ