ទីក្រុងប្រ៊ុចសែល៖ សហភាពអឺរ៉ុបត្រៀមចាត់វិធានការវាយបកវិញទៅលើអាមេរិកបន្ទាប់ពីលោកត្រាំដំឡើងពន្ធទៅលើទំនិញរបស់អឺរ៉ុបមុន។ ជាជំហានដំបូង អឺរ៉ុបនឹងដំឡើងពន្ធដើម្បីទាញយកប្រាក់ចំណូលឱ្យបាន២៦ពាន់លានអឺរ៉ូ ឬស្មើនឹង២៨ពាន់លានដុល្លារត្រឡប់មកវិញ។ វិធានការនេះនឹងអនុវត្តចាប់ពីខែមេសាតទៅ។ ខាងលើនេះជាការថ្លែងរបស់ប្រធានគណៈកម្មការអឺរ៉ុប លោកស្រីឡីយឹន។
បើដូច្នេះមែន សង្គ្រាមពាណិជ្ជកម្មចាប់ផ្ដើមផ្ទុះឡើងខ្លាំងស្រុះដៃគ្នាទាំងនៅទ្វីបអាមេរិក អាស៊ី និងអឺរ៉ុប។ នេះជាឆ្លើយតបទៅនឹងការដំឡើងពន្ធលើដែក និងអាលុយមីញ៉ូម។ នៅរយៈពេលចំហ ឬសម័យអន្តរកាលនេះ អឺរ៉ុបចង់ចរចាគ្នាសម្រុះសម្រួលគ្នាអំពីបញ្ហានេះ។ អឺរ៉ុបយល់ថាការដំឡើងពន្ធកាន់តែច្រើនឡើងៗដូច្នេះគ្មានផលចំណេញសម្រាប់នរណាម្នាក់ឡើយ។
កាលពីយប់មិញ លោកត្រាំប្រកាសដំឡើងពន្ធ២៥%ទៅលើដែក និងអាលុយមីញ៉ូមជាទូទៅដោយចាប់អនុវត្តពីថ្ងៃពុធនេះតទៅ។ បើសម្រាប់កាណាដាវិញ លោកត្រាំដំឡើងដល់៥០%លើមុខទំនិញទាំង២ប្រភេទនេះព្រោះកាណាដាហ៊ានធ្វើផ្គើនដាក់អាមេរិកដោយដំឡើងពន្ធលើអគ្គិសនី។ គណៈកម្មការអឺរ៉ុបប្រកាសថាខ្លួននឹងសម្រេចដំឡើងពន្ធនៅថ្ងៃទី១ ខែមេសា ហើយនឹងចាប់អនុវត្តពីថ្ងៃទី១៣ ខែមេសា។
លោកស្រីឡីយឹនទទួលស្គាល់ថាបរិមាណពន្ធដែលអឺរ៉ុបត្រៀមដំឡើងដល់២៥%នោះពិតជាច្រើនមែន។ ប៉ុន្តែក៏មិនហួសហេតុពេកដែរព្រោះជាការព្យាយាមកាត់តម្រឹមឱ្យស្មើគ្នានឹងការដំឡើងពន្ធរបស់អាមេរិកតែប៉ុណ្ណោះ។ ដោយសារអាមេរិកដំឡើងពន្ធសរុបស្មើនឹង២៨ពាន់លានដុល្លារទៅលើទំនិញអឺរ៉ុប ដូចនេះ អឺរ៉ុបនឹងទាញយកលុយថ្លៃពន្ធ២៨ពាន់លានដុល្លារអាមេរិកនោះត្រឡប់មកវិញ។ លោកស្រីថ្លែងថាអឺរ៉ុបត្រូវតែចាត់វិធានការការពារអតិថិជន និងម្ចាស់អាជីវកម្មរបស់ខ្លួន។
គម្រោងដំឡើងពន្ធដែលកំពុងព្យួរទុកមានដូចជាទំនិញប្រភេទទូក, ស្រាវីស្គីរបស់អាមេរិក និងម៉ូតូ។ អឺរ៉ុបចង់យកពេល២អាទិត្យនៅក្នុងសម័យអន្តរកាលនេះដើម្បីពិគ្រោះគ្នាថាតើមុខទំនិញណាខ្លះទៀតដែលត្រូវដំឡើងពន្ធ។ វិធានការថ្មីនេះនឹងប្រមូលពន្ធថែមបាន១៨ពាន់លានអឺរ៉ូដើម្បីធ្វើយ៉ាងណាឱ្យការដំឡើងពន្ធរបស់អាមេរិក និងអឺរ៉ុបមានសមាមាត្រគ្នា។
លោកស្រីឡីយឹនថ្លែងថាទន្ទឹមនឹងនោះ យើងតែងតែបើកទូលាយក្នុងការចរចាគ្នាជានិច្ច។ យើងជឿជាក់យ៉ាងមុតមាំថានៅក្នុងស្ថានភាពដែលពិភពលោកកំពុងជួបប្រទះបញ្ហាលំបាកដោយសារភូមិសាស្ត្រសេដ្ឋកិច្ច និងសភាពការណ៍នយោបាយមិនច្បាស់លាស់ដូចសព្វថ្ងៃនេះ យើងគ្មានចិត្តចង់ដំឡើងពន្ធអីសូម្បីតែបន្តិចព្រោះវាគ្មានប្រយោជន៍អ្វីសម្រាប់យើងទេ។
ដូច្នេះ យើងត្រៀមខ្លួនជានិច្ចដើម្បីជួបសន្ទនាគ្នា។ មុខទំនិញដែលអឺរ៉ុបកំពុងសម្រួចមាត់ដំឡើងពន្ធឱ្យបានខ្ពស់មានដូចជាទំនិញឧស្សាហកម្ម និងទំនិញកសិកម្ម។ ឧទាហរណ៍ដូចជាអាលុយមីញ៉ូម, វាយនភ័ណ្ឌ, គ្រឿងបរិក្ខារប្រើប្រាស់នៅក្នុងផ្ទះ, គ្រឿងផ្លាស្ទិច, សាច់បក្សី, សាច់គោ, ពងមាន់-ពងទា, ផលិតផលធ្វើពីទឹកដោះគោ, ស្ករស និងបន្លែ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ