ខេត្តកណ្តាល ៖ ជនសង្ស័យម្នាក់ ត្រូវបានសមត្ថកិច្ចនគរបាលប៉ុស្តិ៍រដ្ឋបាលព្រែកគយ ស្រុកស្អាង ខេត្តកណ្តាល ធ្វើការឃាត់ខ្លួន ក្រោយកាន់កណ្ដៀវខ្វាងផ្លោះរបងចូលកាប់សត្វឆ្កែរបស់អ្នកភូមិដល់ក្នុងផ្ទះចំនួន២ក្បាល បណ្តាលឲ្យរបួស ខណៈម្ចាស់ផ្ទះភ័យឃើញទង្វើជនសង្ស័យ…
ខេត្តកណ្តាល ៖ ជនសង្ស័យម្នាក់ ត្រូវបានសមត្ថកិច្ចនគរបាលប៉ុស្តិ៍រដ្ឋបាលព្រែកគយ ស្រុកស្អាង ខេត្តកណ្តាល ធ្វើការឃាត់ខ្លួន ក្រោយកាន់កណ្ដៀវខ្វាងផ្លោះរបងចូលកាប់សត្វឆ្កែរបស់អ្នកភូមិដល់ក្នុងផ្ទះចំនួន២ក្បាល បណ្តាលឲ្យរបួស ខណៈម្ចាស់ផ្ទះភ័យឃើញទង្វើជនសង្ស័យ ខ្លាចកាប់ដោយទាំងពួកគាត់មិនហ៊ានចេញមកទេ គឺសុខចិត្តសម្ងំក្នុងផ្ទះ រហូតជនសង្ស័យចេញទៅបាត់ ព្រឹកឡើងទើបប្តឹងសមត្ថកិច្ចឲ្យឃាត់ខ្លួនតែម្តង ។
ហេតុការណ៍ខាងលើនេះបានកើតឡើងនៅវេលាម៉ោង១២និង៣០នាទីយប់រំលងអាធ្រាត្រ ឈានចូលថ្ងៃទី១២ ខែមីនា ឆ្នាំ២០២៥ នៅចំណុចផ្ទះជនរងគ្រោះ ឈ្មោះឈុន ស៊ីម ភេទស្រី អាយុ៧១ឆ្នាំ ក្នុងភូមិ ស្វាយតានី ឃុំព្រែកគយ ស្រុកស្អាង ខេត្តកណ្ដាល ។
ជនសង្ស័យមានឈ្មោះ ងួន រដ្ឋា ភេទប្រុស អាយុ៣៧ឆ្នាំ មុខរបរ មិនពិតប្រាកដ មានទីលំនៅភូមិ ស្វាយតានី ឃុំ ព្រែកគយ ស្រុកស្អាង ខេត្តកណ្តាល មានសារធាតុញៀនវិជ្ជមាន ក្នុងនោះបណ្តាលឲ្យរបួសសត្វឆ្កែចំនួន០២ ក្បាល(ញី ០១ក្បាល និងឈ្មោល ០១ ក្បាល) ។
តាមសមត្ថកិច្ចឲ្យដឹងថា នៅថ្ងៃទី១២ ខែមីនា ឆ្នាំ២០២៥ វេលាម៉ោង១២ និង ៣០ នាទីរំលងអាធ្រាត្រ ជនរងគ្រោះបានដេកក្នុងផ្ទះធម្មតា ពេលនោះក៏ឮសូរសម្លេងសត្វឆ្កែព្រុស គាត់ក៏បានភ្ញាក់ឡើងទៅមើលតាមកញ្ចក់បង្អួច ឃើញស្រាប់តែជនសង្ស័យម្នាក់កាន់កណ្ដៀវខ្វាង ដេញកាប់ឆ្កែរបស់គាត់ពេញនៅក្នុងរបងផ្ទះ ។ ឃើញដូច្នោះជនរងគ្រោះពុំហ៊ានចេញក្រៅផ្ទះទេ ព្រោះខ្លាចជន សង្ស័យកាប់ មួយសន្ទុះក្រោយមកក៏បាត់ឮសម្លេងឆ្កែព្រុស ហើយក៏ឃើញជនសង្ស័យលោតផ្លោះរបងចេញទៅខាងក្រៅផ្ទះ វិញ ។ លុះវេលាម៉ោង១០ និង៣០ នាទីព្រឹកថ្ងៃខែឆ្នាំ ដដែលជន រងគ្រោះ បានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលព្រែកគយ ស្រុកស្អាងខេត្តកណ្តាល ដើម្បីចាត់ការលើជនសង្ស័យរូបនោះ ។
ក្រោយពីទទួលបានពាក្យបណ្តឹងរបស់ប្រជាពលរដ្ឋ លោកអធិការនគរបាលស្រុកស្អាង ក្រោមការដឹកនាំបញ្ជាពីលោក ស្នងការនៃស្នងការដ្ឋាននគរបាលខេត្តកណ្តាល បានបញ្ជាទៅកម្លាំងនគរបាលប៉ុស្តិ៍រដ្ឋបាលព្រែកគយ ឲ្យឃាត់ខ្លួនដោះខ្នោះជន សង្ស័យ ដើម្បីយកទៅសាកសួរ និងចាត់ទៅតាមផ្លូវច្បាប់ ដែលនេះហើយជាបាបកម្មរបស់បុគ្គលបានប្រព្រឹត្ត ។ ទើបនៅចំពោះមុខសមត្ថកិច្ចជនសង្ស័យបានសារភាពថា ខ្លួនពិតជាបានផ្លោះរបងចូលទៅក្នុងផ្ទះរបស់ជនរងគ្រោះ កាប់សត្វឆ្កែ២ ក្បាលនោះប្រាកដមែន ។
ដោយយោងទៅលើពាក្យបណ្តឹងរបស់ជនរងគ្រោះ និងចម្លើយសារភាពរបស់ជនសង្ស័យ សមត្តកិច្ចនគរបាលស្រុកស្អាង បានកសាងសំណុំរឿងដោយចោទប្រកាន់ពីបទ.រំលោភលើលំនៅឋាន.(កាប់សត្វឆ្កែ) និងប្រើប្រាស់នូវសារធាតុញៀនដោយខុសច្បាប់ បញ្ជូនទៅសាលាដំបូងខេត្តតាមនីតិវិធី ៕
ចែករំលែកព័តមាននេះ