ប្រទេសវៀតណាម ៖ ទិន្នន័យពីការិយាល័យស្ថិតិជាតិប្រទេសវៀតណាម បានបង្ហាញថា គិតត្រឹមរយៈពេល២ខែដំបូងឆ្នាំ ២០២៥ ការនាំចូល និងនាំចេញរវាងប្រទេសវៀតណាម និងប្រទេសចិនស្ថិតនៅកម្រិតមធ្យមជាមួយតម្លៃលើសពី៣១ពាន់លានដុល្លារអាមេរិក។ តម្លៃនៃការនាំចូលពីប្រទេសចិនរយៈពេលពីរខែចុងក្រោយនេះ…
ប្រទេសវៀតណាម ៖ ទិន្នន័យពីការិយាល័យស្ថិតិជាតិប្រទេសវៀតណាម បានបង្ហាញថា គិតត្រឹមរយៈពេល២ខែដំបូងឆ្នាំ ២០២៥ ការនាំចូល និងនាំចេញរវាងប្រទេសវៀតណាម និងប្រទេសចិនស្ថិតនៅកម្រិតមធ្យមជាមួយតម្លៃលើសពី៣១ពាន់លានដុល្លារអាមេរិក។
តម្លៃនៃការនាំចូលពីប្រទេសចិនរយៈពេលពីរខែចុងក្រោយនេះ ឈានដល់ ២៣.៣ពាន់លានដុល្លារ ពោលកើនឡើង ២០.៧% បើធៀបនឹងរយៈពេលដូចគ្នា កាលពីឆ្នាំមុន។ ទោះយ៉ាងណាក៏ដោយ តម្លៃនៃការនាំចេញទៅកាន់ប្រទេសចិនមានចំនួនត្រឹមតែ ៧.៩ពាន់លានដុល្លារ ពោលធ្លាក់ចុះ ២.១% បើធៀបនឹងរយៈពេលដូចគ្នា កាលពីឆ្នាំមុន។
យោងតាមក្រសួងកសិកម្ម និងបរិស្ថានរបស់ប្រទេសវៀតណាមបានឱ្យដឹងថា តម្លៃនៃការនាំចេញបន្លែ និងផ្លែឈើវៀតណាមក្នុងខែកុម្ភៈត្រូវបានប៉ាន់ប្រមាណថា មានចំនួន ៣៥០លានដុល្លារ ដែលនាំឱ្យតម្លៃនៃការនាំចេញបន្លែ និងផ្លែឈើសរុបក្នុងរយៈពេល២ខែដំបូង នៃឆ្នាំនេះ កើនឡើងដល់ ៧២៤លានដុល្លារ។
បើធៀបនឹងរយៈពេលដូចគ្នា កាលពីឆ្នាំមុន តម្លៃនៃការនាំចេញបន្លែ និងផ្លែឈើទៅកាន់ប្រទេសចិនបានធ្លាក់ចុះ ៤៣% ខណៈដែលការនាំចេញទៅកាន់សហរដ្ឋអាមេរិកកើនឡើង ៣៨% និងការនាំចេញទៅកាន់ប្រទេសថៃកើនឡើង ៥% ។
ចាប់តាំងពីដើមឆ្នាំ ២០២៥ រហូតមកទល់ពេលនេះ ប្រទេសចិនបានរឹតបន្តឹងការនាំចូលទំនិញមួយចំនួនពីប្រទេសវៀតណាម ជាពិសេសផ្លែទុរេនផងដែរ ដ្បិតមហាអំណាចសេដ្ឋកិច្ចទី២ពិភពលោកមួយនេះ គឺជាទីផ្សារនាំចូលធំបំផុតរបស់វៀតណាម និងជាទីផ្សារនាំចេញធំទីពីរ ហើយក៏ជាអ្នកផ្គត់ផ្គង់ទំនិញដ៏ធំបំផុត ពិសេសវត្ថុធាតុដើមសម្រាប់ការផលិតទៅកាន់ប្រទេសវៀតណាមផងដែរ។
សូមជម្រាបថា ពាណិជ្ជកម្មទ្វេភាគីវៀតណាម និងចិនបានឈានដល់ចំនួនកំណត់ត្រាខ្ពស់បំផុត ពោលគឺចំនួន២០៥ពាន់លានដុល្លារ កាលពីឆ្នាំមុន។ ប្រភព ៖ VietnamPlus
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ