ប្រទេសថៃ ៖ ប្រទេសថៃកំពុងតែស្វែងរកកិច្ចសហប្រតិបត្តិការជាមួយប្រទេសឥណ្ឌា និងវៀតណាម ដើម្បីស្វែងរកមធ្យោបាយ ឈានដល់ការដោះស្រាយបញ្ហាការធ្លាក់ថ្លៃស្រូវ។ លោក Pichai Naripthaphan រដ្ឋមន្ត្រីក្រសួងពាណិជ្ជកម្មថៃ…
ប្រទេសថៃ ៖ ប្រទេសថៃកំពុងតែស្វែងរកកិច្ចសហប្រតិបត្តិការជាមួយប្រទេសឥណ្ឌា និងវៀតណាម ដើម្បីស្វែងរកមធ្យោបាយ ឈានដល់ការដោះស្រាយបញ្ហាការធ្លាក់ថ្លៃស្រូវ។
លោក Pichai Naripthaphan រដ្ឋមន្ត្រីក្រសួងពាណិជ្ជកម្មថៃ បានថ្លែងប្រាប់សភាកាលពីសប្តាហ៍មុនថា ប្រទេសថៃកំពុងពិភាក្សាជាមួយឥណ្ឌា និងវៀតណាម ដើម្បីកាត់បន្ថយការប្រកួតប្រជែងរវាងគ្នា ដោយសង្ឃឹមថានឹងបង្កើតតុល្យភាពតម្លៃស្រូវក្នុងទីផ្សារពិភពលោក និងជួយរក្សាស្ថិរភាពប្រាក់ចំណូលរបស់កសិករ។ លោកបានគូសបញ្ជាក់អំពីកិច្ចពិភាក្សាជាមួយប្រទេសទាំងពីរដូច្នេះថា «យើងបានពិភាក្សារួចហើយ ប៉ុន្តែកំពុងរង់ចាំកិច្ចប្រជុំមួយទៀត ដើម្បីមើលថាតើពួកយើងអាចធ្វើបានប៉ុន្មានអំពីរឿងនេះ?»។
យោងតាមទិន្នន័យពីក្រសួងពាណិជ្ជកម្មបានបង្ហាញថា តម្លៃស្រូវក្នុងប្រទេសថៃបានធ្លាក់ចុះ ៣០% បើធៀបនឹងឆ្នាំមុន មកនៅជាមធ្យមប្រហែល ៨,៦០០បាត ឬស្មើនឹង ២៥៥ដុល្លារក្នុងមួយតោន កាលពីខែមុន ស្របពេលបណ្តាកសិករកំពុងតែអំពាវនាវរដ្ឋាភិបាលជួយលក់ស្រូវឱ្យបានតម្លៃខ្ពស់។ ថៃដែលជាប្រទេសនាំចេញអង្ករធំជាងគេលដាប់ទី២ពិភពលោកបន្ទាប់ពីប្រទេសឥណ្ឌានោះ ទំនងអាចនឹងទទួលរងផលប៉ះពាល់យ៉ាងធ្ងន់ធ្ងរពីការនាំចេញអង្ករឡើងវិញពីប្រទេសឥណ្ឌា ដោយក្រសួងរំពឹងថា ការនាំចេញអង្ករថៃនឹងធ្លាក់ចុះ ២៤% មកត្រឹម៧.៥លានតោន នៅឆ្នាំនេះ។
រដ្ឋាភិបាលវៀតណាមឯណោះវិញ ក៏បានប្រាប់ក្រសួងពាណិជ្ជកម្មរបស់ខ្លួន ស្វែងរកការជំរុញការនាំចេញអង្ករទៅកាន់សហរដ្ឋអាមេរិក ចិន សហភាពអឺរ៉ុប និងជប៉ុន ខណៈដែលប្រទេសនាំចេញអង្ករដ៏ធំជាងគេទី៣ពិភពលោកមួយនេះ សម្លឹងមើលការគ្រប់គ្រងលើការផ្គត់ផ្គង់អង្ករលើសតម្រូវការ។ រដ្ឋាភិបាលក៏បានប្រាប់ធនាគារកណ្តាលវៀតណាមឱ្យបន្តផ្តល់កម្ចីដល់បណ្តាក្រុមហ៊ុន ដើម្បីឱ្យពួកគេមានលទ្ធភាពស្តុកអង្ករទុក។
យោងតាមឯកសារដែលត្រូវបានចុះហត្ថលេខាកាលពីសប្តាហ៍មុន ដោយនាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) បានឱ្យដឹងថា អំឡុងខែដំបូងនៃឆ្នាំ ២០២៥ ពាណិជ្ជកម្មអង្ករពិភពលោកបាននិងកំពុងវិវឌ្ឍនៅក្នុងលក្ខណៈស្មុគស្មាញជាមួយការផ្គត់ផ្គង់លើសតម្រូវការ ដោយកត់សម្គាល់ថា តម្រូវការធ្លាក់ចុះ ហើយប្រទេសនាំចូលធំៗមានការប្រុងប្រយ័ត្នក្នុងការទិញ និងស្តុកអង្ករទុក ខណៈវៀតណាមបានមើលឃើញការនាំចេញរបស់ខ្លួនធ្លាក់ចុះ នៅពេលដែលទីផ្សារពិភពលោកទទួលយកការផ្គត់ផ្គង់កើនឡើងពីប្រទេសឥណ្ឌា។
ទិន្នន័យរដ្ឋាភិបាលបានបង្ហាញថា វៀតណាមបាននាំចេញអង្ករចំនួន ១.២៤លានតោន ដែលមានតម្លៃ ៦៧៥លានដុល្លារក្នុងរយៈពេល២ខែដំបូងនៃឆ្នាំនេះ កើនឡើង ១៨.៩% បើធៀបនឹងរយៈពេលដូចគ្នាកាលពីឆ្នាំមុន ប៉ុន្តែធ្លាក់ចុះ ៤.៩% បើគិតអំពីតម្លៃ៕ ដកស្រង់ ៖ Reuters
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ