ប្រទេស​ចិន ៖ បុគ្គល​មាន​ឥទ្ធិពល​លើ​បណ្តាញ​សង្គម (Influencer) មួយ​រូប​របស់​ប្រទេស​ចិន កញ្ញា Liao Xingxing ត្រូវ​បាន​ហាមប្រាម​ពី​ការ​រត់​ពាក់កណ្តាល​ម៉ា​រ៉ា​តុង​ព្រឹត្តិការណ៍ Meishan Renshou របស់​ប្រទេស​ចិន​អស់​មួយ​ជីវិត បន្ទាប់​ពី​នាង​ត្រូវ​បាន​រក​ឃើញ​ថា​ប្រើ​ស្លាក​លេខ​ក្លែងក្លាយ​ចូលរួម​ការ​ប្រកួត ដែល​បាន​រៀបចំ​ឡើង​នៅ​ទីក្រុង​ស៊ី​ឈួ​ន (Sichuan) ភាគ​ខាងលិច ប្រទេស​ចិន​។

កញ្ញា Liao Xingxing បាន​បញ្ចប់​ការ​រត់​កាលពី​ថ្ងៃ​ទី​២៣ ខែកុម្ភៈ ឆ្នាំ​២០២៥ ដោយ​គ្មាន​ថិរវេលា ប៉ុន្តែ​ពីរ​ថ្ងៃ​ក្រោយមក វី​ដេ​អូ​មួយ​លើ​កម្មវិធី Douyin ដែល​ជា​កម្មវិធី TikTok ប្រើប្រាស់​សម្រាប់​នៅ​ក្នុង​ប្រទេស​ចិន បាន​បង្ហាញ​ឱ្យ​ឃើញ​នាង​ពាក់​ស្លាក​លេខ​សំគាល់​ខ្លួន​ដូច​គ្នា​ទៅ​នឹង​អ្នករ​ត់ម្នាក់​ទៀត​។ វី​ដេ​អូ​នេះ​បាន​បង្ហាញ​អ្នកចូលរួម​ពីរ​នាក់​កំពុង​រត់​ជាមួយ​ស្លាក​លេខ C4567 ដោយ Liao Xingxing ពាក់អាវ​ពណ៌​ផ្កាឈូក និង​ខោ​ពណ៌​បៃតង ពេល​នោះ​គ្រប់​គ្នា​សង្ស័យ​ថា នាង​ប្រើ​ស្លាក​លេខ​ចូលរួម​ក្លែងក្លាយ​។

ភាព​ចម្រូងចម្រាស​ទទួល​បាន​ភាព​ទាក់ទាញ ដោយសារ​ភាព​ល្បីល្បាញ​របស់​នាង​ក្នុង​នាម​ជា Influencer ពាក់ព័ន្ធ​នឹង​កីឡា ជា​ពិសេស​ការ​រត់​តែ​ម្តង ដោយ​មាន​អ្នក​តាមដាន​ប្រមាណ ១៥,០០០​នាក់​។ ទោះ​យ៉ាងណា​ក្រោយមក Liao Xingxing បាន​អះអាង​ថា នាង​បាន​ស្លាក​លេខ​នេះ​ពី​អ្នកគាំទ្រ​ម្នាក់ ហើយ​មិន​បានដឹង​ថា​ក្លែងក្លាយ​នោះ​ទេ​។

យោង​តាម​សារព័ត៌មាន VCT រាយការណ៍​ថា Liao Xingxing ជឿ​ថា​នាង​បាន​ចាញ់បោក​អ្នក​មិន​ពេញចិត្ត​ខ្លួន ដែល​បន្លំ​ធ្វើ​ជា​អ្នកគាំទ្រ​នាង​។ បើ​ទោះជា​មានការ​ពន្យល់​យ៉ាងណា​ក៏​ដោយ ក៏​អ្នក​រៀបចំ​ការ​ប្រកួត​រត់​ពាក់កណ្តាល​ម៉ា​រ៉ា​តុង Meishan Renshou បាន​ច្រានចោល ហើយ​អះអាង​ថា នាង​បាន​បោះពុម្ព​ស្លាក​លេខ​ដោយ​ខ្លួនឯង​។ ជា​លទ្ធផល អ្នក​រៀបចំ​បាន​សម្រេច​ដាក់​បម្រាម Liao Xingxing មួយ​ជីវិត​ពី​ការ​ចូលរួម​ប្រកួត​ព្រឹត្តិការណ៍​នេះ ហើយ​ថែម​ទាំង​បាន​រាយការណ៍​ករណី​នេះ ទៅ​កាន់​សហព័ន្ធ​អត្តពលកម្ម​ចិន (CAF) ដែល​អាច​ដាក់​ពិន័យលើ​នាង​បន្ថែម​ទៀត​។

បន្ទាប់​ពី​រង​ការ​រិះគន់​ដូច​ទឹកបាក់​ទំនប់ Liao Xingxing បាន​សម្រេច​ចាក់សោ ឬ Locked គណនី​ប្រព័ន្ធ​ផ្សព្វផ្សាយ​សង្គម​ទាំងអស់​របស់​ខ្លួន ហើយ​បាន​លុប​ចោល​មាតិកា​ទាំងអស់​ដែល​ទាក់ទង​នឹង​ការ​រត់​កន្លង​មក​។ នាង​ធ្លាប់​បង្ហោះ​វី​ដេ​អូ​ចំនួន​៣៦១​វី​ដេ​អូ​លើ Douyin ដែល​មាន​អ្នក​ចុច​ចូល​ចិត្ត​ជាង ២១៩,០០០​នាក់ ដោយ​មាតិកា​នាង​ភាគច្រើន​ផ្តោត​លើ​ការ​រត់ប្រណាំង​។

ការ​ប្រកួត​ព្រឹត្តិការណ៍​ពាក់កណ្តាល​ម៉ា​រ៉ា​តុង Meishan Renshou គឺជា​ការ​ប្រកួត​លើក​ដំបូង​របស់​ចិន ដែល​ត្រូវ​បាន​ទទួលស្គាល់​ដោយ​សមាគម​អន្ដរជាតិ នៃ​សហព័ន្ធ​កីឡាអត្តពលកម្ម ឬ World Athletics ហើយ​ត្រូវ​បាន​ជ្រើសរើស​ដោយ​សហព័ន្ធ​អត្តពលកម្ម​ចិន ជា​ជើងឯក​ថ្នាក់​ជាតិ​ផង​ដែរ​។ ព្រឹត្តិការណ៍​នេះ​មានការ​ប្រកួតប្រជែង​ខ្លាំង​ដោយ​មានការ​ចូលរួម​ពី​អ្នក​រត់​ជាង ១៥០,០០០​នាក់​។

ករណី Liao Xingxing ក៏​មិនមែន​ជា​លើក​ទី​១​នោះ​ទេ ដោយ​ភាព​ចម្រូងចម្រាស​ទាក់ទង​នឹង​ស្លាក​លេខ​សំគាល់​អ្នក​រត់​បាន​ក្លាយជា​បញ្ហា​នៅ​ក្នុង​ការ​ប្រកួត​ម៉ា​រ៉ា​តុង​របស់​ចិន នា​ពេល​ថ្មី​ៗ​នេះ​។ ជាក់ស្តែង នៅ​ឯការ​រត់​ម៉ា​រ៉ា​តុង​ទីក្រុង​ហុងកុង​ឆ្នាំ ២០២៥ ថ្មី​ៗ​នេះ អ្នក​រត់ ជនជាតិ​ចិន​៣​នាក់ រួម​ទាំង​អ្នក​រត់​២​នាក់ ដែល​បញ្ចប់​ការ​ប្រកួត​ពាក់កណ្តាល​ម៉ា​រ៉ា​តុង​ផ្នែក​បុរស​ផង​ដែរ​នោះ ត្រូវ​បាន​ដកសិទ្ធិ ដោយសារ​ពាក់​ស្លាក​លេខ​មិន​ត្រឹមត្រូវ​៕ ប្រភព ៖ VnExpress