រាជធានីភ្នំពេញ ៖ បទល្មើសចោរឆក់មិនត្រឹមតែកើតលើពលរដ្ឋខ្មែរទេ ប៉ុន្តែវាក៏បានកើតឡើងចំពោះជនបរទេស ដែលជាទេសចរផងដែរ ជាក់ស្ដែងនៅថ្ងៃនេះ មានករណីចោរចក់ទ្រព្យសម្បត្តិជនបរទេស ដែលគេស្គាល់ថា ជា Vlogger…
រាជធានីភ្នំពេញ ៖ បទល្មើសចោរឆក់មិនត្រឹមតែកើតលើពលរដ្ឋខ្មែរទេ ប៉ុន្តែវាក៏បានកើតឡើងចំពោះជនបរទេស ដែលជាទេសចរផងដែរ ជាក់ស្ដែងនៅថ្ងៃនេះ មានករណីចោរចក់ទ្រព្យសម្បត្តិជនបរទេស ដែលគេស្គាល់ថា ជា Vlogger ដ៏ល្បីមួយរូបលើបណ្ដាញសង្គម YouTube, Facebook និង Instagram ដែលលោកបានជួយផ្សព្វផ្សាយពីប្រទេសកម្ពុជាយ៉ាងច្រើន ។
ករណីចោរឆក់នេះ បានកើតឡើងនៅវេលាម៉ោង១២ និង៤០នាទី ថ្ងៃទី១៥ ខែមីនា ឆ្នាំ២០២៥ ចំណុចផ្លូវ១០៦ កែងផ្លូវលេខ១៣ សង្កាត់វត្តភ្នំ រាជធានីភ្នំពេញ ដែលចោរបានឆក់កាបូប ដែលមានឯកសារសំខាន់ៗជាច្រើន រួមមាន ប៉ាស្ព័រ កាតធនាគារ និងលុយកាក់ ។
ក្រោយពីទទួលបានដំណឹង សមត្ថកិច្ចជំនាញ បានចុះដល់កន្លែងកើតហេតុភ្លាមៗ ដើម្បីធ្វើការស៊ើបអង្កេត និងសួរនាំជនបរទេសទាំងពីរនាក់ ដោយយកចិត្តទុកដាក់។ សមត្ថកិច្ចកំពុងតែធ្វើការស្រាវជ្រាវតាមជំនាញយ៉ាងហ្មត់ចត់ ដើម្បីកំណត់រកមុខសញ្ញាជនល្មើស។ សង្ឃឹមថា ជនរងគ្រោះ នឹងទទួលបានយុត្តិធម៌ និងទ្រព្យសម្បត្តិ ដែលបាត់បង់មកវិញ ។
បើតាមក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានអោយដឹងថា ករណីឆក់កាបូបរបស់ជនបរទេស នៅខណ្ឌដូនពេញ សមត្ថកិច្ចជំនាញកំពុងស្រាវជ្រាវស្វែងរកឃាត់ខ្លួនជនសង្ស័យហើយ ។
ក្រុមការងារព័ត៌មាន និងប្រតិកម្មរហ័ស បន្តថា បន្ទាប់ពីមានករណីជនបរទេស២នាក់ប្តីប្រពន្ធ ធ្វើការឡាយវីដេអូ ផ្សព្វផ្សាយតាមបណ្តាញសង្គម ថា មានករណីចោរឆក់កាបូបរបស់ពួកគេបានសម្រច កើតឡើងនៅវេលាម៉ោង១២និង៤០នាទី ថ្ងៃទី១៥ ខែមីនា ឆ្នាំ២០២៥ ចំណុចផ្លូវ១០៦ កែងផ្លូវលេខ១៣ សង្កាត់វត្តភ្នំ ។ ក្រោយពីទទួលបានព័ត៌មាននេះភ្លាម សមត្ថកិច្ចជំនាញ នៃអធិការដ្ឋាននគរបាលខណ្ឌដូនពេញ បានស្វះស្វែងរកជនរងគ្រោះ ជាជនជាតិបរទេសខាងលើ ។ បន្ទាប់មក សមត្ថកិច្ចបានរកឃើញជនរងគ្រោះដោយបានអញ្ជើញពួកគាត់មកកាន់ប៉ុស្តិ៍នគរបាលរដ្ឋបាលវត្តភ្នំ សួរនាំដំណើររឿង និងជនរងគ្រោះបានដាក់ពាក្យបណ្តឹងភ្លាម សមត្ថកិច្ចជំនាញ កំពុងធ្វើការងារតាមជំនាញជាបន្ទាន់ ។
យ៉ាងណា អត្ដសញ្ញាណជនបរទេស២នាក់ប្តីប្រពន្ធខាងលើនេះ សមត្ថកិច្ចមិនបានបង្ហាញអោយស្គាល់ឡើយ។ ហើយបទល្មើសចោរឆក់ កំពុងតែបង្កភាពភ័យខ្លាចដល់ពលរដ្ឋទូទៅ និងទេសចរបរទេស ដែលទិដ្ឋភាពអវិជ្ជមាននេះ វាធ្វើឲ្យប៉ះពាល់ដល់វិស័យទេសចរណ៍ នៅកម្ពុជា ផងដែរ ៕
ចែករំលែកព័តមាននេះ