នៅពេលដែលលុយពិបាករកគ្រប់គ្នាត្រូវប្រឹងរកលុយ មិនថា ជាលក្ខណ:បុគ្គលិក ស្ថាប័ន ខេត្តក្រុង ឬប្រទេសទាំងមូលឡើយ ។ ទស្សនៈវិស័យនៅក្នុងការជំរុញឲ្យខេត្តនីមួយនៅក្នុងព្រះរាជាណាចក្រកម្ពុជា ចេះជួយរកលុយកំពុងតែបង្ហាញរូបរាងតាមរយ:ការលើកកម្ពស់ការទាក់ទាញវិនិយោគបរទេស ។…
នៅពេលដែលលុយពិបាករកគ្រប់គ្នាត្រូវប្រឹងរកលុយ មិនថា ជាលក្ខណ:បុគ្គលិក ស្ថាប័ន ខេត្តក្រុង ឬប្រទេសទាំងមូលឡើយ ។ ទស្សនៈវិស័យនៅក្នុងការជំរុញឲ្យខេត្តនីមួយនៅក្នុងព្រះរាជាណាចក្រកម្ពុជា ចេះជួយរកលុយកំពុងតែបង្ហាញរូបរាងតាមរយ:ការលើកកម្ពស់ការទាក់ទាញវិនិយោគបរទេស ។
នៅពេលបច្ចុប្បន្ននេះដំណើរការនៃការទាក់ទាញវិនិយោគ គឺធ្វើឡើងនៅក្នុងកម្រិតជាតិ ប៉ុន្តែរាជរដ្ឋាភិបាលកម្ពុជា ក្រោមការដឹកនាំដោយសម្តេច ធិបតី ហ៊ុន ម៉ាណែត ជានាយករដ្ឋមន្ត្រី គឺមានបំណងជំរុញ និងលើកទឹកចិត្តឲ្យខេត្តនីមួយៗជួយរាជរដ្ឋាភិបាលលើកិច្ចការទាក់ទាញវិនិយោគ ពោល គឺកិច្ចការជួយរកលុយតាមគម្រោងវិនិយោគនានា ។
អ្វីដែលសម្តេចមហាបវរធិបតី និយាយកន្លងមកជាបន្តបន្ទាប់ចាប់តាំងពីឡើងកាន់តំណែង នៅខែសីហា ឆ្នាំ២០២៣ មកដល់ពេលនេះកំពុងតែដំណើរការទៅមុខ ហើយកិច្ចការនេះទំនងនឹងអាចនឹងចេញនៅក្នុងពេលឆាប់ៗនេះផងក៏ថាបាន ។ ដូច្នេះអាជ្ញាធរខេត្ត ទាំង២៥ខេត្តរាជធានី គួរតែរៀបចំខ្លួនឲ្យហើយ ដើម្បីកុំអោយមិនដឹងចាប់ផ្តើមពីចំណុចណា នៅពេលគោលនយោបាយនោះចេញជាផ្លូវការ ។
ពាក់ព័ន្ធនឹងកិច្ចការនេះ កាលសប្តាហ៍មុន នៅក្រុមប្រឹក្សាអភិវឌ្ឍន៍កម្ពុជាបានរៀបចំនូវកិច្ចប្រជុំពិគ្រោះយោបល់កម្រិតបច្ចេកទេសមួយពាក់ព័ន្ធ លើការតភ្ជាប់ប្រព័ន្ធចែករំលែកទិន្នន័យ និងពិនិត្យលើការរៀបចំសេចក្តីណែនាំនីតិវិធីចុះបញ្ជីគម្រោងវិនិយោគនៅថ្នាក់ក្រោមជាតិ រវាងក្រុមប្រឹក្សាអភិវឌ្ឍន៍កម្ពុជា និងក្រសួងមហាផ្ទៃ ។
កិច្ចប្រជុំនេះ គឺដឹកនាំដោយ លោក ហ៊ាង សុទ្ធាយុត្តិ អគ្គលេខាធិការរងនៃអគ្គលេខាធិការដ្ឋានក្រុមប្រឹក្សាអភិវឌ្ឍន៍កម្ពុជា និងលោកឧត្តមសេនីយ៍ឯក ហោ សំអាត អគ្គនាយកនៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ក្រសួងមហាផ្ទៃ ព្រមទាំងក្រុមការងារជំនាញសរុបប្រមាណ៤០រូប ។ កិច្ចប្រជុំពិគ្រោះយោបល់កម្រិតបច្ចេកទេសនេះ ត្រូវបានរៀបចំឡើង ដើម្បីពិនិត្យលើការតភ្ជាប់ប្រព័ន្ធចែករំលែកទិន្នន័យ និងនីតិវិធីចុះបញ្ជីគម្រោងវិនិយោគនៅថ្នាក់ក្រោមជាតិ តាមប្រព័ន្ធគ្រប់គ្រងគម្រោងវិនិយោគកម្ពុជា ដែលគេអាចហៅកាត់ថា ប្រព័ន្ធ cdcIPM ។
នេះ គឺជាជំហានថ្មីមួយ ក្រោយពេលដែលកិច្ចប្រជុំមួយបានរៀបចំឡើង កាលពីខែកុម្ភៈដឹកនាំប្រជុំដោយផ្ទាល់ដោយ លោក ស៊ុន ចាន់ថុល ឧបនាយករដ្ឋមន្ត្រីនិងជាអនុប្រធានទី១ នៃក្រុមប្រឹក្សាអភិវឌ្ឈន៍កម្ពុជា ដើម្បីធានាបាននូវភាពធន់ និងចីរភាពនៃការរៀបចំយន្តការប្រទាក់ក្រឡា និងមានសង្គតិភាពនៃលំហូរការងារពីថ្នាក់ជាតិដល់ថ្នាក់ក្រោមជាតិ ជុំវិញការគ្រប់គ្រងការចុះបញ្ជី និងការត្រួតពិនិត្យតាមដានការអនុវត្តគម្រោងវិនិយោគ ។
ពាក់ព័ន្ធនឹងកិច្ចប្រជុំនេះវាហាក់ជាកិច្ចប្រជុំក្រុមអ្នកបច្ចេកទេសធម្មតា ប៉ុន្តែវាមិនមែនដូចការគិតឡើយ ហើយកិច្ចការនេះអាចជាការបន្ថែមបន្ទុកការងារ និងការទទួលខុសត្រូវបន្ថែមមួយកម្រិតទៀត ដល់ស្ថាប័ននៅតាមខេត្ត និងរាជធានី ដើម្បីជួយលើកកម្ពស់កិច្ចការទាក់ទាញវិនិយោគដែលជាប្រភពចំណូលដ៏មាននិរន្តភាពសម្រាប់ជាតិ និងប្រជាជន ។ កិច្ចការងារនេះដែរ គឺជាទិសដៅដែលបានដាក់ចេញដោយសម្ដេចធិបតីនាយករដ្ឋមន្ត្រី កាលពីថ្ងៃទី២០ ខែធ្នូ ឆ្នាំ២០២៤ ហើយគ្រោងនឹងដាក់អោយដំណើរការសាកល្បង នៅត្រីមាសទី២ ជាមូលដ្ឋានឆ្ពោះទៅដាក់ឱ្យប្រើប្រាស់ជាផ្លូវការនៅត្រីមាសទី៣ ឆ្នាំ២០២៥នេះតែម្តង ។
រាជរដ្ឋាភិបាលក្រៅពីដាក់ចេញយន្តការត្រួតពិនិត្យ និងបង្រៀនមន្ត្រីមូលដ្ឋានឲ្យចេះចាយលុយឲ្យត្រូវគោលដៅហើយនោះនៅពេលនេះក៏បានដាក់គោលដៅឲ្យអស់លោកជួយទាក់ទាញរកប្រាក់មកពង្រឹងសេដ្ឋកិច្ចតាមការប្រគល់ភារកិច្ចឲ្យុថ្នាក់ក្រោមជាតិ ជាពិសេស គឺថ្នាក់ខេត្ត និងរាជធានីជួយទាក់ម៉ូយ ឬរកអ្នកវិនិយោគមកដាក់ទុននៅក្នុងខេត្ត ដើម្បីរដ្ឋអាចប្រមូលពន្ធបង្កើតការងារធ្វើជូនពលរដ្ឋ ។ល។
នៅតាមកម្មវិធីសាធារណៈនានាកន្លងមក សម្តេចធិបតី ក៏បានលើកទឹកចិត្តឲ្យអាជ្ញាធរខេត្ត និងរាជធានីប្រឡងប្រជែងគ្នា នៅក្នុងកិច្ចការនេះខណៈដែលបច្ចុប្បន្នរាល់គម្រោងទាំងអស់ គឺធ្វើចេញ និងទាក់ទាញដោយថ្នាក់ជាតិ ។
សរុបទៅកិច្ចការនេះ មិនធម្មតាឡើយ ហើយវាជាកិច្ចការលំបាកមួយ ដែលទាមទារឲ្យថ្នាក់ខេត្ត និងរាជធានី មានការដាក់ចេញនូវគោលនយោបាយ និងយុទ្ធសាស្ត្រច្បាស់លាស់នៅក្នុងការរៀបចំខ្លួនតាំងពីការធ្វើទីផ្សារ ការផ្សព្វផ្សាយ ការគ្រប់គ្រងការងារ …។ល។ នេះ គឺជាទស្សនៈវិស័យ និងការកំណត់ការវាយតម្លៃរបស់ថ្នាក់ដឹកនាំខេត្តទាក់ទងនឹងសមត្ថភាពនៃការចេះចាយលុយ និងរកលុយជួយទ្រទ្រង់សេដ្ឋកិច្ចរបស់រដ្ឋាភិបាលនៅក្នុងដំណើរការអភិវឌ្ឍន៍ជាតិឆ្ពោះទៅរកចក្ខុវិស័យនៅក្នុងការប្រែក្លាយកម្ពុជា ជាប្រទេសដែលមានចំណូលខ្ពស់ នៅឆ្នាំ២០៥០ ៕
ចែករំលែកព័តមាននេះ