រាជធានីភ្នំពេញ ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានណែនាំឱ្យរៀបចំព្រឹត្តិការណ៍ «សង្ក្រាន្ដ» នៅតាមបណ្ដារាជធានី-ខេត្ត ដើម្បីថែរក្សា…
រាជធានីភ្នំពេញ ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានណែនាំឱ្យរៀបចំព្រឹត្តិការណ៍ «សង្ក្រាន្ដ» នៅតាមបណ្ដារាជធានី-ខេត្ត ដើម្បីថែរក្សា និងលើកស្ទួយវប្បធម៌ខ្មែរ ហើយ សម្ដេចមានក្ដីសង្ឃឹមថា សង្ក្រាន្ដកម្ពុជានឹងចុះបញ្ជីក្នុងបេតិកភណ្ឌពិភពលោកនាពេលឆាប់ៗនេះ ។
សម្តេចបវរធិបតីបានលើកឡើងថា ការរៀបចំព្រឹត្តិការណ៍សង្ក្រាន្ដនៅតាមបណ្ដារាជធានី-ខេត្ត គឺបន្ថែមលើព្រឹត្តិការណ៍ «អង្គរសង្ក្រាន្ដ»នៅខេត្តសៀមរាប ក្នុងឱកាសពិធីបុណ្យចូលឆ្នាំថ្មី នាពេលខាងមុខនេះ ។
ថ្លែងក្នុងពិធីប្រារព្ធទិវាវប្បធម៌ជាតិ ៣មីនា លើកទី២៧ និងទទួលទានភោជនាហារជាមួយតំណាងសិល្បករទូទាំងប្រទេស កាលពីល្ងាចថ្ងៃទី៥ ខែមីនា ឆ្នាំ២០២៥ នៅមជ្ឈមណ្ឌលពិព័រណ៌ និងសន្និបាតកោះពេជ្រ សម្ដេចបវរធិបតី ហ៊ុន ម៉ាណែត សម្តែងសង្ឃឹមថា ចូលឆ្នាំថ្មីនៅឆ្នាំនេះ និងឆ្នាំក្រោយៗទៀត នឹងមានការលេងល្បែងប្រជាប្រិយឱ្យផុលផុសឡើងវិញនៅគ្រប់ទីកន្លែងនៅទូទាំងប្រទេស ។
សម្ដេចបវរធិបតីបានលើកឡើងយ៉ាងដូច្នេះថា សង្កេតឃើញថា សន្ទុះនៃការលេងល្បែងប្រជាប្រិយខ្មែរ មកពេលនេះ យុវជនខ្មែរ បានរួមគ្នាលេងយ៉ាងផុលផុស ដើម្បីគាំទ្រដល់ល្បែងប្រជាប្រិយ៍ និងសល្បៈវប្បធម៌ខ្មែរ ។
ជាមួយគ្នានោះដែរ សម្ដេចបវរធិបតី ហ៊ុន ម៉ាណែត បន្ដថា អង្គរសង្ក្រាន្ដនៅខេត្តសៀមរាបនឹងរៀបចំសម្ដែងសល្បៈវប្បធម៌ខ្មែរ ។ លើសពីនេះ សម្ដេចក៏បានណែនាំឱ្យរៀបចំព្រឹត្តិការណ៍ «សង្ក្រាន្ដ» នៅតាមបណ្ដារាជធានី-ខេត្ត ទោះបីរាជរដ្ឋាភិបាលរៀបចំព្រឹត្តិការណ៍«អង្គរសង្ក្រាន្ដ»នៅខេត្តសៀមរាប ក៏ដោយ។
សម្ដេចបវរធិបតីបានគូសបញ្ជាក់ថា៖ «ឆ្នាំនេះ នៅអង្គរវត្តយើងរៀបចំអង្គរសង្ក្រាន្ត និងរៀបចំសិល្បៈសម្ដែង ប៉ុន្តែនៅទូទាំងប្រទេសត្រូវរៀបចំនៅថ្នាក់ខេត្ត ថ្នាក់ស្រុកឲ្យបានច្រើន ហើយជម្រុញការលេងល្បែងប្រជាប្រិយយើងឲ្យបានច្រើន ដើម្បីថែរក្សានិងលើកស្ទួយវប្បធម៌របស់យើង» ។ ពាក់ព័ន្ធទៅសង្ក្រាន្តនេះដែរ សម្ដេចបវរធិបតីនាយករដ្ឋមន្ដ្រីបានលើកឡើងថា សង្ក្រាន្តមិនមែនជាកម្មសិទ្ធផ្តាច់មុខរបស់អ្នកណាទេ កម្ពុជាមានសង្ក្រាន្តរបស់កម្ពុជា ។
សម្ដេចបវរធិបតីនាយករដ្ឋមន្ដ្រីមានប្រសាសន៍បញ្ជាក់ថា៖ «សង្ឃឹមថា សង្ក្រាន្តនៅកម្ពុជានឹងអាចចុះបញ្ជីនៅបេតិកភណ្ឌពិភពលោក ក្នុងពេលឆាប់ៗខាងមុខនេះផងដែរ។ សង្ក្រាន្ត អត់មានផ្ដាចមុខ របស់ប្រទេសណាទេ ប្រទេសដែលមានវប្បធម៌ស្រដៀងគ្នា គាត់មានសិទ្ធជារបស់គាត់ មិនខុសពីគុណខ្មែរ មិនខុសពីក្បាច់គុណប្រទេសផ្សេង ប្រទេសមួយនីមួយៗស្រដៀងគ្នា ចឹងយើងចុះអ្វីដែរជាលក្ខណៈឈ្មោះរបស់យើង» ៕
ចែករំលែកព័តមាននេះ