ខេត្តកំពង់ស្ពឺ ៖ មេបញ្ជាការកងពលតូចដឹកជញ្ជូនលេខ៩០ កងទ័ពជើងគោក បានអប់រំ និងផ្សព្វផ្សាយសភាពការណ៍ថ្មីៗជូនដល់កងកម្លាំងក្រោមឱវាទឱ្យកាន់តែយល់ច្បាស់អំពីតួនាទី និងភារកិច្ចត្រូវអនុវត្តន៍ ។ កងទ័ពជើងគោកនៃកងយោធពលខេមរភូមិន្ទ បានបន្តថា…
ខេត្តកំពង់ស្ពឺ ៖ មេបញ្ជាការកងពលតូចដឹកជញ្ជូនលេខ៩០ កងទ័ពជើងគោក បានអប់រំ និងផ្សព្វផ្សាយសភាពការណ៍ថ្មីៗជូនដល់កងកម្លាំងក្រោមឱវាទឱ្យកាន់តែយល់ច្បាស់អំពីតួនាទី និងភារកិច្ចត្រូវអនុវត្តន៍ ។
កងទ័ពជើងគោកនៃកងយោធពលខេមរភូមិន្ទ បានបន្តថា ៖ ថ្ងៃទី១២ ខែសីហា ឆ្នាំ២០២៥ នៅទីបញ្ជាការកងពល ក្នុងពិធីគោរពទង់ជាតិប្រចាំសប្ដាហ៍ ដើម្បីគ្រប់គ្រងចំនួនទ័ព ឯឧត្តម ឧត្តមសេនីយ៍ទោ ឈរ សុខ នាយសេនាធិការរងកងទ័ពជើងគោក មេបញ្ជាការកងពលតូចដឹកជញ្ជូនលេខ៩០ បានធ្វើការអប់រំយ៉ាងច្បាស់លាស់ ជូនដល់នាយទាហាន នាយទាហានរង និងពលទាហានទូទាំងកងពលឱ្យមានភាពទទួលខុសត្រូវជានិច្ច ក្នុងអាជីពជាកងកម្លាំងប្រដាប់អាវុធ នៃកងយោធពលខេមរភូមិន្ទ ។
នៅក្នុងឱកាសនោះ ឧត្តមសេនីយ៍ទោ មេបញ្ជាការកងពល បានបញ្ជាក់ថា កងកម្លាំងនៃកងយោធពលខេមរភូមិន្ទដាច់ខាតត្រូវតែស្មោះត្រង់ចំពោះជាតិ សាសនា ព្រះមហាក្សត្រ ការពារជាតិមាតុភូមិ ត្រូវហានពលីកម្មគ្រប់បែបយ៉ាង ក្នុងបុព្វហេតុការពារអធិបតេយ្យភាពជាតិ និងបូរណភាពទឹកដី ដើម្បីរក្សាសន្តិភាពនៅកម្ពុជា ។
នាយទាហាន នាយទាហានរង និងពលទាហាន ទាំងអស់បានយកចិត្តទុកដាក់ស្ដាប់នូវប្រសាសន៍អប់រំ របស់ឯកឧត្តមមេបញ្ជាការកងពល ដើម្បីយកទៅអនុវត្តឱ្យបានល្អប្រសើរនូវតួនាទីនិងភារកិច្ច របស់កងយោធពលខេមរភូមិន្ទ ៕
ចែករំលែកព័តមាននេះ