ប្រទេសចិន ៖ ចំនួនវិនិយោគិនវណ្ណៈកណ្តាលជនជាតិចិន ដែលទិញអចលនទ្រព្យនៅបរទេសបាននិងកំពុងធ្លាក់ចុះយ៉ាងខ្លាំង ចំពេលសេដ្ឋកិច្ចប្រទេសចិនកំពុងធ្លាក់ចុះ និងវិបត្តិអចលនទ្រព្យដ៏រ៉ាំរ៉ៃរបស់ប្រទេសយក្សនៅអាស៊ីមួយនេះ។ កាលពីប៉ុន្មានឆ្នាំមុន លោក Stephen Yao…
ប្រទេសចិន ៖ ចំនួនវិនិយោគិនវណ្ណៈកណ្តាលជនជាតិចិន ដែលទិញអចលនទ្រព្យនៅបរទេសបាននិងកំពុងធ្លាក់ចុះយ៉ាងខ្លាំង ចំពេលសេដ្ឋកិច្ចប្រទេសចិនកំពុងធ្លាក់ចុះ និងវិបត្តិអចលនទ្រព្យដ៏រ៉ាំរ៉ៃរបស់ប្រទេសយក្សនៅអាស៊ីមួយនេះ។
កាលពីប៉ុន្មានឆ្នាំមុន លោក Stephen Yao បានធ្វើដំណើរជាញឹកញាប់រវាងខេត្តក្វាងទុង (Guangdong) ប្រទេសចិនទៅប្រទេសថៃ ដើម្បីផ្តល់សេវាដល់គ្រួសារជនជាតិចិនវណ្ណៈកណ្តាលទិញខុនដូនៅទីក្រុងបាងកក និងទីក្រុងប៉ាតាយ៉ា។ នៅអំឡុងឆ្នាំ ២០១៧ និង ២០១៨ ភ្នាក់ងារអចលនទ្រព្យរូបនេះ បានធ្វើដំណើររាប់សិបដង ហើយបានបន្តធ្វើជាទៀងទាត់ កាលពី២ឆ្នាំមុន។ អតិថិជនលោក Yao អំឡុងពេលប្រទេសចិនមានកំណើនសេដ្ឋកិច្ចដ៏រឹងមាំនោះ បានជះលុយពួកគេទិញអចលនទ្រព្យនៅក្នុងទីផ្សារដូចជា ប្រទេសថៃ វៀតណាម និងអូស្ត្រាលី។
ទោះយ៉ាងណាក៏ដោយ កាលពីពេលថ្មីៗនេះ ការធ្វើដំណើររបស់លោក Yao បានថយចុះ ខណៈដែលលំហូរអ្នកទិញផ្ទះជនជាតិចិនធ្លាក់ចុះខ្លាំង ចំពេលការថយចុះប្រាក់ចំណូលនិងទ្រព្យសម្បត្តិរបស់ពួកគេ ដែលបណ្តាលមកពីការធ្លាក់ចុះសេដ្ឋកិច្ច និងវិបត្តិអចលនទ្រព្យរយៈពេលវែងនៅក្នុងប្រទេសចិន។ លោក Yao បានប្រាប់កាសែត South China Morning Post ថា «ភ្នាក់ងារអចលនទ្រព្យភាគច្រើនឥឡូវនេះ បានផ្លាស់ប្តូរទៅចាប់យកអាជីពផ្សេងទៀត»។
បើយោងតាមអ្នកសេដ្ឋកិច្ច និងអ្នកវិភាគដែលបានស្ទង់មតិដោយទីភ្នាក់ងារសារព័ត៌មាន Reuters បានឱ្យដឹងថា ទស្សនវិស័យអចលនទ្រព្យរបស់ប្រទេសចិនស្ថិតនៅក្នុងភាពស្រពេចស្រពិល ខណៈដែលកំណើនសេដ្ឋកិច្ចរបស់ប្រទេសនេះ ត្រូវបានគេរំពឹងថានឹងធ្លាក់ចុះមកត្រឹម ៤.៥% នៅឆ្នាំនេះ។ ចំណែកតម្លៃផ្ទះនៅក្នុងប្រទេសចិន ត្រូវបានអ្នកជំនាញព្យាករណ៍ថានឹងធ្លាក់ចុះខ្លាំងនៅឆ្នាំនេះផងដែរ ពោលជាងការរំពឹងទុកពីមុន។
ឧស្សាហកម្មទេសចរណ៍ប្រទេសថៃ ក៏បានប្រឈមមុខនឹងបញ្ហាដ៏ធំមួយផងដែរ ខណៈដែលអ្នកទេសចរចិនជាច្រើន នាពេលថ្មីៗនេះ បានលុបចោលការធ្វើដំណើររបស់ពួកគេ ចំពេលមានការកើនឡើងការព្រួយបារម្ភអំពីសុវត្ថិភាព។ កាលពីចុងខែមករាកន្លងទៅ លោកស្រី Thapanee Kiatphaibool អភិបាលនៃអាជ្ញាធរទេសចរណ៍ថៃ បានថ្លែងថា ភ្ញៀវទេសចរចិនប្រហែល១ម៉ឺននាក់ បានលុបចោលការធ្វើដំណើររបស់ពួកគេ។
ទន្ទឹមនឹងនេះ ប្រភពពីកាសែតអូស្ត្រាលី Herald Sun បានស្រង់ទិន្នន័យពីក្រុមប្រឹក្សាត្រួតពិនិត្យការវិនិយោគបរទេសរបស់អូស្ត្រាលី ចេញផ្សាយកាលពីខែវិច្ឆិកា ឆ្នាំមុន បង្ហាញពីការធ្លាក់ចុះនៃការទិញផ្ទះពីវិនិយោគិនចិន ដែលជាជនបរទេសទិញអចលនទ្រព្យលំនៅដ្ឋានធំបំផុតប្រចាំប្រទេសអូស្ត្រាលី។ ពួកគេបានចំណាយប្រាក់ជាង១.៦ពាន់លានដុល្លារអាមេរិក ទិញផ្ទះ ១,៩៩៨ខ្នងទូទាំងប្រទេសអូស្ត្រាលី អំឡុងឆ្នាំ ២០២៣-២០២៤ ដែលបិទបញ្ចប់កាលពីខែមិថុនា ពោលធ្លាក់ចុះពីជាង ២.១ពាន់លានដុល្លារ ចំណាយទិញផ្ទះ ២,៦០១ខ្នង អំឡុងឆ្នាំ ២០២២-២០២៣។
លើសពីនេះទៀត ប្រភពពីកាសែតអូស្ត្រាលីមួយទៀត AFR បានរាយការណ៍ថា ចំនួនអ្នកទិញជនជាតិចិនវណ្ណៈកណ្តាល កំពុងខាតប្រាក់នៅក្នុងប្រទេសអូស្ត្រាលី និងប្រទេសដទៃទៀត កាលពីឆ្នាំមុន ដោយត្រូវបង្ខំលក់អចលនទ្រព្យពួកគេក្នុងតម្លៃក្រោមទីផ្សារ បូករួមទាំងការចំណាយលើការថែទាំ លើសពីលទ្ធភាពពួកគេ៕ ប្រភព ៖ South China Morning Post និង VnExpress
ចែករំលែកព័តមាននេះ