សភាពការណ៍មួយរយ:ចុងក្រោយនេះបានបង្ហាញថា រដ្ឋាភិបាលមិនប្រណីដៃឡើយ ចំពោះមន្ត្រីខិលខូចនិងពុករលួយ ។ សាច់ស្អុយមួយចំនួននៅក្នុងរដ្ឋាភិបាលត្រូវបានកាត់ចោលជាបន្តបន្ទាប់ ។ ចំណែកទៅមុខទៀត រដ្ឋាភិបាលក៏មិនអាចលើកលែងអោយបានដែរ ចំពោះនរណាធ្វើអោយខូចឈ្មោះរដ្ឋាភិបាល ឬបំពេញការងារមិនបានត្រឹមត្រូវជូនប្រជាពលរដ្ឋ…
សភាពការណ៍មួយរយ:ចុងក្រោយនេះបានបង្ហាញថា រដ្ឋាភិបាលមិនប្រណីដៃឡើយ ចំពោះមន្ត្រីខិលខូចនិងពុករលួយ ។ សាច់ស្អុយមួយចំនួននៅក្នុងរដ្ឋាភិបាលត្រូវបានកាត់ចោលជាបន្តបន្ទាប់ ។ ចំណែកទៅមុខទៀត រដ្ឋាភិបាលក៏មិនអាចលើកលែងអោយបានដែរ ចំពោះនរណាធ្វើអោយខូចឈ្មោះរដ្ឋាភិបាល ឬបំពេញការងារមិនបានត្រឹមត្រូវជូនប្រជាពលរដ្ឋ ។
តាមរយ:សកម្មភាព និងការសម្រេចចិត្តនៅដើមឆ្នាំនេះ រដ្ឋាភិបាលបានបង្ហាញសញ្ញាដ៏ប្រាកដប្រជាថា រឿងពុករលួយ គឺជាគោលដៅដ៏ធំដែលរដ្ឋាភិបាលត្រូវតែបោសសម្អាតចេញពីក្នុងជួរមន្ត្រី ដើម្បីអោយកម្ពុជាកាន់តែមានការរីកចម្រើនសេដ្ឋកិច្ចកាន់តែរហ័ស ។
ជាក់ស្តែងកាលពីថ្ងៃទី១០ ខែមីនា ឆ្នាំ២០២៥ អង្គភាពប្រឆាំងអំពើពុករលួយ បានឃាត់ខ្លួនអភិបាលរងខេត្តកំពង់ស្ពឺម្នាក់ កងកម្លាំងម្នាក់ និងអ្នកបកប្រែភាសាចិនម្នាក់ពីបទប្រពឹត្តិអំពើពុករលួយ សមគំនិត និងបទក្លែងបន្លំលិខិតឯកសារសាធារណៈដែលប្រព្រឹត្តក្នុងខេត្តកំពង់ស្ពឺ ប៉ៃលិន បាត់ដំបង ស្ទឹងត្រែង និងព្រះវិហារ កាលពីឆ្នាំ២០២៣ ។
តាមព័ត៌មានដែលទទួលបានពួកគេទាំងបីនាក់ គឺមានលោកអភិបាលរងខេត្តកំពង់ស្ពឺ ទិត វុទ្ធី អ្នករត់ការ ជាមន្ត្រីយោធាថានៈ វរៈសេនីយ៍ត្រី ឈ្មោះ ហ៊ាវ ខន និងអ្នកបកប្រែភាសាចិន អ៊ឹង សារឿន ។ ក្រោយពេលដែលអង្គភាពប្រឆាំងអំពើពុករលួយបានឃាត់ខ្លួនពួកគេទាំងបីរូបត្រូវបានអយ្យការ និងចៅក្រមតុលាការខេត្តកំពង់ស្ពឺ ចោទប្រកាន់រួចរាល់ហើយពេលនេះ ។ ពួកគេទាំងបីបានជួបបញ្ហានេះ ក្រោយពេលដែលមានការប្តឹងផ្តល់ពីសំណាក់ជនជាតិចិន ដែលមានបំណងចង់មកធ្វើអាជីវកម្មរ៉ែនៅកម្ពុជា ។
ដោយឡែក ខាងជួរសមត្ថកិច្ចប៉ូលិសវិញនៅក្នុងខែមីនា នេះក៏មានសេចក្តីរាយការណ៍ថា មានការរបូតតំណែងអធិការស្រុកមួយរូប ដោយសារប្រព្រឹត្តអំពើពុករលួយ ដូចជា ដោះលែងជនសង្ស័យប្រើប្រាស់គ្រឿងញៀ.ន និងជនបរទេសឆ្លងដែនខុសច្បាប់ ។ ចំណែកមន្ត្រីនគរបាល៣រូបផ្សេងទៀត រងការពិន័យរដ្ឋបាល បន្ទាប់ពីពលរដ្ឋម្នាក់ផ្ញើសារទៅកាន់ហ្វេសប៊ុកទៅកាន់លោកឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ស សុខា ដើម្បីស្នើសុំឲ្យស៊ើបអង្កេតករណីចោទប្រកាន់នេះ ។
ក្រៅពីនោះ កាលពីដើមឆ្នាំ អង្គភាពប្រឆាំងអំពើពុករលួយក៏បានឃាត់ ខ្លួនមន្ត្រីកងរាជអាវុធហត្ថខេត្តតាកែវចំនួន២នាក់ ពាក់ព័ន្ធនឹងបទល្មើសស៊ីសំណូកក្នុងការទទួលប្រាក់ជាថ្នូរនឹងការមិនបង្ក្រាបលើបទល្មើសគ្រឿងញៀ.ន និងល្បែ.ងស៊ីសង ។
សរុបទៅ នៅក្នុងរយៈពេលមិនដល់៣ខែនៃដើមឆ្នាំនេះ មន្ត្រី និងកងកម្លាំងមិនតិចឡើយ ដែលបានរបូតតំណែង និងមានពិរុទ្ធផ្នែកច្បាប់ដោយសារតែរឿងពុករលួយនេះ ហើយនៅពេលខាងមុខប្រហែលជានឹងមានមន្ត្រី និងកងកម្លាំងបន្ថែមទៀតដែលនឹងរងពិន័យ ប្រសិនបើពិតជាប្រពឹត្តកំហុស ។ ដូច្នេះកុំលេងសើច ហើយកុំចេះតែហ៊ានប្រពឹត្តផ្តេសផ្តាសពីព្រោះរដ្ឋាភិបាលនឹងមិនប្រណីដៃឡើយ ។
ឃើញចំណាត់ការប្រកបដោយកណ្តាប់ដែកបែបនេះហើយ មន្ត្រីរាជការ កងកម្លាំងគ្រប់ប្រភេទសូមប្រញាប់លាងសម្អាតដៃចេញពីអំពើពុករលួយជាបន្ទាន់ ដើម្បីកុំអោយមានពិរុទ្ធ ។ មន្ត្រីដែលទទួលប្រាក់បៀវត្សរ៍ពីរាជរដ្ឋាភិបាល គួរតែខិតខំបម្រើប្រជាពលរដ្ឋដោយត្រឹមត្រូវ និងមានប្រសិទ្ធភាព ។
ដំណាក់កាលនេះ គឺជាដំណាក់កាលដែលរដ្ឋាភិបាលត្រូវវះកាត់ហើយ ។ ដូច្នេះសូមលើកកម្ពស់ការប្រុងប្រយ័ត្ន និងសកម្មនៅក្នុងការងារប្រកបដោយទំនួលខុសត្រូវ បើសិនជាមិនចង់ក្លាយជាមន្ត្រីសាច់ស្អុយដែលនឹងត្រូវវះកាត់ចោលដោយរដ្ឋាភិបាល ៕
ចែករំលែកព័តមាននេះ