ខេត្តកណ្ដាល ៖ សេចក្តីរាយការណ៍បឋមឲ្យដឹងថា ក្មេងស្ទាវ២នាក់ពាក់ព័ន្ធករណីហិង្សាដោយចេតនាមានស្ថានទម្ងន់ទោស ពោលគឺល្បែងស្នេហ៍ត្រីកោណស្ទាវប៉ះស្ទាវ ចាក់គ្នាបណ្តាលឲ្យមានរបួសនារីជាសង្សារចំនួន៣កាំបិត ដោយសារតែស្រឡាញ់ស្រីជាន់លេខរៀង ។ ហេតុការណ៍នេះ បានកើតឡើងកាលពីវេលាម៉ោង១០និង៣០នាទីយប់…
ខេត្តកណ្ដាល ៖ សេចក្តីរាយការណ៍បឋមឲ្យដឹងថា ក្មេងស្ទាវ២នាក់ពាក់ព័ន្ធករណីហិង្សាដោយចេតនាមានស្ថានទម្ងន់ទោស ពោលគឺល្បែងស្នេហ៍ត្រីកោណស្ទាវប៉ះស្ទាវ ចាក់គ្នាបណ្តាលឲ្យមានរបួសនារីជាសង្សារចំនួន៣កាំបិត ដោយសារតែស្រឡាញ់ស្រីជាន់លេខរៀង ។
ហេតុការណ៍នេះ បានកើតឡើងកាលពីវេលាម៉ោង១០និង៣០នាទីយប់ ថ្ងៃទី២ ខែមីនា ឆ្នាំ២០២៥ ចំណុចបន្ទប់ជួលភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្តាល ។ តាមប្រភពព័ត៌មានបានបង្ហើបឲ្យដឹងថា ជនរងគ្រោះម្នាក់ឈ្មោះ អ ណ ល ភេទស្រី អាយុ១៦ឆ្នាំ មានទីលំនៅសង្កាត់តាខ្មៅ ក្រុងតាខ្មៅ ខេត្តកណ្តាល ។ ចំណែកជនបង្កមានគ្នា៤នាក់សមត្ថកិច្ចឃាត់ខ្លួនបាន២នាក់ និងកំពុងបន្តតាមចាប់បក្ខពួកបន្ថែមទៀត ។
តាមប្រភពព័ត៌មានឲ្យដឹងទៀតថា យុវជនម្នាក់បានស្រឡាញ់គ្នាជាមួយជនរងគ្រោះ និងបានធ្វើជាសង្សារអស់រយៈពេលជិតមួយឆ្នាំមកហើយ ធ្លាប់បានដេកនៅផ្ទះជួលជាមួយគ្នាដូចប្តីប្រពន្ធផងដែរ ។ លុះនៅថ្ងៃទី០២ ខែមីនា ឆ្នាំ២០២៥ វេលាម៉ោង៦និង៣០នាទីល្ងាច យុវជនរូបនោះបានជិះម៉ូតូទៅលេងសង្សារជាទីស្រឡាញ់ដល់បន្ទប់ជួល ស្ថិតនៅភូមិកំពង់សំណាញ់ ។
ខណៈទៅដល់ស្រាប់តែឃើញនារីជាសង្សារ កំពុងអង្គុយជជែកលេងជាមួយប្រុសស្ទាវផ្សេងម្នាក់ទៀត បានធ្វើឱ្យបុរសជាសង្សារដំបូង មានចិត្តខឹង និងប្រចណ្ឌ ហើយក៏ទាញម៉ូតូជិះត្រឡប់ទៅផ្ទះវិញទាំងការមួហ្មង ។ តែយុវជននោះនៅមិនសុខទេ ភ្លើងកំហឹងប្រចណ្ឌពុះជាង១០០អង្សា បានស្ទុះទៅយកកូនកាំបិតចុងស្រួចមួយលាក់ទុក ហើយបានទៅបបួលមិត្តភក្តិ៣នាក់ទៀត ដោយជិះម៉ូតូ២គ្រឿងមកជាមួយ និងបានប្រាប់ថា ទៅលេងផ្ទះសង្សារមួយភ្លែត ។
ខណៈទៅដល់មុខបន្ទប់ជួល យុវជនស្ទាវទាំង៤នាក់ ក្នុងនោះក៏មានយុវជនជាសង្សារបានចុះពីលើម៉ូតូនាំបក្ខពួក៣នាក់ដើរចូលក្នុងបន្ទប់ជនរងគ្រោះ ហើយបានស្រែកថា “អាប្រុសណាជាសង្សារថ្មីមកញ៉ែជាមួយសង្សារអញ ? ” ភ្លាមនោះក៏បានដកកូនកាំបិតដែលដាក់តាមខ្លួន ចាក់ទៅលើយុវជនម្នាក់ដែលកំពុងសាសងក្នុងបន្ទប់ជាមួយនារីជាសង្សារ ពេលឃើញដូច្នោះ នាងបានស្ទុះទៅឃាត់ តែត្រូវយុវជនជាសង្សារដំបូង ចាក់នាងត្រូវ៣កាំបិត បណ្តាលឲ្យរងរបួសជាទម្ងន់ ត្រូវបញ្ជូនទៅសង្គ្រោះ ។ ក្រោយកើតហេតុ ក្រុមជនបង្កបាននាំគ្នារត់ឡើងជិះម៉ូតូគេចខ្លួនអស់ ។
លុះនៅថ្ងៃទី៤ ខែមីនា ឆ្នាំ២០២៥ ក្រោមការដឹកនាំបញ្ជាផ្ទាល់ពីលោកឧត្តមសេនីទោ ឈឿន សុចិត្ត ស្នងការនគរបាលខេត្តកណ្តាល កម្លាំងប៉ុស្តិ៍កំពង់សំណាញ់ សហការជាមួយនគរបាលផ្នែកជំនាញក្រុងតាខ្មៅ ចុះស្រាវជ្រាវរហូតឈានដល់ការឃាត់ខ្លួនជនសង្ស័យចំនួន២នាក់ ក្នុងនោះក៏មានយុវជន ដែលជាសង្សារនារីរងគ្រោះម្នាក់ផងដែរ ។
បើតាមចម្លើយជនសង្ស័យដែលជាសង្សារនារីនោះ បានសារភាពថា ខ្លួនពិតជាបានដឹកនាំបក្ខពួកទៅធ្វើសកម្មភាពចាក់ជនរងគ្រោះបណ្តាលឲ្យមានរបួសស្នាមមែន ដែលអំពើហិង្សានោះផ្តើមចេញពីភ្លើងប្រចណ្ឌ ពោលគឺស្រឡាញ់ស្រីជាន់លេខរៀង ។ តែទោះជាយ៉ាងណាក្តី ជនសង្ស័យទាំង២នាក់ សមត្ថកិច្ចបាននិងកំពុងរៀបចំកសាងសំណុំរឿងបញ្ជូនទៅសាលាដំបូងខេត្តកណ្តាលតាមនីតិវិធី ៕
ចែករំលែកព័តមាននេះ