ខណ:ដែលកម្ពុជា និងពិភពលោកនឹងប្រារព្វទិវានារីអន្តរជាតិ ៨មីនា វាជាពេលវេលាដ៏ល្អមួយ ដើម្បីនឹងផ្តល់ការគោរពដល់ស្ត្រីកាន់តែច្រើន ហើយទទួលស្គាល់តួនាទីដ៏សំខាន់របស់ពួកគេក្នុងសង្គមគ្រួសារ និងសង្គមជាតិទាំងមូល ។ នៅកម្ពុជានៅសម័យនេះ វិសមភាពយ៉េនឌ័រកាន់តែរួមតូច…
ខណ:ដែលកម្ពុជា និងពិភពលោកនឹងប្រារព្វទិវានារីអន្តរជាតិ ៨មីនា វាជាពេលវេលាដ៏ល្អមួយ ដើម្បីនឹងផ្តល់ការគោរពដល់ស្ត្រីកាន់តែច្រើន ហើយទទួលស្គាល់តួនាទីដ៏សំខាន់របស់ពួកគេក្នុងសង្គមគ្រួសារ និងសង្គមជាតិទាំងមូល ។
នៅកម្ពុជានៅសម័យនេះ វិសមភាពយ៉េនឌ័រកាន់តែរួមតូច ដោយសារសង្គមហាក់មិនមានការបែងចែក ឬរើសអើងភេទឡើយ ដោយសារតែនៅពេលនេះស្ត្រីៗ ដែលមានសមត្ថភាពនិងភាពខ្លាំង គឺបានកំពុងតែដឹកនាំ និងកាន់កាប់ការងារសំខាន់ៗជាច្រើននៅក្នុងប្រទេស ។ ជាការពិត នៅក្នុងជួរថ្នាក់ដឹកនាំកំពូលសមាមាត្រស្ត្រីដែលកាន់តួនាទី និងភារកិច្ចដឹកនាំស្ថាប័នរដ្ឋទាំង៣០ក្រសួង និងរដ្ឋលេខាធិការដ្ឋាន គឺមានស្ត្រីតិចមែន ប៉ុន្តែនៅក្នុងជួររដ្ឋបាលទាំងថ្នាក់ជាតិ និងថ្នាក់ក្រោមជាតិ សមាមាត្រនៃការចូលរួមរបស់ស្ត្រីសឹងតែស្មើនឹងបុរសបាត់ទៅហើយ ។
តាមស្ថិតិដែលទទួលបានពីក្រុមប្រឹក្សាជាតិកម្ពុជា ដើម្បីស្ត្រីបានឲ្យដឹងថា អត្រាស្ត្រីដែលកំពុងតែបម្រើការងារនៅក្នុងមុខងារសាធារណៈ គឺបានកើនឡើងលើសពី៤២ភាគរយទៅហើយនៅពេលនេះ ។ តួរលេខបានបង្ហាញថា ស្ត្រីដែលបានធ្វើការនៅក្នុងមុខងារសាធារណៈមានតួនាទីចាប់ពីអនុប្រធានការិយាល័យដល់អគ្គនាយក និងមានឋានៈស្មើមានប្រមាណជា២៧ភាគរយ ហើយស្ត្រីនៅក្នុងមុខតំណែងគ្រប់គ្រងនៅថ្នាក់រាជធានី ខេត្ត មានចំនួន៨០រូបស្មើនឹង១២,៨៤ ភាគរយ និងស្ត្រីនៅក្នុងមុខតំណែងគ្រប់គ្រងនៅក្នុងថ្នាក់ក្រុង ស្រុក ខណ្ឌ មានចំនួន៧៨៩រូបស្មើនឹង១៩,៧៥ % ។
នៅក្នុងវិស័យសេដ្ឋកិច្ច និងការងារវិញស្ត្រីបានប្រឡូករហូតដល់ទៅ៦១,៨ភាគរយ ដោយស្ត្រីជាច្រើននាក់បានកំពុងតែដើរតួនាទីជាអ្នកដឹកនាំនៅក្នុងសហគ្រាសធុនតូច និងមធ្យមជាច្រើន ។
នេះ គឺជាស្ថិតិស្ត្រីទូទៅដែលកំពុងតែបម្រើការនៅស្ថាប័ន និងមុខជំនាញក៏ដូចជាសកម្មភាពសេដ្ឋកិច្ច ខណៈដែលស្ត្រីដែលខ្លាំង និងលេចធ្លោរហើយកាន់តួនាទីនៅក្នុងឆាកនយោបាយ និងថ្នាក់កំពូលក៏មានច្រើនដែរដោយនៅក្នុងពេលនេះកម្ពុជាមានស្ត្រីម្នាក់ គឺ សម្ដេចមហារដ្ឋសភាធិការធិបតី ឃួន សុដារី កំពុងកាន់តំណែងជាប្រធានរដ្ឋសភា ក្រៅពីនោះ គឺថ្នាក់រដ្ឋមន្ត្រីមានយ៉ាងហោច៣រូប គឺ លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម, លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងជាប្រធានក្រុមប្រឹក្សាជាតិកម្ពុជា ដើម្បីស្ត្រី និងលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ក្រៅពីនោះមានស្ត្រីម្នាក់ទៀត គឺលោកស្រី ជា សិរី ទេសាភិបាល ធនាគារជាតិនៃកម្ពុជា ។
ចំណែកស្ត្រីដែលកំពុងតែកាន់កាប់ការងារជារដ្ឋលេខាធិការ អភិបាលខេត្ត និងអភិបាលរងខេត្ត ក៏មានច្រើនរូបទៀត ។
តាមធម្មជាតិខួរក្បាលបុរសមានទំហំធំជាងស្ត្រីបន្តិចមែន ពោល គឺប្រមាណជា១០ភាគរយ ប៉ុន្តែទោះបីជាយ៉ាងណាក៏ដោយ ក៏អ្នកវិទ្យាសាស្ត្របានលើកឡើងថា ទំហំនេះមិនមែនជាអំណះអំណាងថា បុរសមានភាពវ័យឆ្លាតជាងស្ត្រីឡើយ ។
អ្នកវិទ្យាសាស្ត្របានលើកឡើងថា ទោះបីជាខួរក្បាលរបស់បុរសជាទូទៅធំជាងខួរក្បាលស្ត្រីមែន ប៉ុន្តែវាមិនប៉ះពាល់ដល់ភាពវ័យឆ្លាតរបស់ស្ត្រីឡើយ ។ ភាពវ័យឆ្លាតគឺវាផ្អែកនៅលើការដុសខាត់ ការសិក្សា ការរៀនសូត្រ ការខិតខំសំភី និងបទពិសោធន៍ ។ ដូច្នេះប្រសិនបើទៅថ្ងៃអនាគត ស្ត្រីកាន់តែច្រើនអាចពង្រឹងសមត្ថភាពកាន់តែច្រើននោះពួកគេនឹងកាន់តែមានឱកាសនៅក្នុងការចូលមកកាន់ និងដឹកនាំស្ថាប័នកាន់តែច្រើនមិនខាន ។
ជាការពិតផ្នត់គំនិតសង្គមពីមុនរាងរើសអើងលើស្ត្រីបន្តិច ។ ដូច្នេះហើយទើបអត្រាស្ត្រី និងបុរសដែលបម្រើការនៅថ្នាក់ជាតិ និងថ្នាក់ក្រោមជាតិនៅមានគម្លាតបន្តិចដែរ ។ តាមពិតទៅសមត្ថភាពស្ត្រីមានសឹងតែលើសបុរស ប៉ុន្តែផ្នត់គំនិតនេះបានបង្អាក់ការចូលរួមរបស់ស្ត្រីបន្តិច ។ តួរលេខស្ត្រីដែលបានប្រឡងសញ្ញាបត្រទុតិយភូមិ នៅឆ្នាំ២០២៣ មានប្រមាណជា ៥២ភាគរយ ប៉ុន្តែពួកគេសម្រេចចិត្តចូលរួមនៅថ្នាក់ឧត្តមសិក្សា គឺមានតែប្រមាណជា ៤៥ ភាគរយប៉ុណ្ណោះ ។
សរុបទៅសង្គមទូទៅ នៅដាក់គំនាបលើស្ត្រីបន្តិច ប៉ុន្តែប្រសិនបើស្ត្រីខ្លាំងហើយតស៊ូជំនះការលំបាកនឹងប្រឹងប្រែងដុសខាត់សមត្ថភាព ជាពិសេស គឺកាន់តែព្យាយាមបង្ហាញពីភាពជោគជ័យ និងភាពខ្លាំងរបស់ខ្លួនសង្គមនឹងទទួលស្គាល់ ។ ស្ត្រីដែលអាចនឹងចូលមកកាន់ការងារនៅក្នុងសង្គមនឹងកាន់តែមានច្រើន ។ សង្គមនៅក្នុងស្រទាប់បញ្ញវ័ន្តបានទទួលស្គាល់តម្លៃរបស់ស្ត្រីហើយនៅឡើយ តែស្រទាប់មហាជនប៉ុណ្ណោះ ។
ប៉ុន្តែប្រសិនបើស្ត្រីបង្ហាញឧត្តមភាព និងភាពខ្លាំង គឺអាចដឹកនាំស្ថាប័នបានដូចតែបុរសដែរ ហើយមហាជននឹងទទួលស្គាល់ ។ ទីបំផុត ពាក្យដែលថា «ស្ត្រីបង្វិលចង្ក្រានមិនជុំ»នឹងរលុបបាត់ពីសង្គមកម្ពុជា ៕
ចែករំលែកព័តមាននេះ