រាជធានីភ្នំពេញ ៖ ទោះបីមានភ្លៀង ក៏បងប្អូនប្រជាពលរដ្ឋបន្តគាំទ្រយ៉ាងច្រើនកុះករ សម្រាប់សប្តាហ៍ទី១ នៃខែមីនា ឆ្នាំ២០២៥ នារាត្រីថ្ងៃទី៩ មីនានេះ នាផ្លូវថ្មើរជើង…
រាជធានីភ្នំពេញ ៖ ទោះបីមានភ្លៀង ក៏បងប្អូនប្រជាពលរដ្ឋបន្តគាំទ្រយ៉ាងច្រើនកុះករ សម្រាប់សប្តាហ៍ទី១ នៃខែមីនា ឆ្នាំ២០២៥ នារាត្រីថ្ងៃទី៩ មីនានេះ នាផ្លូវថ្មើរជើង (Walk Street) ភ្នំពេញ ត្រូវបានរដ្ឋបាលរាជធានីភ្នំពេញ រៀបចំបន្ថែមថ្មីឱ្យមានរបាំភួងនារី (របាំបុរាណ) និងកំប្លែង(នាយក្រឹម) ហើយក្រៅពីហ្នឹង នៅមានជារបាំនេសាទ (របាំប្រពៃណី), ការសម្តែងតន្ត្រីបុរាណ, មហោរី និងរបាំប្រពៃណី, រាំវង់, សៀករហ័សកម្ម, ចាប៉ីសហគមន៏, បណ្ណាល័យចល័ត។ល។ ដើម្បីបម្រើឱ្យការកំសាន្តសប្បាយរបស់ភ្ញៀវទេសចរជាតិ និងអន្តជាតិ ។
បើទោះបីនៅយប់ថ្ងៃទី៩ មីនានេះ មានភ្លៀងខ្យល់យ៉ាងណាក្ដី ក៏គេឃើញបងប្អូនប្រជាពលរដ្ឋ និងភ្ញៀវទេសចរបរទេស នៅតែទៅដើរកំសាន្តនៅលើផ្លូវថ្មើរជើង ច្រើនដដែល ។ នេះបើយោងតាមការឱ្យដឹងពីលោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យសាលារាជធានីភ្នំពេញ នារសៀលថ្ងៃទី៩ មីនានេះ ។
ពីមួយសប្តាហ៍ទៅមួយសប្តាហ៍ ដោយអនុវត្តទៅតាមការចង្អុលបង្ហាញរបស់លោក ឃួង ស្រេង អភិបាល នៃគណៈអភិបាលរាជធានីភ្នំពេញ នៅផ្លូវថ្មើរជើង Walk Street មាត់ទន្លេ ត្រូវបានរៀបចំបន្ថែមជាបន្តបន្ទាប់ ទាំងការតាំងលក់វត្ថុអនុស្សាវរីយ៍ ការសម្តែងតន្ត្រីបុរាណ, របាំប្រពៃណី, រៀបចំជាបណ្ណាល័យចល័ត, សៀករហ័សកម្មជាដើម ដើម្បីបង្កើននូវភាពសប្បាយរីករាយឱ្យប្រជាពលរដ្ឋនាចុងសប្តាហ៍។ ដូច្នេះសូមអញ្ជើញបងប្អូនប្រជាពលរដ្ឋ ភ្ញៀវជាតិ អន្តរជាតិ មកដើរលេងកម្សាន្តសប្បាយទាំងអស់គ្នា ក្រោមម្លប់ នៃសន្តិភាព ។
លោកស្រីអ្នកនាំពាក្យ បានបញ្ជាក់ដែរថា ផ្លូវថ្មើរជើង (Walk Street) ជាកន្លែងដែលភ្ញៀវជាតិ អន្តរជាតិ កំពុងពេញនិយម ដោយពីមួយសប្តាហ៍ ទៅមួយសប្តាហ៍ កំណើនភ្ញៀវចេះតែកើនឡើងជាលំដាប់។ ដោយឡែក រដ្ឋបាលរាជធានីភ្នំពេញ ដើម្បីបំពេញនូវសំណូមពររបស់ប្រជាពលរដ្ឋ ក៏បានកែសម្រួលតម្រាយខ្សែរត់ ខ្សែទី១C និងបន្ថែមម៉ោងប្រតិបត្តិការ សេវាដឹកជញ្ជូនសាធារណៈ រថយន្តក្រុង ដោយអនុវត្តនៅរៀងរាល់ ថ្ងៃសៅរ៍ និងថ្ងៃអាទិត្យ នៃសប្តាហ៍ រហូតដល់ម៉ោង ១១:០០នាទីយប់ថែមទៀត ។
គិតត្រឹមថ្ងៃទី៩ មីនានេះ ផ្លូវថ្មើរជើង (Walk Street) បានដាក់ឱ្យដំណើរការបានរយៈពេល១ខែ និង១សប្ដាហ៌ហើយ តែចំពោះសន្តិសុខ សុវត្ថិភាព សណ្ដាប់ធ្នាប់គឺទទួលបានល្អឥតខ្ចោះ ប្រជាពលរដ្ឋ មិនមានបញ្ហាអ្វីទាំងអស់ រាប់ទាំងអ្នកធ្វើមុខរបរអាជីវកម្ម ក៏ដូចជាប្រជាពលរដ្ឋ ដែលធ្វើដំណើរកម្សាន្ត ។
គួរបញ្ជាក់ថា៖ ផ្លូវថ្មើរជើង (Walk Street) ត្រូវបានរដ្ឋបាលរាជធានីភ្នំពេញ ដាក់ឱ្យដំណើរការសាកល្បង២ថ្ងៃ ក្នុង១សប្ដាហ៌ គឺថ្ងៃសៅនិងថ្ងៃអាទិត្យ ចាប់ពីម៉ោង៦ល្ងាចដល់ម៉ោង១១យប់ នៅតាមបណ្តោយតីរវិថីព្រះស៊ីសុវត្ថិ ចាប់ពីវិថីបក្សីចាំក្រុង (ផ្លូវលេខ៩៤) រហូតដល់មុខព្រះបរមរាជវាំង ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ