ទីក្រុងម៉ូស្គូ៖ តបតាមសំណូមពររបស់លោកត្រាំដែលមិនចង់ឃើញការបង្ហូរឈាមគ្នារវាងរុស្ស៊ី និងអ៊ុយក្រែនតទៅទៀត លោកពូទីនប្រកាសថាកងទ័ពអ៊ុយក្រែនដែលនៅសេសសល់ទាំងប៉ុន្មាននៅតំបន់ខឺស និងដែលកំពុងជាប់នៅក្នុងការឡោមព័ទ្ធនោះពួកគេត្រូវលើកដៃសូមចុះចាញ់។ លោកនឹងទុកជីវិតឱ្យពួកគេ។ ប៉ុន្តែមិនមែនមានន័យថាឱ្យពួកគេរួចខ្លួន វិលទៅផ្ទះវិញទេ ត្រូវចាប់ធ្វើជាឈ្លើយសឹក ឬត្រូវកាត់ទោសពីបទចោទប្រកាន់ផ្សេងៗ។ គ្រាន់តែមិនសម្លាប់ចោលតែប៉ុណ្ណោះ។
លោកពូទីនសង្កត់ធ្ងន់ថាមេដឹកនាំរបស់ពួកគេ (អ៊ុយក្រែន) ត្រូវប្រាប់កូនចៅរបស់ខ្លួននៅខឺសទម្លាក់អាវុធ និងលើកដៃចុះចាញ់ដើម្បីជៀសវាងការបាត់បង់ជីវិតយុទ្ធជនរបស់ខ្លួន។ ប៉ុន្តែអ៊ុយក្រែនមិនទទួលស្គាល់ថាខ្លួនកំពុងរងហានិភ័យនៅខឺសទេ។ ទីក្រុងកៀវទទួលស្គាល់ថាស្ថានការណ៍សឹកនៅខឺសកំពុងពិបាកខ្លាំង។ កងទ័ពរបស់ខ្លួនរងការវាយប្រហារខ្លាំងពីរុស្ស៊ី។
ប៉ុន្តែកៀវថានោះជាការដកថយតាមយុទ្ធសាស្ត្រសង្គ្រាមតែប៉ុណ្ណោះ។ ផ្ទុយទៅវិញ រុស្ស៊ីអះអាងថាកងទ័ពអ៊ុយក្រែនត្រូវខ្លួនវាយបំបែកជាចម្រៀកៗ និងនៅដាច់ៗពីគ្នា។ ម៉្យាងទៀត រុស្ស៊ីប្រកាសពីការរំដោះបានទីក្រុងទាំងអស់មកវិញផងដែរ។ កាលពីម្សិលមិញ លោកពូទីនប្រកាសជម្រើសពីរសម្រាប់ពួកគេ «លើកដៃចុះចាញ់, បើមិនដូច្នេះទេមានតែផ្លូវមរណៈប៉ុណ្ណោះ»។
កាលពីយប់មិញ លោកត្រាំបង្ហោះសារនៅលើបណ្ដាញសង្គមថាលោកស្នើឱ្យលោកពូទីនអនុគ្រោះទុកជីវិតឱ្យយុទ្ធជនអ៊ុយក្រែនរាប់ពាន់នាក់។ យោងតាមលោកត្រាំ អ្នកទាំងនោះត្រូវរុស្ស៊ីព័ទ្ធជាប់អស់ហើយ ហើយអាចប្រឈមនឹងសេចក្ដីស្លាប់គ្រប់ពេលវេលា។
នៅពេលនិយាយដល់រឿងនេះធ្វើឱ្យគេនឹកឃើញទៅដល់ករណីដែលកងទ័ពអាល្លឺម៉ង់ជាង៣០ម៉ឺននាក់ត្រូវជាប់នៅក្នុងការឡោមព័ទ្ធនៅទីក្រុងស្តាលីនក្រាត (Stalingrad) (បច្ចុប្បន្នដូរឈ្មោះទៅជាវ៉ុលហ្គោក្រាត – Volgograd) កាលពីអំឡុងសង្គ្រាមលោកលើកទី២។ ពួកគេមិនអាចតស៊ូបានយូរឡើយ នៅទីបំផុតគឺមានតែលើកដៃសូមចុះចាញ់រុស្ស៊ីតែប៉ុណ្ណោះ។
ប្រភពខ្លះថាមុននឹងឈានដល់ការមានជ័យជម្នះលើអ៊ុយក្រែននៅខឺសនោះ កងទ័ពរុស្ស៊ីបានដើរតាមបំពង់បង្ហូរឧស្ម័នចម្ងាយជាងដប់គីឡូម៉ែត្រដើម្បីវាយឆ្មក់ពីក្រោយខ្នង និងកាត់ផ្ដាច់ខ្សែការពាររបស់អ៊ុយក្រែន។ កាលពីពេលវាយកងទ័ពអាល្លឺម៉ង់ក៏ស្រដៀងគ្នាដែរ។ កាលនោះ ពេលខ្លះកងទ័ពសូវៀតហែលនៅក្នុងលូទឹកស្អុយទៅវាយអាល្លឺម៉ង់ពីក្រោយខ្នង។
លោកត្រាំស្នើសុំយ៉ាងទទូចឱ្យលោកពូទីនទុកជីវិតឱ្យពួកគេ។ បើមិនដូច្នេះទេនឹងក្លាយជាការកាប់សម្លាប់ដ៏ធំមិនធ្លាប់មានចាប់តាំងពីក្រោយសង្គ្រាមលោកលើកទី២។ នៅក្នុងកិច្ចប្រជុំក្រុមប្រឹក្សាសន្តិសុខជាតិ លោកពូទីនមិនជំទាស់នឹងបំណងល្អរបស់ត្រាំទេ។ លោកថាកងទ័ពទាំងនោះបានប្រព្រឹត្តឧក្រិដ្ឋកម្មទៅលើជនស៊ីវិលប្រៀបបាននឹងអំពើភេរវកម្មដូច្នោះដែរ។ ប៉ុន្តែលោកក៏មិនចង់មានរឿងវែងឆ្ងាយជាមួយពួកគេដែរ។ លោកយល់ចិត្តរបស់លោកត្រាំដែលគិតគូរអំពីបញ្ហាមនុស្សធម៌។
លោកពូទីនបញ្ជាក់ថាបើពួកគេទម្លាក់អាវុធសូមចុះចាញ់ លោកធានាថានឹងទុកជីវិតឱ្យពួកគេ និងជួយយកអាសាពួកគេស្របទៅតាមច្បាប់អន្តរជាតិ និងច្បាប់របស់ប្រទេសរុស្ស៊ី។ តបតាមការអំពាវនាវរបស់លោកត្រាំ លោកពូទីនយល់ថាមេធំៗរបស់អ៊ុយក្រែននៅទីក្រុងកៀវត្រូវតែប្រាប់កងទ័ពទាំងនោះដាក់អាវុធសូមចុះចាញ់។ អនុប្រធានក្រុមប្រឹក្សាសន្តិសុខជាតិរុស្ស៊ីបង្ហោះនៅលើបណ្ដាញសង្គមថាបើកងទ័ពទាំងនោះមិនទម្លាក់អាវុធចុះទេ យើងត្រូវតែកម្ទេចពួកគេចោលឱ្យអស់។
ងាកទៅស្ដាប់ពីខាងអ៊ុយក្រែនវិញម្ដង។ នាយអគ្គសេនាធិការកងទ័ពអ៊ុយក្រែនបានបដិសេធព័ត៌មានដែលថាកងទ័ពខ្លួនអស់ផ្លូវដើរហើយនៅពេលនេះ ហើយកំពុងជាប់នៅក្នុងការឡោមព័ទ្ធ។ លោកចាត់ទុកថានោះជាព័ត៌មានក្លែងក្លាយដែលប្រឌិតឡើងដោយរុស្ស៊ីដើម្បីក្រឡុកស្ថានការណ៍នយោបាយ និងដើម្បីដាក់សម្ពាធទៅលើអ៊ុយក្រែន និងប្រទេសជាដៃគូរបស់អ៊ុយក្រែនតែប៉ុណ្ណោះ៕
ចែករំលែកព័តមាននេះ