កម្លាំងជួយសង្គ្រោះជិត៨០០នាក់ ដែលចុះរុករកឧទ្ធម្ភាគចក្រនៅខេត្តពោធិ៍សាត់ ទទួលបានគ្រឿងឥស្សរិយយស ពីរដ្ឋមន្ត្រីក្រសួងការពារជាតិ
ខេត្តពោធិ៍សាត់ ៖ នៅសាលាខេត្តពោធិ៍សាត់ នាព្រឹកថ្ងៃទី៤ ខែមីនា ឆ្នាំ២០២៥ ឯកឧត្តម នាយឧត្តមសេនីយ៍ ទៀ សីហា…
ខេត្តពោធិ៍សាត់ ៖ នៅសាលាខេត្តពោធិ៍សាត់ នាព្រឹកថ្ងៃទី៤ ខែមីនា ឆ្នាំ២០២៥ ឯកឧត្តម នាយឧត្តមសេនីយ៍ ទៀ សីហា ឧបកនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអញ្ជើញជាអធិបតី ក្នុងពិធីបូកសរុបប្រតិបត្តិការ រុករក និងសង្គ្រោះឧទ្ធម្ភាគចក្រ Z9MH-912 ព្រមទាំងបំពាក់គ្រឿងឥស្សរិយយស ជូនប័ណ្ណសរសើរ ប័ណ្ណថ្លែងអំណរគុណ ដល់កងកម្លាំងទាំងអស់ជិត៨០០នាក់ និងឧបត្ថម្ភថវិកាមួយចំនួនដល់អង្គភាពនីមួយៗផងដែរ ។
នាយឧត្តមសេនីយ៍ ទៀ សីហា បាននាំមក នូវការផ្ដាំផ្ញើសួរសុខទុក្ខ ពីសំណាក់សម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជូនចំពោះកងកម្លាំងគ្រប់កងឯកភាព ដែលបានប្រើប្រាស់កម្លាំងកាយចិត្ត ក្នុងការសហការចុះរុករកឧទ្ធម្ភាគចក្រ បើទោះបីជាភូមិសាស្ត្រព្រៃស្តុក មានជ្រលងជ្រោះជ្រៅ និងអាកាសធាតុមិនអំណោយផលក៍ដោយ ក៏កងកម្លាំងរបស់យើង បានពុះពារ ធ្វើការរុករករហូតទទួលបានជោគជ័យ។ លោកបានកោតសរសើរ និងវាយតម្លៃខ្ពស់ ដល់កម្លាំងទាំងអស់ មិនថា កម្លាំងចម្រុះនៃកងយោធពលខេមរភូមិន្ទ ឬកម្លាំងគណៈបញ្ជាការឯកភាពខេត្ត-ស្រុក ប៉ុណ្ណោះទេ គឺសុទ្ធសឹងជាកម្លាំងស្នូល ដែលពួកគាត់មានឆន្ទះខ្ពស់ ក្នុងការសហការគ្នារុករកឧទ្ធម្ភាគចក្រ ដែលបានបាត់ការទាក់ទង ក្នុងអំឡុវពេលហ្វឹកហ្វឺន នៅតំបន់ជួរភ្នំក្រវាញ ខេត្តពោធិ៍សាត់ កាលពីថ្ងៃទី១២ខែកក្កដាឆ្នាំ២០២៤ កន្លងមកនេះ ។
លោកនាយឧត្តមសេនីយ៍ បន្តទៀតថា ដោយទទួលបានបទបញ្ជា ពីសម្តេចធិបតី ហ៊ុន ម៉ាណែត ចាប់ពីថ្ងៃទី១៣ ខែកក្កដា កម្លាំងចម្រុះនៃកងយោធពលខេមរភូមិន្ទ ដោយបានការចូលរួមពីកម្លាំងគណៈបញ្ជាការឯកភាពរដ្ឋបាលខេត្តពោធិ៍សាត់ ក្រោមការដឹកនាំបញ្ជាផ្ទាល់ ពីសំណាក់នាយឧត្តមសេនីយ៍ ឥត សារ៉ាត់ អគ្គមេបញ្ជាការរង និងជានាយសេនាធិការចម្រុះ នៃកងយោធពលខេមរភូមិន្ទ បានចុះប្រតិបត្តិការរុករកឧទ្ធម្ភាគចក្រនោះ ដោយប្រើប្រាស់រយៈពេល១៧ថ្ងៃ ទើបរុករកឃើញនៅចង្កេះភ្នំយ៉ាវយ៉ៃ នារសៀលថ្ងៃទី២៩ ខែកក្កដា ឆ្នាំ២០២៤។ ភ្លាមៗនោះឃើញតែសាកសព អាកាសយាឈ្មោះ ខេង ឆៃយុទ្ធ នៅនឹងកៅអីឧទ្ធម្ភាគចក្រ លុះម៉ោង១០និង៣០នាទីព្រឹកថ្ងៃទី៣០ ទើបកម្លាំងរុករក ឃើញអាកាសយានិកម្នាក់ទៀតឈ្មោះ ស៊ុន ផល្លា ដែលស្លាប់បាត់បង់ជីវិត នៅចម្ងាយប្រមាណ២១០ម៉ែត្រ ពីចំណុចធ្លាក់ឧទ្ធម្ភាគចក្រ ។
លោកឧបនាយករដ្ឋមន្ត្រី ទៀ សីហា មានប្រសាសន៍ថា ដើម្បីលើកទឹកចិត្ត ដល់កងកម្លាំងចុះប្រតិបត្តិការរុករក និងសង្គ្រោះឧទ្ធម្ភាគចក្រ ទើបថ្ងៃនេះយើងធ្វើពិធីបំពាក់គ្រឿងឥស្សរិយយស ប្រគល់ប័ណ្ណសរសើរ ប័ណ្ណថ្លែងអំណរគុណ ដល់កងកម្លាំងទាំងអស់ និងឧបត្ថម្ភថវិកាមួយចំនួនដល់អង្គភាពនីមួយៗផងដែរ ៕
ចែករំលែកព័តមាននេះ