បឹងរំលាចដែលត្រូវអភិរក្សជាតំបន់បៃតង និងជាជម្រកត្រីដែលការពារដោយសហគមន៍ជលផល និងគាំទ្រដោយអាជ្ញាធរខេត្តក្រចេះមានផ្នែកជំនាញបរិស្ថាន និងជាប្រភពធនធានទឹក និងធនធានជលផលដ៏សំខាន់ផងនោះ ត្រូវបានគេឃុបឃិតគ្នាជាប្រព័ន្ធអង្កន់ពុះដីចំណីមាត់បឹងចែកគ្នាធ្វើជាកម្មសិទ្ធិ និងចាក់ដីលុបជាបណ្តើរៗហើយ ។ តាមទំហំនៃការចាក់ដីលុបនេះសង្ស័យបឹងទាំងមូលនឹងក្លាយជាកម្មសិទ្ធិអ្នកមានអំណាចមួយនោះ ក្នុងខេត្តមិនខានឡើយ…
បឹងរំលាចដែលត្រូវអភិរក្សជាតំបន់បៃតង និងជាជម្រកត្រីដែលការពារដោយសហគមន៍ជលផល និងគាំទ្រដោយអាជ្ញាធរខេត្តក្រចេះមានផ្នែកជំនាញបរិស្ថាន និងជាប្រភពធនធានទឹក និងធនធានជលផលដ៏សំខាន់ផងនោះ ត្រូវបានគេឃុបឃិតគ្នាជាប្រព័ន្ធអង្កន់ពុះដីចំណីមាត់បឹងចែកគ្នាធ្វើជាកម្មសិទ្ធិ និងចាក់ដីលុបជាបណ្តើរៗហើយ ។ តាមទំហំនៃការចាក់ដីលុបនេះសង្ស័យបឹងទាំងមូលនឹងក្លាយជាកម្មសិទ្ធិអ្នកមានអំណាចមួយនោះ ក្នុងខេត្តមិនខានឡើយ ។
ទីតាំងមាត់បឹងរំលាចដែលគេប្រើគ្រឿងចក្រឈូសឆាយព្រៃលិចទឹក និងដឹកដីចាក់លុបនោះស្ថិតនៅភូមិស្រែស្តៅ សង្កាត់អូរឫស្សី ក្រុងក្រចេះ ខេត្តក្រចេះចំតួតែម្តង កោតគេហ៊ានម្លុឹងៗ ។
បើតាមប្រភពពីប្រជាពលរដ្ឋបានបង្ហើបថា ផែនការចាក់ដីលុបចំណីមាត់បឹងនោះមានទំហុំរហូតដល់ទៅជាង១០ហិកតាឯណោះទើបឆ្អែតពោះក្របី…ហេ! ហេ!
ប្រភពបន្តថា ពេលនេះគេទើបតែឈូសឆាយ និងចាក់ដីបានប្រមាណជា៣ហិកតាប៉ុណ្ណោះដោយរលូនគ្មានមេធំណាហ៊ានរារាំងឡើយ ។
ប្រភពបានបង្ហើបទៀតមកថា ការប្រើគ្រឿងចក្រ ធ្វើសកម្មភាពចាក់លុបដីចំណីមាត់បឹងតំបន់បៃតងបឹងរំលាច នៅចំកណ្ដាលក្រុងក្រចេះប្រមាណ១០ហិកតានោះ គឺជាស្នាដៃអ្នកមានអំណាចខាងចាប់ចងក្នុងខេត្តក្រចេះដោយប្រើត្រឹមលិខិតផ្ទេរសិទ្ធិដែលចុះហត្ថលេខាត្រឹមលោកចៅសង្កាត់អូរឫស្សីដ៏មហិមានៃក្រុងក្រចេះ យកជាការបានយ៉ាងស្ងៀមស្ងាត់ ។
ប្រភពពីប្រជាពលរដ្ឋនៅក្រុងក្រចេះ បានឲ្យដឹងថា អ្នកមានមហាអំណាចក្នុងខេត្តទាំងមូលនៅពេលថ្មីៗនេះ បានប្រើគ្រឿងចក្រលើកក្រវាត់ជុំវិញដីនៅមាត់បឹងរំលាចដែលត្រូវអភិរក្សជាតំបន់បៃតង និងជាជម្រកត្រីដែលការពារដោយសហគមន៍ជលផល និងគាំទ្រដោយអាជ្ញាធរខេត្តក្រចេះ និងផ្នែកជំនាញបរិស្ថាន ហើយជាប្រភពធនធានទឹក និងធនធានជលផលដ៏សំខាន់ក្នុងក្រុងក្រចេះនោះផងដែរ ។
នៅក្នងសកម្មភាពឈូសព្រៃលិចទឹក និងចាក់ដីលុបមាត់បឹងតំបន់អភិរក្សធនធានជលផល និងតំបន់បៃតងធម្មជាតិ កណ្តាលក្រុងក្រចេះរបស់អ្នកមានអំណាចម្នាក់នេះ ពុំមានអាជ្ញាធរ និងមន្ត្រីជំនាញពាក់ព័ន្ធហ៊ានទៅអើតមើលនិងហាមឃាត់នោះទេ ដោយសារតែលោកជាមេចាប់ចងក្នុងខេត្តទទួលខុសត្រូវក្នុងការបង្ក្រាបបទល្មើលធនធានធម្មជាតិនេះដែរ ។
ជាក់ស្តែងពេលថ្មីៗនេះ កម្លាំងអាវុធហត្ថខេត្តក្រចេះ បានចាប់ខ្លួនមនុស្សបីនាក់ និងគ្រឿងចក្រ២គ្រឿង ដែលឈូសដីចម្ការពួកគាត់ធ្លាប់អាស្រ័យផល នៅឃុំចង្រង ស្រុកចិត្របុរី ដោយមានលិខិតផ្ទេរសិទ្ធិត្រឹមមេឃុំចង្ក្រង ដូចលិខិតផ្ទេរសិទ្ធិរបស់មេអំណាចដែលឈូសព្រៃលិចទឹកលុបដីតំបន់អភិរក្សធនធានជលផលបឹងរំលាចអីុចឹងដែរ ។
ទាក់ទឹននិងករណីឈូសដីព្រៃលិចទឹកនិងចាក់ដីលប់បឹងរំលាចនោះមិនអាចសុំការបំភ្លឺពីអ្នករំលោភដ៏មហិមានេះបាននៅឡើយ ។ មន្ត្រីពាក់ព័ន្ធនឹងការគ្រប់គ្រងបឹងរំលាចនេះ នៅពេលកោះសន្តិភាពសុំការបំភ្លឺ មិនហ៊ានឆ្លើយបំភ្លឺនោះទេ ដោយម្នាក់រុញទៅម្នាក់ ដោយសារតែអ្នកដែលឈូសព្រៃលិចទឹកចាក់ដីលុបមាត់បឹងរំលាចនោះជា«មេអំណាចធំក្នុងខេត្តក្រចេះ» ដ៏មានឥទ្ធិ
ពល ។
មហាជននៅក្រុងក្រចេះ កំពុងរង់ចាំមើលចំណាត់ការថ្នាក់លើ តើហ៊ានរារាំងការចាក់ដីលុបបឹងនេះបានដែរឬអត់ ? តើហ៊ានប្រកាសឱ្យកាយដីចេញវិញដែរឬអត់ ? ពេលណាមានព័ត៌មានប្លែក ឬសុំបំភ្លឺ យើងនឹងផ្សាយជូនបន្តទៀត ។
សង្ស័យដូចរកសង្ឃឹមមិនឃើញសោះ…ហេ ! ហេ !
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ