អន្តរជាតិ ៖ តម្លៃមាសបានទម្លុះរបាំង ៣,០០០ដុល្លារក្នុង១អោនជាលើកដំបូងក្នុងប្រវត្តិសាស្ត្រ កាលពីថ្ងៃទី១៤ ខែមីនា ឆ្នាំ២០២៥ ខណៈដែលបណ្តាអ្នកវិនិយោគបានសម្រុកវិនិយោគលើលោហៈធាតុដ៏មានតម្លៃមួយនេះ ចំពេលមានភាពមិនប្រាកដប្រជាសេដ្ឋកិច្ចសកល បង្កឡើងដោយសង្គ្រាមពន្ធរបស់ប្រធានាធិបតីសហរដ្ឋអាមេរិក…
អន្តរជាតិ ៖ តម្លៃមាសបានទម្លុះរបាំង ៣,០០០ដុល្លារក្នុង១អោនជាលើកដំបូងក្នុងប្រវត្តិសាស្ត្រ កាលពីថ្ងៃទី១៤ ខែមីនា ឆ្នាំ២០២៥ ខណៈដែលបណ្តាអ្នកវិនិយោគបានសម្រុកវិនិយោគលើលោហៈធាតុដ៏មានតម្លៃមួយនេះ ចំពេលមានភាពមិនប្រាកដប្រជាសេដ្ឋកិច្ចសកល បង្កឡើងដោយសង្គ្រាមពន្ធរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump)។
ប្រភពពីទីភ្នាក់ងារសារព័ត៌មាន Reuters បានរាយការណ៍ថា តម្លៃមាសបានហក់ឡើងខ្ពស់បំផុតមិនធ្លាប់មានក្នុងប្រវត្តិសាស្ត្រ ៣,០០៤.៨៦ដុល្លារអាមេរិកក្នុង១អោន ឬស្មើនឹង ៣,៦២៣ដុល្លារក្នុង១តម្លឹង នៅក្នុងការជួយដូរកាលពីថ្ងៃទី១៤ ខែមីនា ឆ្នាំ២០២៥ មុនពេលធ្លាក់មកនៅត្រឹម ២,៩៨៦.៦៥ដុល្លារក្នុង១អោន ឬ ៣,៥៩៥ដុល្លារក្នុង១តម្លឹង គិតត្រឹមរសៀលថ្ងៃទី១៦ ខែមីនា ឆ្នាំ២០២៥។
លោក Tai Wong ពាណិជ្ជករមាសឯករាជ្យបានថ្លែងថា ការកើនឡើងតម្លៃមាសលើសពី ៣,០០០ដុល្លារក្នុង១អោន ត្រូវបានជំរុញដោយការបារម្ភពីសំណាក់បណ្តាអ្នកវិនិយោគលើបញ្ហាសេដ្ឋកិច្ចសកល ហើយកំពុងតែបង្វែរ និងបង្កើនការផ្តោតទៅលើលោហៈធាតុមាស ដែលជាទ្រព្យសម្បត្តិដ៏មានសុវត្ថិភាពបំផុត អំឡុងស្ថានភាពពិភពលោកបច្ចុប្បន្ន ដែលកំពុងគ្របដណ្តប់លើភាពចលាចលរបស់លោក ត្រាំ ទៅលើទីផ្សារភាគហ៊ុន និងផលប៉ះពាល់ខ្លាំងនៃសង្គ្រាមពន្ធរបស់ប្រធានាធិបតីអាមេរិកលើកទី៤៧រូបនេះ។
ការកើនឡើងតម្លៃមាស ក៏ត្រូវបានជំរុញដោយតម្រូវការពីបណ្តាធនាគារកណ្តាលពិភពលោកផងដែរ ដោយនៅក្នុងចំណោមនោះ ធនាគារកណ្តាលរបស់ចិនបានបង្កើនការទិញមាសស្តុកទុកក្នុងរយៈពេលបួនខែជាប់គ្នា បើទោះបីជាតម្លៃស្ថិតនៅកម្រិតខ្ពស់យ៉ាងណាក៏ដោយ។
ប្រភពពីទស្សនាវដ្តីពាណិជ្ជកម្ម Forbes ក៏បានរាយការណ៍ដែរថា ការផ្លាស់ប្តូរដ៏ធំបំផុតនៅក្នុងទីផ្សារមាសក្នុងរយៈពេលប៉ុន្មានឆ្នាំចុងក្រោយនេះ ជំរុញដោយតម្រូវការកើនឡើងពីបណ្តាធនាគារកណ្តាលពិភពលោក។ យោងតាមក្រុមប្រឹក្សាមាសពិភពលោក បណ្តាធនាគារកណ្តាលពិភពលោកបានទិញមាសជាង ១,០០០តោនក្នុងឆ្នាំ ២០២៤ ដែលជាឆ្នាំទី ៣ ជាប់ៗគ្នានៃការទិញមាសស្តុកទុកដ៏សំខាន់ និងប្រហែលទ្វេដងនៃការទិញប្រចាំឆ្នាំជាមធ្យមសម្រាប់រយៈពេល១០ឆ្នាំមុន។ ការទិញមាសពីបណ្តាធនាគារកណ្តាលពិភពលោកបានបន្តនៅឆ្នាំនេះ នាំមុខដោយប្រទេសអ៊ូសបេគីស្ថាន ចិន កាហ្សាក់ស្ថាន ប៉ូឡូញ និងឥណ្ឌា ជាដើម។
លោក David Russell នាយកប្រតិបត្តិក្រុមហ៊ុន GoldCore បានថ្លែងថា បណ្តាធនាគារកណ្តាលជុំវិញពិភពលោកបានបន្តការទិញមាសក្នុងកម្រិតជាកំណត់ត្រា ដោយស្វែងរកការធ្វើពិពិធកម្មឆ្ងាយពីប្រាក់ដុល្លារអាមេរិក ដែលកំពុងប្រែប្រួលតម្លៃជាបន្តបន្ទាប់៕
ចែករំលែកព័តមាននេះ