ទីក្រុងជេដា៖ គណៈប្រតិភូអាមេរិក និងអ៊ុយក្រែនចាប់ផ្ដើមជួបគ្នានៅល្ងាចនេះនៅអារ៉ាប៊ីសាអូឌីតដើម្បីរកវិធីបញ្ចប់សង្គ្រាមអ៊ុយក្រែន។ មុនកិច្ចជំនួបនេះតែប៉ុន្មានម៉ោងប៉ុណ្ណោះ អ៊ុយក្រែនបានពន្លះរុស្ស៊ីមួយប្រាវដោយដ្រូនជាង៣០០គ្រឿងហោះងងឹតមេឃសំដៅទៅទីក្រុងម៉ូស្គូ តំបន់ខឺស និងទីក្រុងតូច-ធំដទៃទៀត។ ប៉ុន្តែការវាយប្រហារនោះមិនបានបង្កគ្រោះថ្នាក់ធំដុំទេដោយសារខែលការពារមីស៊ីលរបស់រុស្ស៊ីអាចបាញ់ទម្លាក់ស្ទើរតែទាំងអស់។
ឥឡូវនេះ គេដឹងថាអ៊ុយក្រែនចង់ស្នើសុំឱ្យរុស្ស៊ីឈប់បាញ់គ្នាជើងទឹក និងជើងអាកាស។ លោកហ្សេឡិនស្គីសង្ឃឹមថាកិច្ចជំនួបនៅអារ៉ាប៊ីសាអូឌីតនោះនឹងកែសម្រួលទំនាក់ទំនងឡើងវិញបន្ទាប់ពីមានទំនាស់ពាក្យសម្ដីគ្នានៅសេតវិមានធ្វើឱ្យលោកត្រាំខឹងសម្បារយ៉ាងច្បាំង។ លោកសម្រេចចិត្តផ្ដាច់ជំនួយយោធា និងព័ត៌មានសម្ងាត់។ អាមេរិកព្រមានថាទាល់តែហ្សេឡិនស្គីសូមទោសដោយស្មោះអស់ពីដួងចិត្តទើបលោកត្រាំយល់ព្រមសន្ដោសប្រណី និងពិចារណាជួយអ៊ុយក្រែនជាថ្មី។
កាលពីមុននេះ លោកត្រាំធ្លាប់និយាយនៅនឹងមុខថាលោកហ្សេឡិនស្គីមិនទាន់ត្រៀមខ្លួនដើម្បីចរចាសន្តិភាព និងត្រៀមជជែកគ្នាដោយផ្ទាល់ជាមួយរុស្ស៊ីនៅឡើយទេ។ លោកហ្សេឡិនស្គីចង់បង្ហាញថាគាត់ពិតជាចង់បញ្ចប់សង្គ្រាមឱ្យបានឆាប់រហ័សតាមដែលអាចធ្វើទៅបាន។ ហេតុនេះគាត់ក៏ស្នើសុំឱ្យមានបទឈប់បាញ់។ ការស្នើសុំនេះក៏ស្របពេលដែលទីក្រុងវ៉ាស៊ីនតោនដាក់សម្ពាធកាន់តែខ្លាំងដើម្បីឱ្យភាគីទាំង២ចូលតុលចរចា។
តាំងពីមុនមានកិច្ចជំនួបនៅអារ៉ាប៊ីសាអូឌីត លោកហ្សេឡិនស្គីបានបង្ហោះនៅលើបណ្ដាញអ៊ិច និងបង្ហាញសុទិដ្ឋិនិយមថានឹងមានលទ្ធផលល្អ។ លោកថាអ៊ុយក្រែនប្រកានជំហរបែបស្ថាបនានៅក្នុងកិច្ចជំនួបនេះ។ ទន្ទឹមនឹងនោះ លោកក៏កំពុងបោះដៃទៅរកអឺរ៉ុបដើម្បីឱ្យពួកគេគាំទ្រសំណើនៃបទឈប់បាញ់ផងដែរ។ លោកយល់ថានេះជាវិញ្ញាសាសាកល្បងសម្រាប់ទីក្រុងម៉ូស្គូ។ បើពួកគេទទួលយកសំណើនេះមានន័យថាពួកគេចង់បានសន្តិភាព។
ឥឡូវនេះ អ៊ុយក្រែនកំពុងព្យាយាមកែសម្រួលទំនាក់ទំនងជាមួយអាមេរិកឡើងវិញខណៈដែលកិច្ចព្រមព្រៀងរ៉ែកម្រស្ថិតនៅក្នុងភាពមិនច្បាស់លាស់។ រដ្ឋមន្ត្រីការបរទេសអាមេរិកថ្លែងថារដ្ឋាភិបាលរបស់លោកចង់ធ្វើឱ្យប្រាកដថាអ៊ុយក្រែនបានត្រៀមខ្លួនរួចរាល់ដើម្បីធ្វើសម្បទានជាថ្នូរនឹងសន្តិភាព។ ខាងភាគីអាមេរិកមានរដ្ឋមន្ត្រីការបរទេស និងទីប្រឹក្សាសន្តិសុខជាតិ។ ចំណែកខាងភាគីអ៊ុយក្រែនមានរដ្ឋមន្ត្រីការបរទេស ទីប្រឹក្សាសន្តិសុខជាតិ និងជំនួយការរបស់លោកហ្សេឡិនស្គី។
លោកហ្សេឡិនស្គីគ្រាន់តែចូលគាល់រាជទាយាទប៊ីនសាល់ម៉ាន់ រួចហើយលោកចាកចេញពីទីនោះ។ មានន័យថាមិនបានចូលរួមនៅក្នុងកិច្ចជំនួបទ្វេភាគីថ្ងៃនេះទេ។ តាំងពីមុនចេញដំណើរទៅអារ៉ាប៊ីសាអូឌីត លោកស្ទីវវីតខូសដែលជាប្រេសិតពិសេសរបស់លោកត្រាំថ្លែងថាភាគីទាំង២អាចនឹងចុះហត្ថលេខាលើកិច្ចព្រមព្រៀងរ៉ែកម្រនៅក្នុងពេលឆាប់ៗនេះ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ