ខេត្តកណ្តាល ៖ ហោចណាស់ក្មេងទំនើង ចំនួន៦នាក់ ក្នុងចំណោមបក្ខពួក៧នាក់ ត្រូវបានកម្លាំងសមត្ថកិច្ចនគរបាលស្រុកអង្គស្នួល ខេត្តកណ្តាល ធ្វើការឃាត់ខ្លួន កាលពីថ្ងៃទី១០ ខែមីនា…
ខេត្តកណ្តាល ៖ ហោចណាស់ក្មេងទំនើង ចំនួន៦នាក់ ក្នុងចំណោមបក្ខពួក៧នាក់ ត្រូវបានកម្លាំងសមត្ថកិច្ចនគរបាលស្រុកអង្គស្នួល ខេត្តកណ្តាល ធ្វើការឃាត់ខ្លួន កាលពីថ្ងៃទី១០ ខែមីនា ឆ្នាំ២០២៥ នៅចំណុចផ្លូវបេតុង ភូមិត្រពាំងភូមិ ឃុំពើក ខណៈក្រុមក្មេងទំនើងទាំង៦-៧នាក់នោះ ជិះម៉ូតូពពាក់ពពូន កាន់កាំបិតផ្គាក់ និងដាវ ហើយមានជម្លោះជាមួយអ្នកដំណើរ លើដងផ្លូវ ថែមទៀតផង ។
ក្មេងទំនើងទាំង៦នាក់ រួមមាន ៖
១. ឈ្មោះ ថន ម៉េងហៀ ភេទប្រុស អាយុ២៣ឆ្នាំ មុខរបរ កម្មករ រស់នៅភូមិស្វាយឧត្ដម ឃុំសំរោងលើ ស្រុកអង្គស្នួល ខេត្ដកណ្ដាល (អ្នកបើកម៉ូតូ)។
២. ឈ្មោះ ហួត ម៉េងហួ ភេទប្រុស អាយុ២០ឆ្នាំ មុខរបរ កម្មករ រស់នៅភូមិដំណាក់អំពិល ឃុំដំណាក់អំពិល ស្រុកអង្គស្នួល ខេត្តកណ្តាល (អ្នកកាន់ដាវ) ។
៣. ឈ្មោះ ផា ពិសិទ្ធ ហៅ ខ្មៅ ភេទប្រុស អាយុ១៩ ឆ្នាំ មុខរបរកម្មករ រស់នៅភូមិត្រយឹង ឃុំពើក ស្រុកអង្គស្នួល ខេត្តកណ្តាល (អ្នកបើកម៉ូតូ) ។
៤. ឈ្មោះ វុត្ថា ផានិត ភេទប្រុស អាយុ១៨ ឆ្នាំ មុខរបរ កម្មករ រស់នៅភូមិត្រយឹង ឃុំពើក ស្រុកអង្គស្នួល ខេត្តកណ្ដាល (អ្នកចូលរួម) ។
៥. ឈ្មោះ ណាត វណ្ណូ ភេទប្រុស អាយុ១៦ ឆ្នាំ រស់នៅភូមិត្រយឹង ឃុំពេីក ស្រុកអង្គស្នួល ខេត្តកណ្តាល (អ្នកចូលរួម) ។
៦. ឈ្មោះ ណាត វណ្ណេត ភេទប្រុស អាយុ២០ ឆ្នាំ មុខរបរ កម្មករ រស់នៅភូមិត្រយឹង ឃុំពើក ស្រុកអង្គស្នួល ខេត្តកណ្តាល (អ្នកកាន់កាំបិតផ្គាក់) ។ និងម្នាក់ កំពុងគេចខ្លួន។
ក្នុងនោះសមត្ថកិច្ចបានធ្វើការដកហូតវត្ថុតាង និងម៉ូតូចំនួន០៣ គ្រឿង ៖
១. ម៉ូតូម៉ាកសង់ C១២៥ ពណ៌ខ្មៅ ផលិតឆ្នាំ២០២៣ ពាក់ផ្លាកលេខ ភ្នំពេញ 1JY-5444 ។
២. ម៉ូតូម៉ាកសង់ C១២៥ ពណ៌ខ្មៅ ផលិតឆ្នាំ២០១២ ឡើងតែមឆ្នាំ២០២២ ពាក់ផ្លាកលេខ កំពង់ស្ពឺ 1G-0762 មួយគ្រឿង
៣. ម៉ូតូម៉ាកសង់ C១២៥ ព៌ណខ្មៅ ផលិតឆ្នាំ២០២១ ពាក់ផ្លាកលេខ កំពង់ស្ពឺ 1S-9487 មួយគ្រឿង ។
-កាំបិតផ្គាក់ដងឬស្សីមួយ និងអាវុធកែច្នៃដាវមួយ
-ទូរសព្ទដៃ ចំនួន០៤ គ្រឿង ម៉ាកវីវ៉ូ ព៌ណខ្មៅ ០១គ្រឿង ម៉ាកអូប៉ូ ព៌ណខ្មៅ ០១គ្រឿង ម៉ាកអាយហ្វូន១១ ព៌ណស្វាយ ០១គ្រឿង និងម៉ាកអាយហ្វូន១១ ព៌ណក្រហម ០១គ្រឿង ។
ការឃាត់ខ្លួនក្រុមក្មេងទំនើងខាងលើនេះ ត្រូវបានសមត្ថកិច្ចបង្ហើបឲ្យដឹងថា កម្លាំងប៉ុស្ដិ៍នគរបាលរដ្ឋបាលពើក សហការណ៍ជាមួយប្រជាការពារភូមិ បានដើរចេញល្បាតនៅក្នុងមូលដ្ឋាន ហើយក៏ទទួលបានព័ត៌មានពីប្រជាពលរដ្ឋល្អ ថា ឃើញក្មេងទំនើងមួយក្រុមប្រមាណជិត១០នាក់ មធ្យោបាយដោយជិះចំនួនម៉ូតូ ៣គ្រឿង ខ្លះកាន់ដាវ ខ្លះកាន់កាំបិតផ្គាក់ ជិះម៉ូតូពពាក់ពពូនគ្នាទៅមក ហើយក៏មានជម្លោះជាមួយភាគីម្នាក់ទៀត ដែលកំពុងធ្វើដំណើរលើដងផ្លូវដូចគ្នា។ ក្រោយពីទទួលបានព័ត៌មាននោះភ្លាម កម្លាំងនគរបាលប៉ុស្ដិ៍ពើក និងកម្លាំងប្រជាការពារភូមិ បានទៅដល់កន្លែងកើតហេតុ ហើយក៏បានធ្វើការឃាត់ខ្លួនក្មេងទំនើងម្នាក់ និងវត្ថុតាងមួយចំនួន នាំទៅអធិការដ្ឋាននគរបាលស្រុកអង្គស្នួល ដើម្បីសួរនាំ ។
នៅចំពោះមុខសមត្ថកិច្ចក្មេងទំនើងឈ្មោះ ថន ម៉េងហៀ បានឆ្លើយសារភាពថា ថ្ងៃកើតហេតុ បក្ខពួករបស់ខ្លួនមានគ្នា០៧នាក់ បានជិះម៉ូតូម៉ាកសង់ ១២៥ ពណ៌ខ្មៅ ៣គ្រឿង ទៅផឹកស្រាបៀរនៅផ្ទះមិត្ដភក្ដិ ភូមិត្រយឹង ឃុំពើក ស្រុកអង្គស្នួល ខេត្តកណ្តាល។ លុះពេលផឹកស៊ីរួចរាល់ហើយ ពួកគេក៏នាំគ្នាជិះម៉ូតូត្រឡប់ចេញពីភូមិនោះវិញ ពេលទៅដល់ភូមិត្រពាំងភូមិ ឃុំពើក ឈ្មោះ ផា ពិសិទ្ធ ហៅខ្មៅ និងឈ្មោះ ទិត បានឈ្លោះគ្នាជាមួយអ្នកដំណើរ ស្នាក់នៅផ្ទះជួលក្បែរគ្នា ទើបខ្លួន និងឈ្មោះ ណាត ណេត និងឈ្មោះ ហួត ម៉េងហួ បានជិះម៉ូតូទៅយកដាវ និងកាំបិតផ្គាក់ពីផ្ទះ ឈ្មោះ ណាត ណេត ហើយត្រឡប់ទៅវិញ ស្រាប់តែភាគីម្ខាងនោះវិលចូលផ្ទះអស់ ចំណែកបក្ខពួករបស់ខ្លួនបានជិះហួសទៅឈប់លើផ្លូវបេតុងមួយ ក៏ត្រូវសមត្ថកិច្ចនគរបាលប៉ុស្ដិ៍ និងប្រជាការពារឃាត់ខ្លួនតែម្ដង ។
ក្រោយពីស្តាប់ចម្លើយសារភាពជនទំនើងម្នាក់នោះ លោកអធិការនគរបាលស្រុកអង្គស្នួល បានកំណត់មុខសញ្ញា បក្ខពួក៥ នាក់ទៀត និងបានរាយការជូនទៅលោកស្នងការ នៃស្នងការដ្ឋាននគរបាលខេត្តកណ្តាល ដើម្បីចាត់ការបន្ត ។ លុះនៅព្រឹកថ្ងៃទី១១ ខែឆ្នាំដដែល កម្លាំងជំនាញស្រុក សហការជាមួយកម្លាំងនគរបាលប៉ុសុ៍តរដ្ឋបាលពើក និងនគរបាលប៉ុសិ៍តដំណាក់អំពិល ស្រាវជ្រាវឈានដល់ការឃាត់ខ្លួនជាបន្តបន្ទាប់ បានចំនួន០៥ នាក់ទៀត ។
ទីបំផុតក្មេងទំនើង ទាំង៦នាក់នោះ ត្រូវបានសមត្ថកិច្ច កសាងសំណុំរឿងបញ្ជូនទៅសាលាដំបូងខេត្តតាមនីតិវិធី ៕
ចែករំលែកព័តមាននេះ