រាជធានីភ្នំពេញ៖ កម្មការិនីរោងចក្រកាត់ដេរម្នាក់ ដើរទៅធ្វើការរោងចក្រ បានជួបនិងក្រុមចោរទម្លាក់យោងប្រុសស្រី១ក្រុម ដែលប្រើកូនថង់មាសពណ៍ក្រហម ប្រើល្បិចល្បួងនាំនាងពីទីប្រជុំជនទៅដល់កន្លែងស្ងាត់ដោះយកគ្រឿងអលង្ការ និងទូរស័ព្ទដៃអស់ពីខ្លួន ដែលមានតម្លៃសរុបជិត២ពាន់ដុល្លារ ។ បន្ទាប់មកក្រុមចោរបានប្រគល់កូនថង់ពណ៍ក្រហម១ឲ្យមកនាងកាន់ដោយប្រាប់ថា…
រាជធានីភ្នំពេញ៖ កម្មការិនីរោងចក្រកាត់ដេរម្នាក់ ដើរទៅធ្វើការរោងចក្រ បានជួបនិងក្រុមចោរទម្លាក់យោងប្រុសស្រី១ក្រុម ដែលប្រើកូនថង់មាសពណ៍ក្រហម ប្រើល្បិចល្បួងនាំនាងពីទីប្រជុំជនទៅដល់កន្លែងស្ងាត់ដោះយកគ្រឿងអលង្ការ និងទូរស័ព្ទដៃអស់ពីខ្លួន ដែលមានតម្លៃសរុបជិត២ពាន់ដុល្លារ ។ បន្ទាប់មកក្រុមចោរបានប្រគល់កូនថង់ពណ៍ក្រហម១ឲ្យមកនាងកាន់ដោយប្រាប់ថា នៅក្នុងនោះគឺមាសមានចំនួនច្រើនជាងគ្រឿងអលង្ការរបស់នាងទៅទៀត ហើយក៏បានគេចខ្លួនបាត់អស់ ។ ក្រោយមកនាងរងគ្រោះបានស្រាយមាត់ថង់មើលឃើញសុទ្ធតែគ្រាប់កង់ ទើបដឹងថាចាញ់បោកក្រុមចោរ ហើយបានត្រឹមតែស្រែកទ្រហ៊ោយំ និងប្ដឹងឲ្យនគរបាលជួយអន្តរាគមន៍តែប៉ុណ្ណោះ ។
ហេតុការនោះបានកើតឡើងកាលពីវេលាម៉ោងជាង១២ថ្ងៃត្រង់ថ្ងៃទី០៤ ខែមីនា ឆ្នាំ២០២៥ នៅម្ដុំជិតស្ថានីយ៍ប្រេងឥន្ធនៈតូតាល់ ស្ថិតនៅតាមបណ្ដោយមហាវិថីចោមចៅ ហៅផ្លូវវ៉េងស្រេង ជិតផ្សារកាណាសុីធី សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ក្រុមចោរទម្លាក់យោងដែលមាននិមិត្តសញ្ញាថង់មាសពណ៍ក្រហមនោះមានគ្នា៥នាក់ប្រុស៣នាក់និងស្រី២នាក់ ។ ចំណែកនាងកម្មការិនីរងគ្រោះរូបនោះគិតតែពីយំ និងមិនបានប្រាប់ឲ្យដឹងពីអត្តសញ្ញាណរបស់ខ្លួននោះទេ ប៉ុន្តែនាងបានប្រាប់ខ្លះផងដែរថា គ្រាន់តែគ្រឿងអលង្ការ១តួខ្លួននាងមានតម្លៃជិត២ពាន់ដុល្លារទៅហើយ ។ ក្នុងនោះរួមមានខ្សែ ក ប្លាទី២ខ្សែ , ចង្ក្រងជើង១ខ្សែ ,កងដៃ១ឈុត និងទូរស័ព្ទម៉ាកOPPO ១គ្រឿង ហើយទទួលបានជាថ្នូរមកវិញគឺគ្រាប់កង់១កូនថង់ពណ៍ក្រហមទុកគ្រាន់ជាភស្តុតាងសម្រាប់ប្ដឹងនគរបាលតែប៉ុណ្ណោះ ។
នៅក្នុងខណៈនោះនាងរងគ្រោះមានការតក់ស្លុតយ៉ាងខ្លាំង ហើយបានយំផងនិយាយផងបន្តទៀតថា នៅមុនពេលកើតហេតុពេលនាងដើរទៅធ្វើការរោងចក្រ ដល់ត្រង់ចំណុចផ្សារត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ ក៏បានជួបជនសង្ស័យជាស្ត្រី២នាក់ ។ ខណៈនោះជនសង្ស័យខាងលើបានល្បួងនាងឲ្យជិះម៉ូតូជាមួយទៅឈប់នៅជិតស្ថានីយ៍ប្រេងឥន្ធនៈតូតាល់ តាមបណ្ដោយមហាវិថីចោមចៅ ហៅផ្លូវវ៉េងស្រេងម្ដុំជិតផ្សារកាណាសុីធី សង្កាត់ចោមចៅទី២ ខណ្ឌពោធិ៍សែនជ័យ ។
នាងបាននិយាយទៀតថា ពេលទៅដល់ទីនោះបានឃើញមានបក្ខពួកប្រុសៗ៣នាក់ទៀតនៅចាំទីនោះ ជាស្រេចហើយក៏បាននាំគ្នាដោះយកគ្រឿងអលង្ការនិងទូរស័ព្ទនាង រួចប្រគល់មាស១កូនថង់ក្រហមមកនាងទុក បន្ទាប់មកក្រុមចោរបានជិះម៉ូតូគេចខ្លួនបាត់អស់ ។ ក្រោយពីក្រុមជនសង្ស័យទៅបាត់អស់ នាងបានស្រាយមាត់ថង់មើលស្រាប់តែឃើញនៅក្នុងកូនថង់ពណ៍ក្រហមនោះមិនមែនមាសទេ គឺសុទ្ធតែគ្រាប់កង់ ទៅវិញ ទើបដឹងថាចាញ់បោកចោរហើយយកយំស្រែកទាំងតក់ស្លុតដោយមិនដឹងខ្លួន និងបានទៅប្ដឹងឲ្យនគរបាលជួយអន្តរាគមន៍រកក្រុមចោរតែម្ដង ។
សូមបញ្ជាក់ថា ល្បិចក្រុមចោរទម្លាក់យោងថ្វីដ្បិតតែចាស់គំរិលដដែលៗ ប៉ុន្តែនៅតែប្រើប្រកបដោយប្រសិទ្ធិភាពទៅលើកម្មកររោងចក្រនិងប្រជាពលរដ្ឋ ដោយក្រុមចោរល្បួងជនរងគ្រោះពីតាមទៅប្រជុំជន ផ្សារ មុខរោងចក្រជាដើម ទៅកន្លែងស្ងាត់រួចដោះយករបស់មានតម្លៃ បង្កឲ្យមានអ្នករងគ្រោះច្រើននាក់ខាតបង់ប្រាក់ជាបន្តបន្ទាប់ ។ ដោយឡែកក្រុមចោរក្រោយពេលធ្វើសកម្មភាពបានសម្រេចហើយតែងគេចខ្លួនរួចរហូត ចំណែកសមត្ថកិច្ចវិញហាកនិងកម្រស្រាវជ្រាវរកក្រុមចោរនេះឃើញ ចាប់យកមកផ្ដន្ទាទោសខ្លាំងណាស់ ទាល់តែតាមទាន់ជាក់ស្ដែង ទើបយូរៗចាប់ខ្លួនបានម្ដងប៉ុណ្ណោះ ៕
ចែករំលែកព័តមាននេះ