រាជធានីភ្នំពេញ ៖ លោកគ្រូឃឹម សុជាតិរហូតមកទល់ពេលនេះកំពុងតែទទួលបានការកោតសរសើរនិងគាំទ្រខ្លាំងមែនទែនពីសំណាក់មហាជនដែលជាអ្នកស្នេហាវិស័យកីឡាប្រដាល់គុនខ្មែរតាមរយៈកាយវិការរហ័សរហូនក្នុងការជួយសង្គ្រោះកីឡាករព្រំ សំណាង ដែលបានដួលសន្លប់ធំបន្ទាប់ត្រូវ១កែងបករបស់កីឡាករអុីរ៉ង់ក្នុងការប្រកួតលើសង្វៀនផ្សារទំនើបជីបម៉ុង២៧១មេហ្គាម៉ល កាលពីថ្ងៃទី២ ខែមីនា ឆ្នាំ២០២៥ក្នុងនាមជាអាជ្ញាកណ្ដាលប្រដាល់មួយរូប។
លោកគ្រូឃឹម សុជាតិ គឺជាអាជ្ញាកណ្ដាលជើងចាស់មួយរូបតាំងពីជំនាន់លោកទ្រឿង សុះសាយ លោកឈិត សារឹម លោកមាស សុគ និងលោកជ័យ ប៊ុនឈឿ ប៉ុន្តែកាលណោះលោកមានវ័យក្មេងជាងគេ ។ ដោយសារតែភាពរហ័សរហួន និងមានទេពកោសល្យពីធម្មជាតិ លោកត្រូវបានសហព័ន្ធកីឡាប្រដាល់គុនខ្មែរអនុញ្ញាតឱ្យចូលធ្វើជាអាជ្ញាកណ្ដាលកាត់ក្ដីនៅលើសង្វៀននៅក្នុងឆ្នាំ២០០០ ។ ទោះបីឥឡូវ
លោកមានអាយុ៥២ឆ្នាំទៅហើយក្ដី ប៉ុន្តែការកាត់ក្ដីបូករួមទាំងកាយវិការរបស់លោកនៅតែរហ័សរហួនដដែល ។
ជាក់ស្ដែង កាលពីពេលថ្មីៗនេះ លោក ឃឹម សុជាតិ បានធ្វើឱ្យអ្នកស្នេហាវិស័យកីឡាប្រដាល់នៅទូទាំងប្រទេស និងតាមបណ្ដាញសង្គម មានការចាប់អារម្មណ៍និងកោតសរសើរយ៉ាងខ្លាំង ខណៈពេលឃើញលោកស្ទុះទៅត្រកងកីឡាករ ព្រំ សំណាង ដែលហៀបនឹងដួលទៅលើក្ដារតាពី បន្ទាប់ត្រូវមួយកែងបកកីឡាករអុីរ៉ង់យ៉ាងដំណំនៅក្នុងការប្រកួតលើសង្វៀនផ្សារទំនើបជីបម៉ុង២៧១មេហ្គាម៉ល កាលពីថ្ងៃទី២ ខែមីនា ឆ្នាំ២០២៥។
លោក ឃឹម សុជាតិ បានឱ្យដឹងថា ការធ្វើជាអាជ្ញាកណ្ដាលត្រូវតែមានភាពវាងវៃ រហ័សរហួន ហើយត្រូវចេះសម្រចចិត្តឱ្យបានរហ័សបើពុំនោះទេអាចធ្វើឱ្យកីឡាករមានគ្រោះថ្នាក់ធ្ងន់ធ្ងរជាក់ជាពុំខាន ។ តួយ៉ាងដូចជាកីឡាករព្រំ សំណាងជាដើម ប្រសិនបើបណ្ដោយឲ្យកីឡាកររូបនេះដួលបោកក្បាលនឹងកម្រាល ភ្លាមៗនៅពេលនោះអាចនឹងមានគ្រោះថ្នាក់ធ្ងន់ធ្ងរដល់ទៅ ៧០ ឬ ៨០%។ ព្រោះ ព្រំ សំណាង ចូលមួយកែងនោះគឺពេញ និងសន្លប់ឈរទៅហើយ បើទោះជាបញ្ចប់ការប្រកួតហើយក្ដី ស្មារតីនៅមិនទាន់ល្អប្រសើរវិញ។ ដូច្នេះបើដួលបោកក្បាល នឹងកម្រាលទៀតនោះ អាចនឹងមានការប៉ះពាល់ខ្លាំង។ លោកសប្បាយចិត្តដែរនៅពេលនោះបានជួយសង្គ្រោះ ព្រំ សំណាង បានមិនឲ្យមានបញ្ហាធ្ងន់ធ្ងរ។
ខណៈព្រំ សំណាង ឯណោះវិញ ក៏មិនដឹងថារូបគេសន្លប់យូរប៉ុនណាដែរ ប៉ុន្តែក្រោយពីដឹងខ្លួនវិញគេបានអរគុណលោកគ្រូឃឹម សុជាតិ មិនដាច់ពីមាត់។
តាមការឱ្យដឹងបន្ថែម លោកគ្រូឃឹម សុជាតិ ត្រូវបានគេចាត់ទុកជាអាជ្ញាកណ្ដាលលេចធ្លោក្នុងឆ្នាំ២០២៥នេះ ដោយរូបលោកត្រូវសហព័ន្ធកីឡាប្រដាល់គុនខ្មែរចាត់តាំងឱ្យធ្វើអាជ្ញាកណ្ដាលតែគូ
ផ្ដាច់ព្រ័ត្រដណ្ដើមខ្សែក្រវាត់ និងគូអន្តរជាតិប៉ុណ្ណោះ ។ តាមរយៈកេរ្តិ៍ឈ្មោះដ៏ល្អនេះ លោកត្រូវ
បានគេអញ្ជើ្ញញឱ្យទៅធ្វើអាជ្ញាកណ្ដាលនៅក្រៅប្រទេសដូចជាកូរ៉េ ចិន ជប៉ុន…ទៀតផង ។ ជាក់ស្ដែងនៅថ្ងៃទី១៨ ខែមីនា ឆ្នាំ២០២៥ខាងមុខនេះ លោកនឹងហោះទៅធ្វើជាអាជ្ញាកណ្ដាលនៅប្រទេសអូស្ត្រាលី ៕
ចែករំលែកព័តមាននេះ