រាជធានីភ្នំពេញ ៖ យោងតាមព័ត៌មានផ្លូវការណ៍របស់នាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ស្តីពីការចាប់ខ្លួនជនជាតិចិន៧ នាក់(ប៉ុន្តែជនពាក់ពន្ធ៤នាក់) ករណីយកសាកសពទៅប្លុងចោលនៅចំការស្វាយចន្ទី ស្រុកពញាក្រែក ខេត្តត្បូងឃ្មុំ ដឹងការពិតហើយគឺជាករណី«លាក់បាំងសាកសព»…
រាជធានីភ្នំពេញ ៖ យោងតាមព័ត៌មានផ្លូវការណ៍របស់នាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ស្តីពីការចាប់ខ្លួនជនជាតិចិន៧ នាក់(ប៉ុន្តែជនពាក់ពន្ធ៤នាក់) ករណីយកសាកសពទៅប្លុងចោលនៅចំការស្វាយចន្ទី ស្រុកពញាក្រែក ខេត្តត្បូងឃ្មុំ ដឹងការពិតហើយគឺជាករណី«លាក់បាំងសាកសព» ។
ព័ត៌មាននាយកដ្ឋាននគរបាលព្រហ្មទណ្ឌ បានបញ្ជាក់ថា កាលពីថ្ងៃទី២ ខែមីនា ឆ្នាំ២០២៥ វេលាម៉ោង១៦ និង៣០នាទី មានករណីប្រទះឃើញសាកសពបុរសម្នាក់ជាជនជាតិចិន នៅចំណុចចំការស្វាយចន្ទីមួយកន្លែង ស្ថិតក្នុងភូមិត្រពាំងផ្លុងទី២ ឃុំត្រពាំង ផ្លុង ស្រុកពញាក្រែក ខេត្តត្បូងឃ្មុំ ។
ក្រោយពីមានហេតុការណ៍ខាងលើនោះកើតឡើង ដោយអនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ កម្លាំងជំនាញរបស់នាយកដ្ឋាននគរបាលព្រហ្មទណ្ឌ ដឹកនាំដោយលោកឧត្តមសេនីយ៍ត្រី ហ៊ុន មុន្នីរ័ត្ន លោកវរសេនីយ៍ឯក ហែម បូណា និងលោកវរសេនីយ៍ឯក ឆាន់ គីមលី អនុប្រធាននាយកដ្ឋាន បានចុះទៅសហការជាមួយ ស្នងការដ្ឋាននគរបាលខេត្តត្បូងឃ្មុំ និងខេត្តព្រះសីហនុ ធ្វើការស្រាវជ្រាវតាមនីតិវិធី និងជំនាញ យ៉ាងយកចិត្តទុកដាក់ ដោយកំណត់បានអត្តសញ្ញាណ និងទីតាំងលាក់ខ្លួនរបស់ក្រុមមនុស្សមួយចំនួនដែលពាក់ពន្ធ យកសាកសពទៅកប់ចោលដោយពុំបានរាយការណ៍ជូនសមត្ថកិច្ច ។
លុះនៅថ្ងៃទី១៣ ខែមីនា ឆ្នាំ២០២៥ វេលាម៉ោង១២ និង១០ នាទី កម្លាំងជំនាញបានបន្តសហការដោយធ្វើការឃាត់ខ្លួនបានជនសង្ស័យចំនួន៧ នាក់ ។ ក្រោយពីឃាត់ខ្លួនជនសង្ស័យទាំង៧ នាក់យកទៅសាកសួរ គឺមានតែ៤ នាក់ទេដែលជាប់ពាក់ពន្ធបទល្មើស ៖
១-ឈ្មោះ XIAO LIN ភេទប្រុស អាយុ២៦ ឆ្នាំ ជនជាតិចិន
២-ឈ្មោះ XU NINGXUN ភេទប្រុស អាយុ៣០ ឆ្នាំ ជនជាតិចិន
៣-ឈ្មោះ SAI AUNG KHAY ភេទប្រុស អាយុ១៩ ឆ្នាំ ជនជាតិមីយ៉ាន់ម៉ា
៤-ឈ្មោះ ANGTA AILAI ភេទប្រុស អាយុ២៣ ឆ្នាំ ជនជាតិមីយ៉ាន់ម៉ា ។
ជនសង្ស័យទាំង៤ នាកបានឆ្លើយសារភាពប្រហាក់ប្រហែលគ្នាថា កាលពីថ្ងៃទី២៧ ខែមីនា ឆ្នាំ២០២៥ ពួកគេពិតជាបានធ្វើ សកម្មភាព ដឹកជនរងគ្រោះដែលធ្លាក់ពីលើអគារមួយកន្លែងនៅខេត្តត្បូងឃ្មុំ ស្លាប់តាមផ្លូវ ហើយក៍ដឹកសាកសពយកទៅកប់នៅ ក្នុងចំការស្វាយចន្ទី ស្ថិតភូមិត្រពាំងផ្លុងទី២ ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ ប្រាកដមែន ។ ចំណែកឯមនុស្សចំនួន៣ នាក់ទៀត គឺមិនមានការជាប់ពាក់ពន្ធក្នុងករណីខាងលើនេះទេ ។
ក្រោយបញ្ចប់ការសួរនាំ ជនដៃដល់៤ នាក់ត្រូវបាននាយកដ្ឋាននគរបាលព្រហ្មទណ្ឌ ប្រគល់ជូនស្នងការដ្ឋាននគរបាលខេត្តត្បូងឃ្មុំ ដើម្បីចាត់ការបន្ដតាមនីតិវិធី ៕
ចែករំលែកព័តមាននេះ