ទីក្រុងម៉ូស្គូ៖ ថ្ងៃនេះ វិមានក្រឹមឡាំងបញ្ចេញប្រតិកម្មបែបវិជ្ជមានតបទៅនឹងការលើកឡើងរបស់រដ្ឋមន្ត្រីការបរទេសអាមេរិក លោករូប៊ីយ៉ូ ដែលថាតាមពិតទៅសង្គ្រាមអ៊ុយក្រែនមិនមែនជាទំនាស់រវាងរុស្ស៊ី និងអ៊ុយក្រែនទេ។ ប៉ុន្តែជាសង្គ្រាមប្រយោល ឬសង្គ្រាមខ្ចីដៃតែប៉ុណ្ណោះ (proxy war)។…
ទីក្រុងម៉ូស្គូ៖ ថ្ងៃនេះ វិមានក្រឹមឡាំងបញ្ចេញប្រតិកម្មបែបវិជ្ជមានតបទៅនឹងការលើកឡើងរបស់រដ្ឋមន្ត្រីការបរទេសអាមេរិក លោករូប៊ីយ៉ូ ដែលថាតាមពិតទៅសង្គ្រាមអ៊ុយក្រែនមិនមែនជាទំនាស់រវាងរុស្ស៊ី និងអ៊ុយក្រែនទេ។ ប៉ុន្តែជាសង្គ្រាមប្រយោល ឬសង្គ្រាមខ្ចីដៃតែប៉ុណ្ណោះ (proxy war)។ មានន័យថាជាសង្គ្រាមដែលមានមេធំនៅពីក្រោយខ្នងគឺប្រទេសអាមេរិក។ ពោលគឺមិនខុសពីសង្គ្រាមកាលពីសម័យសង្គ្រាមត្រជាក់នោះទេ។
អ្នកនាំពាក្យវិមានក្រឹមឡាំងយល់ថាការលើកឡើងរបស់លោករូប៊ីយ៉ូគឺស្របទៅនឹងអ្វីដែលលោកពូទីនធ្លាប់បានគិតតាំងពីយូរមកហើយ។ នៅក្នុងបទសម្ភាសជាមួយទូរទស្សន៍ហ្វក់ចាក់ផ្សាយកាលពីថ្ងៃពុធនោះ លោករូប៊ីយ៉ូថ្លែងថា «គ្រាន់តែចេញក្រឡាមក លោកត្រាំអាចមើលឃើញច្បាស់តែម្ដងថានេះជាជម្លោះរ៉ាំរ៉ៃ និងប្រទាញប្រទង់គ្នាគ្មានទីបញ្ចប់»។
លោករូប៊ីយ៉ូថ្លែងបន្តទៀតថានិយាយតាមត្រង់ទៅចុះ វាជាសង្គ្រាមខ្ចីដៃ មានន័យថាមានប្រទេសមហាអំណាចចាំបញ្ជាពីក្រោយខ្នង រវាងមហាអំណាចនុយក្លេអ៊ែរអាមេរិកដែលជួយអ៊ុយក្រែន និងមហាអំណាចនុយក្លេអ៊ែររុស្ស៊ី។ លោកយល់ថាសង្គ្រាមនេះត្រូវតែបិទបញ្ចប់នៅក្នុងពេលនេះ។
ជាកិច្ចឆ្លើយតប, អ្នកនាំពាក្យវិមានក្រឹមឡាំង លោកប៉េស្កូស (Peskov) ថ្លែងថាការលើកឡើងរបស់ប្រមុខការទូតអាមេរិកពិតជាត្រឹមត្រូវណាស់ គឺត្រូវម៉ាច់តែម្ដង។ ក្រឹមឡាំងថារុស្ស៊ីធ្លាប់បាននិយាយបែបនេះមិនដឹងជាប៉ុន្មានដងមកហើយទេថានេះជាជម្លោះរវាងរុស្ស៊ីទល់នឹងការព្រួតគ្នារបស់ក្រុមបស្ចិមប្រទេសដែលមានអាមេរិក និងអឺរ៉ុបនៅពីក្រោយខ្នងអ៊ុយក្រែន។
លោកប៉េស្កូសថ្លែងថាយើងយល់ស្របតាមការលើកឡើងនេះទាំងស្រុង។ យើងធ្លាប់បាននិយាយបែបនេះជាច្រើនដងរួចមកហើយ។ យើងធ្លាប់និយាយថានេះជាជម្លោះរវាងរុស្ស៊ី និងក្រុមបស្ចិមប្រទេស។ មេខ្លោងធំជាងគេនៅបស្ចិមប្រទេសគឺអាមេរិក។ និយាយទៅមិនខុសពីការគិតរបស់របស់លោកពូទីន និងរដ្ឋមន្ត្រីការបរទេសរុស្ស៊ីនោះទេ។ ហេតុនេះ សរុបសេចក្ដីមក យើងត្រូវតែបិទបញ្ចប់ជម្លោះ និងសង្គ្រាមនេះជាស្ថាពរ៕
ចែករំលែកព័តមាននេះ