ខេត្តកំពង់ឆ្នាំង ៖ បុរសជាប្តីបានស្លាប់នៅនឹងកន្លែង ចំណែកស្ត្រីជាភរិយារងរបួសធ្ងន់ ក្នុងហេតុ ការណ៍គ្រោះថ្នាក់ចរាចរណ៍លើផ្លូវដែក ត្រូវរថភ្លើងបុកខ្ទាតផុតពីផ្លូវដែក ។ ហេតុការណ៍នេះ បានកើតឡើងនៅវេលាម៉ោង៨និង១០នាទីព្រឹកថ្ងៃទី១០…
ខេត្តកំពង់ឆ្នាំង ៖ បុរសជាប្តីបានស្លាប់នៅនឹងកន្លែង ចំណែកស្ត្រីជាភរិយារងរបួសធ្ងន់ ក្នុងហេតុ ការណ៍គ្រោះថ្នាក់ចរាចរណ៍លើផ្លូវដែក ត្រូវរថភ្លើងបុកខ្ទាតផុតពីផ្លូវដែក ។ ហេតុការណ៍នេះ បានកើតឡើងនៅវេលាម៉ោង៨និង១០នាទីព្រឹកថ្ងៃទី១០ ខែមីនា ឆ្នាំ២០២៥ នៅលើផ្លូវរថភ្លើងត្រង់ចំណុចគីឡូម៉ែត្រលេខ២៨-២៩ ស្ថិតនៅក្នុងភូមិស្រែតាជ័យខាងលិច ឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង ។
ប្រភពពីសមត្ថកិច្ចនៅកន្លែងកើតហេតុបានឱ្យដឹងថា មុនពេលកើតហេតុ គេឃើញបុរសជាជនរងគ្រោះឈ្មោះ ជា សុផាត អាយុ៦៥ឆ្នាំ រស់នៅភូមិចាន់ត្រក ឃុំក្រាំងស្គា ស្រុកទឹកផុស បានដឹកស្ត្រីជាភរិយាឈ្មោះ អ៊ុន សុផានី អាយុ៥៣ឆ្នាំ តាមម៉ូតូម៉ាកហុងដាសេ១២៥ ពាក់ផ្លាកលេខកំពង់ឆ្នាំង 1L3657 ក្នុងដំណើរពីលិចទៅកើត ។
លុះមកដល់ចំណុចកើតហេតុ ត្រូវរថភ្លើង ១គ្រឿង ពាក់ផ្លាកលេខ១០៣៥ ពណ៌ខៀវលាយលឿង បុកម៉ូតូដែលជិះជិតផុតទៅហើយ បើកពីទិសខាងត្បូងឆ្ពោះទៅទិសខាងជើងខ្វែងទើសគ្នាបណ្ដាលឱ្យស្លាប់បុរសជាប្ដីនៅនឹងកន្លែង ។ ចំណែកប្រពន្ធត្រូវបានបញ្ជូនទៅសង្គ្រោះនៅមន្ទីរពេទ្យ ។
អ្វីដែលមានការកត់សម្គាល់នោះប្តី-ប្រពន្ធរងគ្រោះទាំង២បានពាក់មួកសុវត្ថិភាព ខណៈគេឃើញគាត់ជិះម៉ូតូឆ្លងផ្លូវដែកនោះប្រហែលគាត់ស្តាប់មិនឮស៊ីផ្លេរថភ្លើង ហើយក៏មានគេស្រែកឃាត់មិនឱ្យឆ្លង នៅតែស្តាប់មិនឮទៀតបានបោះពួយម៉ូតូឆ្លងកាត់រហូតមានគ្រោះថ្នាក់ ។
ដោយឡែក ម៉ូតូបានយកមករក្សាទុកនៅអធិការនគរបាលស្រក់ទឹកផុស ដើម្បីរង់ចាំការដោះ ស្រាយតាមនីតិវិធី ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ