ទីក្រុងចូហាន់ណេស្បឺក៖ ប្រធានាធិបតីអាហ្វ្រិកខាងត្បូងសម្ដែងការសោកស្ដាយដែលអាមេរិកប្រកាសបណ្ដេញឯកអគ្គរដ្ឋទូតរបស់លោកចេញពីទីក្រុងវ៉ាស៊ីនតោនក្រោមហេតុផលថាទូតរូបនេះរើសអើងជាតិសាសន៍អាមេរិក និងស្អប់លោកត្រាំ។ អាហ្រ្វិកខាងត្បូងបញ្ជាក់ថាខ្លួននៅតែមានឆន្ទៈចង់បន្តទំនាក់ទំនងជាមួយអាមេរិកដើម្បីទទួលបានផលប្រយោជន៍ទាំងអស់គ្នា។
សេចក្ដីថ្លែងការណ៍របស់ប្រធានាធិបតីអាហ្វ្រិកខាងត្បូង លោករ៉ាម៉ាហ្វូសា បានផ្សព្វផ្សាយនៅលើគេហទំព័រផង និងនៅលើបណ្ដាញអ៊ិចផង។ លោកអំពាវនាវឱ្យភាគីពាក់ព័ន្ធទាំងអស់រក្សាអាកប្បករិយាសមរម្យក្នុងនាមជាអ្នកការទូត។
ទំនាក់ទំនងអាមេរិក និងអាហ្វ្រិកខាងត្បូងចាប់ផ្ដើមធ្លាក់ចុះខ្លាំងចាប់តាំងពីលោកត្រាំកាត់ផ្ដាច់ជំនួយហិរញ្ញវត្ថុសម្រាប់អាហ្វ្រិកខាងត្បូងក្រោមហេតុផលថាប្រទេសនេះមានគោលនយោបាយដីធ្លីមិនត្រឹមត្រូវ។ ម៉្យាងទៀត អាហ្វ្រិកខាងត្បូងដាក់ពាក្យប្ដឹងឱ្យអាយស៊ីស៊ី (ICC) ចាប់លោកណឺតាន់យ៉ាហ៊ូយកទៅកាត់ទោសនៅទីក្រុងឡាអេពីបទប្រល័យពូជសាសន៍។
អាមេរិកចាត់ទុកថាទូតរូបនេះជាអ្នកនយោបាយមានចរិតរើសអើងជាតិសាសន៍។ គាត់ស្អប់អាមេរិក និងលោកត្រាំ។ ដូច្នេះទុកនៅធ្វើអ្វីទៀតត្រូវតែបណ្ដេញចេញ។ ខាងលើនេះជាសម្ដីរាជសីហ៍របស់រដ្ឋមន្ត្រីការបរទេសអាមេរិក ម៉ាកូ រូប៊ីយ៉ូ។ លោកម៉ាកូបង្ហោះនៅលើបណ្ដាញអ៊ិចថាអាមេរិកមិនត្រូវការស្វាគមន៍លោកឯកអគ្គរដ្ឋទូតអាហ្វ្រិកខាងត្បូងរូបនេះតទៅទៀតទេ។ យើងមិនត្រូវពិភាក្សាអ្វីជាមួយគាត់ទេ ហើយជាមនុស្សដែលអាមេរិកលែងស្វាគមន៍ឱ្យជាន់លើទឹកដីរបស់ខ្លួនតទៅទៀត។
ប្រភពខ្លះបង្ហើបឱ្យដឹងថាចាប់តាំងពីលោកត្រាំឡើងកាន់អំណាច ឯកអគ្គរដ្ឋទូតអាហ្វ្រិកខាងត្បូងរូបនេះពុំដែលបានចូលរួមប្រជុំជាមួយមន្ត្រីរដ្ឋាភិបាលអាមេរិកនៅក្រសួងការបរទេស និងមន្ត្រីអាមេរិកសំខាន់ៗទេ ឱ្យតែខ្សែខាងបក្សសាធារណរដ្ឋគឺទូតរូបនេះមិនដែលជួបសោះ។ ប្រភពខ្លះថាលោកឯកអគ្គរដ្ឋទូតរូបនេះមានទំនោរគាំទ្រពួកប៉ាឡេស្ទីន និងរិះគន់អ៊ីស្រាអែលឥតសំចៃមាត់។ នេះជាមូលហេតុធំដែលធ្វើឱ្យលោកត្រាំមានកំហឹង៕
ចែករំលែកព័តមាននេះ