រាជធានីភ្នំពេញ ៖ ឯកឧត្តមឧបនាយករដ្ឋមន្ដ្រី ស សុខា រដ្ឋមន្ដ្រីក្រសួងមហាផ្ទៃ បានអំពាវនាវបុរសទាំងឡាយថា វត្តមានស្ត្រីក្នុងការងារគ្រប់វិស័យ គ្រប់កន្លែង និងគ្រប់ពេលក៏ជាវត្តមានម្ដាយយើង…
រាជធានីភ្នំពេញ ៖ ឯកឧត្តមឧបនាយករដ្ឋមន្ដ្រី ស សុខា រដ្ឋមន្ដ្រីក្រសួងមហាផ្ទៃ បានអំពាវនាវបុរសទាំងឡាយថា វត្តមានស្ត្រីក្នុងការងារគ្រប់វិស័យ គ្រប់កន្លែង និងគ្រប់ពេលក៏ជាវត្តមានម្ដាយយើង ភរិយាយើង កូនស្រីយើង ឬប្អូនស្រី ក្មួយស្រីយើងដូច្នេះដែរ ។
ការអំពាវនាវរបស់ឯកឧត្តមឧបនាយករដ្ឋមន្ដ្រីក្រសួងមហាផ្ទៃ ស្របពេលមហាជន ពិសេសអ្នកលេងបណ្តាញសង្គមកំពុងនាំគ្នាប្រតិកម្មយ៉ាងចាស់ដៃលើ MC កីឡាករប្រដាល់ម្នាក់ដែលប្រើប្រាស់ពាក្យសម្តីមិនសមរម្យលើតារាបង្ហាញម៉ូត និងជាតារាសម្តែង ។
តាមរយៈបណ្ដាញសង្គម ហ្វេសប៊ុក នាថ្ងៃទី៤ ខែមីនា ឆ្នាំ២០២៥ លោកឧបនាយករដ្ឋមន្ដ្រី ស សុខា បានសរសេរថា«ជនរួមជាតិជាទីគោរពស្រលាញ់! ប៉ុន្មានថ្ងៃនេះ ខ្ញុំសង្កេតឃើញមានបងប្អូនជាច្រើននាក់ បានចេញមុខការពារសេចក្ដីថ្លៃថ្នូរសង្គម និងកិត្តិយសប្អូនស្រីមួយរូប ដែលត្រូវបានពិធីករប្រដាល់ម្នាក់និយាយលែបខាយពាក្យសម្ដីជាសាធារណៈលើវេទិកាប្រដាល់ ។ ទង្វើ និងប្រធានបទនេះបានធ្វើឱ្យប៉ះពាល់ផ្លូវចិត្តរបស់ប្អូនស្រីរូបនោះ និងស្ត្រីផ្សេងទៀត» ។
ឯកឧត្តមឧបនាយករដ្ឋមន្ដ្រី បន្ដថា ច្បាប់ធម្មជាតិ បានបង្កើតឱ្យសង្គមមនុស្សមានភេទស្រី និងប្រុសជាធម្មតា ទោះអ្នកខ្លះមានអត្តចរិតធម្មជាតិផ្ទុយពីភេទជាក់ស្ដែងក៏ដោយ ។ ម្នាក់ៗមានសិទ្ធិ មានសេរីភាព និងសេចក្ដីថ្លៃថ្នូរស្មើៗគ្នាក្នុងសង្គម ។ សម្រាប់កម្ពុជា យើងមានច្បាប់ និងបវេណីដូនតាដ៏ល្អ ដើម្បីការពារសេចក្ដីថ្លៃថ្នូរមនុស្សម្នាក់ៗ ។
ដូច្នេះទង្វើទាំងឡាយណា ដែលជ្រុលហួសព្រំដែននៃសិទ្ធិបំពានលើប្រពៃណី និងសីលធម៌សង្គមប្រាកដណាស់នឹងទទួលបានមកវិញនូវការប្រតិកម្មតប ។ ទាញចេញពីករណីប្អូនស្រី ទោះបីជាដោយចេតនាអ្វីពីសំណាក់ប្អូនប្រុសពិធីករប្រដាល់ ឯកឧត្តម សូមយកឱកាសនេះ អំពាវនាវបុរសទាំងឡាយថា «វត្តមានស្ត្រីក្នុងការងារគ្រប់វិស័យ គ្រប់កន្លែង និងគ្រប់ពេលក៏ជាវត្តមានម្ដាយយើង ភរិយាយើង កូនស្រីយើង ឬប្អូនស្រី ក្មួយស្រីយើង ដូច្នេះដែរ ។
មិនថា បុរស ឬស្ត្រី ការខិតខំបំពេញការងារទាំងយប់ទាំងថ្ងៃទៅតាមសមត្ថភាព និងលទ្ធភាពរៀងៗខ្លួននោះ គឺដើម្បីជីវភាពខ្លួនឯង និងក្រុមគ្រួសារនៅឯផ្ទះ ហើយសុទ្ធតែបានរួមចំណែកយ៉ាងធំធេងដល់ការអភិវឌ្ឍ និងភាពរីកចម្រើនរបស់សង្គមជាតិ» ។
ឯកឧត្តមឧបនាយករដ្ឋមន្ដ្រី បន្ថែមថា ខ្មែរយើងថ្លៃថ្នូរណាស់ ខ្មែរយើងជាពូជអម្បូរដែលគោរព និងផ្ដល់តម្លៃដល់ស្ត្រីរាប់រយពាន់ឆ្នាំមកហើយ! មេភូមិ មេស្រុក មេខេត្ត មេបា មេកើយ គឺមេដែលសំដៅដល់មាតា គឺមេសំដៅដល់ស្ត្រីដែលបង្កើតបានកូនជំនាន់ក្រោយតៗគ្នារបស់មនុស្ស ។
ដូច្នេះ ឯកឧត្តម សង្ឃឹមថា «ពួកយើងជាបុរសនឹងបន្តរក្សាភាពថ្លៃថ្នូរក្នុងគ្រប់ទំនាក់ទំនងការងារ គ្រប់ទំនាក់ទំនងសង្គមជាធម្មតាជាមួយស្ត្រី ហើយខិតខំបង្កលក្ខណៈឱ្យស្ត្រីទទួលបានអារម្មណ៍កក់ក្ដៅប្រកបដោយកិត្តិយស នៅគ្រប់កាលៈទេសៈទាំងអស់នៃការបំពេញការងារ និងគ្រប់វត្តមានក្នុងទំនាក់ទំនងសង្គមជាមួយបុរស»៕
ចែករំលែកព័តមាននេះ