ទីក្រុងកៀវ៖ បន្ទាប់ពីដាក់សំណើទៅអាមេរិកដើម្បីឱ្យមានបទឈប់បាញ់រយៈពេល៣០ថ្ងៃ អ៊ុយក្រែនថ្លែងថានៅពេលនេះការសម្រេចចិត្តស្ថិតនៅក្នុងដៃរបស់រុស្ស៊ីដើម្បីទទួលយកសំណើនេះឬយ៉ាងណា។ ការថ្លែងដូច្នេះបន្ទាប់ពីរុស្ស៊ីទើបតែវាយប្រហារអ៊ុយក្រែនថ្មីៗ និងបន្ទាប់ពីបិទបញ្ចប់កិច្ចជំនួបទ្វេភាគីរវាងអ៊ុយក្រែន និងអាមេរិកនៅអារ៉ាប៊ីសាអូឌីត។
ភាគីទាំង២បង្ហាញការពេញចិត្តនឹងលទ្ធផលនៃកិច្ចជំនួបនេះ។ បន្ទាប់ពីអ៊ុយក្រែនបង្ហាញជំហរចង់បិទបញ្ចប់សង្គ្រាមនេះឱ្យបានឆាប់តាមដែលអាចធ្វើទៅបាន លោកត្រាំក៏ត្រៀមផ្ដល់ជំនួយយោធា និងព័ត៌មានសម្ងាត់ឡើងវិញ។ ដូច្នេះបើរុស្ស៊ីមិនទាន់សម្រេចចិត្តទទួលយកបទឈប់បាញ់ទេ អ៊ុយក្រែនអាចមានអាវុធ និងព័ត៌មានពេញដៃសម្រាប់ទល់ទល់ជាមួយរុស្ស៊ី។
អ៊ុយក្រែនប្រកាសថាខ្លួនត្រៀមទទួលយកបទឈប់បាញ់នេះហើយ សំខាន់ឱ្យតែរុស្ស៊ីយល់ព្រមទទួលយកដែរ។ «នេះជាការបោះជំហានដ៏សំខាន់ដើម្បីឈានទៅរកការធានាសន្តិសុខជាតិដ៏ពិតប្រាកដ និងរៀបចំលក្ខខណ្ឌសម្រាប់កិច្ចព្រមព្រៀងសន្តិភាព។ ឥឡូវនេះ ការសម្រេចចិត្តស្ថិតនៅក្នុងដៃរបស់រុស្ស៊ី។ ពិភពលោកកំពុងរង់ចាំមើលថាតើនរណាចង់បិទបញ្ចប់សង្គ្រាមពិតប្រាកដ? ហើយនរណាចង់បណ្ដែតបណ្ដោយពេលវេលា?»
អ្នកនាំពាក្យវិមានក្រឹមឡាំងថ្លែងថាទីក្រុងម៉ូស្គូត្រៀមស្ដាប់លទ្ធផលនៃកិច្ចជំនួបនៅអារ៉ាប៊ីសាអូឌីត និងកំពុងរៀបចំសេចក្ដីថ្លែងការណ៍ជាផ្លូវការដោយប្រយ័ត្នប្រយែង។ អ្នកនាំពាក្យរូបនេះថ្លែងថារុស្ស៊ីមិនចង់ធ្វើជាអ្នកដើរមុខគេនៅក្នុងបទឈប់បាញ់នេះទេ។ រុស្ស៊ីចង់ស្ដាប់សម្ដីផ្ទាល់របស់ទីក្រុងវ៉ាស៊ីនតោនជាមុនសិន។ លោកប៉េស្កូសថ្លែងថាការសន្ទនាគ្នាកម្រិតកំពូលតាមទូរស័ព្ទ (រវាងត្រាំ និងពូទីន) អាចនឹងត្រូវធ្វើ។
អ៊ុយក្រែនកំពុងបង្ហាញថាខ្លួនត្រៀមខ្លួនទទួលយកសន្តិភាព។ ប៉ុន្តែទន្ទឹមនឹងនោះ អ៊ុយក្រែននៅតែទាមទារឱ្យអាមេរិកផ្ដល់ការធានាសន្តិសុខជាតិរបស់ខ្លួន។ បើមិនដូច្នេះទេ ពួកគេបារម្ភថាសង្គ្រាមនឹងផ្ទុះឡើងសាជាថ្មី។ អ៊ុយក្រែននៅតែសង្ស័យថារុស្ស៊ីមិនចង់បញ្ចប់សង្គ្រាមទេ។ ដូច្នេះអ៊ុយក្រែនសូមជំរុញឱ្យអាមេរិកកុំធ្វេសប្រហែសឱ្យសោះចំពោះទង្វើរបស់ម៉ូស្គូ។
លោកហ្សេឡិនស្គីសរសេរនៅលើតេឡេក្រាមថាលោកទទួលយកបទឈប់បាញ់រយៈពេល៣០ថ្ងៃ លោកយល់ថានេះជារឿងវិជ្ជមាន។ លោកត្រៀមខ្លួនទទួលយកសេណារីយោនេះ។ លោកសូមឱ្យអាមេរិកនិយាយបញ្ចុះបញ្ចូលរុស្ស៊ីដើម្បីទទួលយកសំណើនេះ។
ចំពោះសំណួរថាតើបទឈប់បាញ់អាចនឹងកើតមាននៅពេលណា? លោកត្រាំសង្ឃឹមថាអាចនឹងកើតមានពីរបីថ្ងៃទៀត។ លោកថ្លែងថាក្រុមការងាររបស់អាមេរិកនឹងជួបរុស្ស៊ីនៅថ្ងៃស្អែក ហើយសង្ឃឹមថានឹងមានការសន្ទនាគ្នាសំខាន់ៗកើតឡើង។ នាយករដ្ឋមន្ត្រីអង់គ្លេសថ្លែងថានៅពេលនេះគ្រាប់បាល់កំពុងស្ថិតនៅក្នុងដៃរបស់រុស្ស៊ី។
ប្រភពពីខាងរដ្ឋាភិបាលអង់គ្លេសបង្ហើបឱ្យដឹងថាអង់គ្លេសបានចូលរួមយ៉ាងសកម្មនៅពីក្រោយវាំងននដើម្បីជំរុញឱ្យមានបទឈប់បាញ់។ នាយករដ្ឋមន្ត្រីអង់គ្លេសយល់ថានេះជាពេលវេលាសំខាន់ដែលអ៊ុយក្រែនត្រូវមានសន្តិភាព។ យើងត្រូវតែជួយជ្រោមជ្រែងឱ្យបានសស្រាក់សស្រាំទាំងអស់គ្នាដើម្បីនាំយកសន្តិភាពដ៏យូរអង្វែង និងកាន់តែឆាប់តាមដែលអាចធ្វើទៅបាន៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ