ទីក្រុងកៀវ៖ នៅពេលជិតឈានដល់ការចរចាគ្នា និងបទឈប់បាញ់គ្នា អ៊ុយក្រែនបែរជារបូតពីដៃទៅវិញនូវទឹកដីរុស្ស៊ីនៅតំបន់ខឺសដែលខ្លួនវាយឆ្មក់ និងចូលកាន់កាប់តាំងពីខែសីហា ឆ្នាំ២០២៤។ ប្រភពពីសមរភូមិមុខបង្ហាញថារុស្ស៊ីកំពុងសម្រុកវាយប្រហារយកតំបន់ខឺសពីកណ្ដាប់ដៃអ៊ុយក្រែនសឹងតែបានទាំងស្រុងហើយបន្ទាប់ពីកងទ័ពអ៊ុយក្រែនជាប់ការឡោមព័ទ្ធ។
កងទ័ពរុស្ស៊ីប្រើយុទ្ធសាស្ត្រប្លែកៗ។ ពួកគេមិនវាយជាចំហទេ ប៉ុន្តែវាយឆ្មក់។ ទាហានរុស្ស៊ីដើរតាមបំពង់បង្ហូរប្រេងចម្ងាយជាង១០គីឡូម៉ែត្រដើម្បីវាយពីក្រោយខ្នងធ្វើអ៊ុយក្រែនធ្វើឱ្យពួកគេសឹងតែដាច់ផ្ងារម្ដងៗ។ បើពួកគេមិនដកថយទេ រុស្ស៊ីនឹងហ៊ុមព័ទ្ធជិតឈឹង ហើយនឹងចាប់បានទាំងអស់។ អ្នកយកព័ត៌មានបែបប្លក់ (blog) របស់រុស្ស៊ី និងអ៊ុយក្រែនសុទ្ធតែនិយាយដូចៗគ្នាថាកងទ័ពអ៊ុយក្រែនបានដកថយជាបន្តបន្ទាប់ព្រោះពួកគេមិនអាចស៊ូទ្រាំនឹងយុទ្ធសាស្ត្រវាយឆ្មក់របស់រុស្ស៊ីបានទេ។
សូមរំលឹកថាកាលពីថ្ងៃទី៦ ខែសីហា ឆ្នាំ២០២៤ អ៊ុយក្រែនវាយឆ្មក់ចូលតំបន់ខឺសដែលនៅជាប់នឹងព្រំដែនរុស្ស៊ី-អ៊ុយក្រែនតែម្ដង។ កាលនោះ ពួកគេកាន់កាប់បានទឹកដីច្រើនគួរសមដែររហូតដល់ជាង១ពាន់គីឡូម៉ែត្រការ៉េ។ អ៊ុយក្រែនពីដំបូងដៃគិតថាខ្លួនត្រូវតែបន្តខាំក្រាបនៅខឺសដើម្បីយកទីនោះធ្វើជាលក្ខខណ្ឌតថ្លៃគ្នាផ្នែកនយោបាយនៅពេលមានការចរចាសន្តិភាព។
រុស្ស៊ីធ្លាប់ដាក់ផែនការវាយបណ្ដេញកងទ័ពអ៊ុយក្រែនឱ្យអស់ពីតំបន់ខឺសមុនពេលលោកត្រាំស្បថចូលកាន់តំណែង។ ប៉ុន្តែពួកគេធ្វើមិនបានសម្រេច។ នៅលើសមរភូមិការទូត និងនយោបាយមិនទាន់ច្បាស់ថារវាងរុស្ស៊ី និងអ៊ុយក្រែនតើនរណាមានប្រៀបជាងនរណាទេនៅក្នុងការចរចាគ្នា។ ប៉ុន្តែនៅលើសមរភូមិយោធា អ៊ុយក្រែនចាប់ផ្ដើមចាញ់ប្រៀបរុស្ស៊ីជាបណ្ដើរៗ ចាប់តាំងពីមានជម្លោះពាក្យសម្ដីរវាងលោកត្រាំ និងលោកហ្សេឡិនស្គីនៅសេតវិមានកាលពីជាងមួយសប្ដាហ៍មុន។
លោកត្រាំមានកំហឹងយ៉ាងខ្លាំងនៅពេលលោកហ្សេឡិនស្គីនិយាយតមាត់។ លោកក៏សម្រេចចិត្តផ្ដាច់ជំនួយយោធា និងព័ត៌មានសម្ងាត់។ រុស្ស៊ីឆ្លៀតឱកាសនេះវាយប្រហារកាន់តែខ្លាំង។ ក្រសួងការពារជាតិរុស្ស៊ីថ្លែងថាកងទ័ពរបស់ខ្លួនទើបតែវាយយកបានភូមិចំនួន៥មកវិញ។ អ្នកនាំពាក្យវិមានក្រឹមឡាំងយល់ថាសភាពការណ៍វិវត្តថ្មីៗនេះជាសញ្ញាល្អសម្រាប់រុស្ស៊ី។
ប្លក់កឺ (blogger) និងសារព័ត៌មានរបស់រដ្ឋរុស្ស៊ីបង្ហាញរូបទាហានរុស្ស៊ីឈរកាន់ទង់ជាតិនៅទីក្រុងស៊ូតហ្សា (Sudzha) ដែលស្ថិតនៅកៀកនឹងព្រំដែនអ៊ុយក្រែនតែម្ដង។ នៅក្នុងរូបនោះ ពួកគេឈរនៅលើផ្លូវហាយវេដែលអ៊ុយក្រែនប្រើប្រាស់សម្រាប់ដឹកជញ្ជូនភស្តុភារទៅសមរភូមិមុខ។ បើគេស្ដាប់ពីខាងភាគីអ៊ុយក្រែន មេបញ្ជាការកងទ័ពអ៊ុយក្រែនថ្លែងថាកងទ័ពខ្លួនមិនដល់ថ្នាក់ត្រូវរុស្ស៊ីហ៊ុមព័ទ្ធជិតឈឹងនោះទេ។ លោកទទួលស្គាល់ថាពួកគេលែងវាយលុកហើយ ប៉ុន្តែវាយទប់ទល់វិញម្ដង។
ផ្ទុយពីការអះអាងនេះ អ្នកសរសេរប្លក់របស់អ៊ុយក្រែនប្រមើលឃើញថាតាមមើលទៅ ទាហានអ៊ុយក្រែនប្រហែលជាមិនអាចស៊ូទ្រាំនៅតំបន់ខឺសតទៅទៀតបានទេ។ ពួកគេមុខជាចាកចេញពីខឺសឆាប់ៗនេះ។ យ៉ាងខ្លាំងត្រឹមថ្ងៃសុក្រសប្ដាហ៍នេះ គ្មានវត្តមានទាហានអ៊ុយក្រែននៅទីនោះទៀតឡើយ។ ខាងលើនេះជាការផ្សាយរបស់ទីភ្នាក់ងារព័ត៌មានរ៉យទ័រ និងប្រភពដទៃទៀត៕
ចែករំលែកព័តមាននេះ