រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានធ្វើការណែនាំទៅដល់រដ្ឋមន្ត្រីក្រសួងការងារ និងបណ្តុះបណ្តាវិជ្ជាជីវៈ និងក្រសួងសុខាភិបាល ត្រូវចុះពិនិត្យឱ្យបានហ្មត់ចត់…
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានធ្វើការណែនាំទៅដល់រដ្ឋមន្ត្រីក្រសួងការងារ និងបណ្តុះបណ្តាវិជ្ជាជីវៈ និងក្រសួងសុខាភិបាល ត្រូវចុះពិនិត្យឱ្យបានហ្មត់ចត់ និងឱ្យបានច្បាស់ថា អ្នកប្រើប្រាស់ប័ណ្ណ ប.ស.ស. កុំត្រូវទទួលបានការរើសអើងឡើយ ។
ការលើកឡើងរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បន្ទាប់ពីមានការលើកឡើងមួយចំនួនពាក់ព័ន្ធនឹងគ្រូពេទ្យមួយចំនួនបានធ្វើការចំពោះអ្នកប្រើប័ណ្ណប.ស.សហើយត្រូវបង្ហាញតាមបណ្តាញសង្គមហ្វេសប៊ុក ។
ការថ្លែងណែនាំរបស់សម្តេចមហាបវរធិបតី ខាងលើនេះធ្វើឡើងក្នុងឱកាសអញ្ជើញសម្ពោធទារកដា្ឋនរោងចក្រ ម៉ាវ៉ល ហ្កាមិន ឯ.ក ស្ថិតនៅតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ និងសំណេះសំណាងជាមួយកម្មករ កម្មការិនីជាម្តាយ ដែលមានទារកតូចៗក្នុងគោលបំណងស្តាប់នៅសំណូមពរក៏ដូចជា បញ្ហាប្រឈមនានារបស់កម្មករ កម្មការិនី នាព្រឹកថ្ងៃទី១០ ខែមីនា ឆ្នាំ២០២៥ ។
ក្រោយពីបានស្តាប់នូវការលើកឡើងរបស់កម្មការិនីដែលទៅទទួលបានអត្ថប្រយោជន៍ពីការប្រើប្រាស់លើបណ្ណ ប.ស.ស លើសេវាសុខាភិបាល ក្នុងពេលមានផ្ទៃពោះ និងក្រោយសម្រាលកូនរួចរាល់ហើយនោះ សម្តេចមហាបវរធិបតី បានលើកឡើង ដោយសម្តេចបានឃើញនូវការផ្សព្វផ្សាយនៅលើបណ្តាញសង្គម ដែលថា អ្នកប្រើប្រាស់បណ្ណ ប.ស.ស. នៅតាមមន្ទីរពេទ្យ ឬមណ្ឌលសុខភាពមិនសូវទទួលបានការយកចិត្តទុកដាក់ឡើយ ។
ជុំវិញបញ្ហាខាងលើនេះ សម្តេចមហាបវរធិបតី បានកត់សម្គាល់ថា មានតិចតួចបានលើកឡើងករណីនេះ ។ សម្តេចមហាបវរធិបតី បានគូសបញ្ជាក់ថា៖ «ថ្ងៃមុនបងឃើញគេ (សម្តេចនិយាយជាមួយកម្មការិនី) គេបង្ហោះតាមហ្វេសប៊ុក តាមអី១រឿង ២រឿងនោះ គេថា អ្នកកាន់ ប.ស.ស ទៅពេទ្យមិនសូវយកចិត្តទុកដាក់ ។ ព្រោះអាហ្នឹងការងារនេះ តាមឱ្យជាប់ក្រសួងការងារ ក្រសួងសុខាភិបាល គឺអត់ឱ្យមានការរើសអើងទេ មណ្ឌលសុខភាពទាំងឯកជន ទាំងរដ្ឋ គឺត្រូវធ្វើម៉េចយកចិត្តទុកដាក់ដូចគ្នា» ។
ក្នុងនោះ សម្តេចមហាបវរធិបតី ក៏បានបញ្ជាក់ថា បានឱ្យក្រុមការងារចុះពិនិត្យទៅលើកិច្ចការងារទាំងនេះដែរ ខណៈដែលសម្តេចក៏សង្កេតឃើញថា មានចន្លោះប្រហោងបន្តិចបន្តួច តែបានធ្វើការកែសម្រួលជាបន្តបន្ទាប់ ។
សម្តេចមហាបវរធិបតី សង្កត់ធ្ងន់ថា ធ្វើយ៉ាងណាកុំឱ្យមានការរើសអើងឱ្យសោះចំពោះអ្នកប្រើប្រាស់បណ្ណ ប.ស.ស ។ សម្តេចមហាបវរធិបតី ក៏បានលើកឡើងថា គោលការណ៍បង្កើតទារកដ្ឋាននេះជាគោលការណ៍មួយក្នុងចំណោម១០ ដែលរាជរដ្ឋាភិបាលបានដាក់ចុះតាំពីដើមអាណត្តិតាមរយៈក្រសួងការងារដែលជាសេនាធិការដឹកនាំរៀបចំ ។
ទារកដ្ឋាននេះ សម្រាប់ការមើលថែទាំកូនៗរបស់កម្មករនិយោជិត ដែលមានអាយុចាប់ពី៣ខែរហូតដល់ អាយុ៣ឆ្នាំ ដែលជួយសម្រួលដល់បងប្អូនកម្មករនិយោជិតក្នុងរោងចក្រអាចយកកូនៗមកផ្ញើក្នុងទារកដ្ឋាន ដើម្បីទទួលបានការមើលថែទាំសុខភាព និងទទួលបានអាហារូបត្ថម្ភគ្រប់គ្រាន់សម្រាប់ទារក ដែលជាមូលធនមនុស្សកម្ពុជាចាប់ពីតូចទៅតែម្តង បន្ថែមពីនេះ ទារកដ្ឋាននេះ ត្រូវបានរៀបចំបង្កើតឡើងសម្រាប់ជាកន្លែងដែលផ្តល់សេវាថែទាំកុមារតូចៗ ជាកូនរបស់បងប្អូនកម្មករនិយោជិតជាស្ត្រីនៅរោងចក្រ ម៉ាវ៉ល ប្រកបដោយសុវត្ថិភាព និងធំធាត់ឡើង ដោយមានសុខភាពល្អ ។
គោលនយោបាយរបស់រដ្ឋាភិបាលបានផ្ដល់អត្ថប្រយោជន៍ដល់កម្មករនិយោជិតចំពោះស្ត្រីមានផ្ទៃពោះ នៅពេលពិនិត្យសុខភាពទទួលបានប្រាក់ឧបត្ថម្ភ៨ម៉ឺនរៀលក្នុង១លើក និងត្រូវពិនិត្យផ្ទៃពោះចំនួន៤លើក មុនពេលសម្រាល, ពេលឆ្លងទន្លេកូន១ ឧបត្ថម្ភថវិកា៨០ម៉ឺន កូនភ្លោះ២ ឧបត្ថម្ភ១,២លានរៀល កូនភ្លោះ៣ ឧបត្ថម្ភ១,៦លានរៀល និងកូនភ្លោះ៣ ទទួលបានការឧបត្ថម្ភពីសម្ដេចតេជោ និងសម្ដេចកិត្តិព្រឹទ្ធបណ្ឌិត ចំនួន៥លានរៀល ថែមទៀតផង ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ