ដោយសារតែការសង្ស័យអំពីទំនាក់ទំនងរវាង Power Bank ដែលគេស្គាល់ថា ថ្មចល័ត នឹងឧបត្តិហេតុឆេះយន្តហោះជាបន្តបន្ទាប់នៅកូរ៉េខាងត្បូង ក្រុមហ៊ុនអាកាសចរណ៍នៅអាស៊ីមួយចំនួនបានចេញបម្រាម ឬការដាក់កម្រិតលើការប្រើប្រាស់វានៅលើយន្តហោះជាបណ្តើរៗ។ តាមសេចក្តីរាយការណ៍និងសេចក្តីប្រកាសដោយក្រុមហ៊ុនអាកាសចរណ៍នានាបានឲ្យដឹងថា រហូតមកដល់ពេលនេះ…
ដោយសារតែការសង្ស័យអំពីទំនាក់ទំនងរវាង Power Bank ដែលគេស្គាល់ថា ថ្មចល័ត នឹងឧបត្តិហេតុឆេះយន្តហោះជាបន្តបន្ទាប់នៅកូរ៉េខាងត្បូង ក្រុមហ៊ុនអាកាសចរណ៍នៅអាស៊ីមួយចំនួនបានចេញបម្រាម ឬការដាក់កម្រិតលើការប្រើប្រាស់វានៅលើយន្តហោះជាបណ្តើរៗ។
តាមសេចក្តីរាយការណ៍និងសេចក្តីប្រកាសដោយក្រុមហ៊ុនអាកាសចរណ៍នានាបានឲ្យដឹងថា រហូតមកដល់ពេលនេះ ក្រុមហ៊ុនអាកាសចរណ៍កូរ៉េខាងត្បូង តៃវ៉ាន់ ក្រុមហ៊ុនអាកាសចរណ៍សិង្ហបុរី និងអាកាសចរណ៍ថៃ គឺសុទ្ធតែប្រកាសដាក់ចេញនូវវិធានការរិតត្បិតលើការប្រើប្រាស់ Power Bank នេះ ។
ពាក់ព័ន្ធនឹងបញ្ហានេះអ្នកដំណើរកម្ពុជាក៏ត្រូវតែដឹងនឹងប្រុងប្រយ័ត្ននិងរៀបចំខ្លួនឲ្យសមរម្យនៅមុនពេលធ្វើដំណើរតាមអាកាស ដោយសារតែក្រុមហ៊ុនអាកាសចរណ៍ទាំងនោះគឺសុទ្ធសឹងតែមានប្រតិបត្តិការដឹកជញ្ជូនផ្សារភ្ជាប់នឹងកម្ពុជា ។
ក្រុមហ៊ុនអាកាសចរណ៍សិង្ហបុរីដែលជាក្រុមហ៊ុនអាកាសចរណ៍ដ៏លេចធ្លោរមួយនៅអាស៊ី បានប្រកាសថា ក្រុមហ៊ុនកំពុងចូលរួមក្នុងបញ្ជីក្រុមហ៊ុនអាកាសចរណ៍ដែលឥឡូវនេះបានចេញបម្រាមហាមឃាត់ ការប្រើប្រាស់ Power Bank នៅលើយន្តហោះ។
ការរឹតបន្តឹងនេះធ្វើឡើងតាមសកម្មភាពស្រដៀងគ្នានេះដោយក្រុមហ៊ុនអាកាសចរណ៍នៅទូទាំងអាស៊ី ដែលបានរឹតបន្តឹងច្បាប់លើ power bank ដោយសារតែហានិភ័យអគ្គីភ័យ ដែលអាចកើតមានទាក់ទងនឹងសារធាតុ លីចូម។ ដូច្នេះ គេបារម្ភអំពីសុវត្ថិភាពនៃការហោះហើរ។
ក្រុមហ៊ុននេះបានប្រកាសជាចំហថា “ចាប់ពីថ្ងៃទី ១ ខែមេសា ឆ្នាំ ២០២៥តទៅ រាល់អ្នកដំណើរតាមក្រុមហ៊ុន Singapore Airline នឹងមិនត្រូវបានអនុញ្ញាតឱ្យសាក Power Bank តាមរយៈរន្ធ USB នៅលើយន្តហោះ ឬប្រើ Power Bank ដើម្បីសាកឧបករណ៍ផ្ទាល់ខ្លួនរបស់ពួកគេក្នុងអំឡុងរយៈពេលនៃការហោះហើរដាច់ខាត” ។
ក្រុមហ៊ុននេះបានសង្កត់ធ្ងន់ថា Power Bank នៅតែបន្តអនុញ្ញាតឲ្យអ្នកដំណើរយកតាមខ្លួនដដែល គ្រាន់តែមិនត្រូវបានអនុញ្ញាតឱ្យភ្ជាប់ឫប្រើ ទៅនឹងទូរសព្ទ ឬ tablet អំឡុងពេលនៃការហោះហើរ ។ ក្រុមហ៊ុននេះបានបន្តទៀតថា Power Bank ដែលអាចយកតាមខ្លួនបានគឺអាចមានថាមពលត្រឹម ១០០ Wh ហើយបើធំជាងនេះគឺទាល់តែមានការយល់ព្រមដោយក្រុមហ៊ុនអាកាសចរណ៍។
មកដល់ពេលនេះក្រុមហ៊ុនដែលចេញបម្រាមឫរិតត្បិតការប្រើប្រាស់ Power Bank គឺមានក្រុមហ៊ុន Korean Air និង Asiana របស់កូរ៉េខាងត្បូង ក្រុមហ៊ុន Singapore Airline របស់សិង្ហបុរី ក្រុមហ៊ុន Thai Airways របស់ថៃ ក្រុមហ៊ុន AirAsia របស់ម៉ាឡេស៊ី ហើយនិង ក្រុមហ៊ុនអាកាសចរណ៍របស់កោះតៃវ៉ាន់។
នៅពេលនេះដើម្បីអាចយក Power Bank នេះទៅតាមខ្លួនបានអ្នកដំណើរតម្រូវឲ្យច្រកវាទៅក្នុងថង់ប្លាស្ទិក ឫវត្ថុរក្សាអ៊ីសូឡង់។គួររំលឹកថា កាលពីឆ្នាំ២០១៦ ក្រុមហ៊ុនអាកាចរណ៍នានាបានចេញតែបម្រាមមិនអោយរក្សាទុក Power Bank នៅក្នុងវាលីសដាក់ឥវ៉ាន់ប៉ុណ្ណោះ ។
កាលពីឆ្នាំ២០២៤កន្លងទៅ កម្ពុជាមានគោលដៅ ហោះហើរត្រង់ជាមួយប្រទេសនិងតំបន់ចំនួន១២។ ប្រតិបត្តិការដឹកជញ្ជូនទាំងនេះគឺដំណើរការក្រុមហ៊ុនអាកាសចរណ៍ជាតិ និងអន្តរជាតិចំនួន ៣១ ដោយរួមទាំងក្រុមហ៊ុនដែលចេញបម្រាមខាងលើសឹងតែទាំងអស់ផងដែរ ។
ក្រុមហ៊ុនអាកាសចរណ៍ទាំងនេះបានដឹកជញ្ជូនអ្នកដំណើរសរុបបានជាង៦លាននាក់ តាមរយៈ ជើងហោះហើរសរុបចំនួន ៥៨.៣៥៤ តាមច្រកអាកាសយានដ្ឋានអន្តរជាតិចំនួន ៣ ។
ចែករំលែកព័តមាននេះ