រាជធានីភ្នំពេញ ៖ រថយន្តបែនដឹកដី ១គ្រឿង បានក្រឡាប់ផ្ងារជើង ចូលទៅក្នុងប្រឡាយ មាត់លូទឹក ក្រោយពីបានបើកបុកយ៉ាងពេញទំហឹងជាមួយរថយន្តសណ្ដោងរ៉ឺម៉ក សម្រាប់ដឹកទូកុងតឺន័រ ១គ្រឿងទៀត…
រាជធានីភ្នំពេញ ៖ រថយន្តបែនដឹកដី ១គ្រឿង បានក្រឡាប់ផ្ងារជើង ចូលទៅក្នុងប្រឡាយ មាត់លូទឹក ក្រោយពីបានបើកបុកយ៉ាងពេញទំហឹងជាមួយរថយន្តសណ្ដោងរ៉ឺម៉ក សម្រាប់ដឹកទូកុងតឺន័រ ១គ្រឿងទៀត ខណៈដែលរថយន្តដឹកទូកុងតឺន័រនេះ បើកវ៉ាជែងខាងស្ដាំរថយន្តបែនដឹកដី ផុតបន្តិច រួចបត់ឆ្វេងត្រលប់ក្រោយ ហើយរថយន្តទាំង២គ្រឿងនេះ បានរងការខូចខាតធ្ងន់ធ្ងរដូចគ្នា ប៉ុន្តែពុំបានបណ្ដាលឲ្យអ្នកបើកបររងរបួសឡើយ ។
ឧប្បត្តិហេតុនេះបានកើតឡើង កាលពីវេលាម៉ោង៩ព្រឹកថ្ងៃទី១០ ខែសីហា ឆ្នាំ២០២៥ នៅតាមមហាវិថីស៊ី ជីនពីង (ផ្លូវក្រវាត់ក្រុងទី៣) ស្ថិតនៅក្នុងភូមិថ្មី សង្កាត់ទៀន ខណ្ឌដង្កោ រាជធានីភ្នំពេញ ។
រថយន្តបែនដឹកដី ដែលក្រឡាប់នោះនោះម៉ាក NISSAN ចំណែករថយន្តរថយន្តសណ្ដោងរ៉ឺម៉ក សម្រាប់ដឹកទូកុងតឺន័រនោះ ម៉ាកហ៊ីយ៉ាន់ដាយ ពណ៍ទឹកប្រាក់លាយខៀវ ពាក់ស្លាកលេខ ភ្នំពេញ 3E-7953 ហើយអ្នកបើកបរបានរត់គេចខ្លួនបាត់ ។
បើតាមបុរសអ្នកបើកបររថយន្តបែនដឹកដី បាននិយាយថា នៅមុនពេលកើតហេតុ គាត់បានបើករថយន្តធ្វើដំណើរក្នុងទិសដៅពីជើងទៅត្បូង ហើយពេលទៅដល់ត្រង់ចំណុចកើតហេតុ ស្រាប់តែរថយន្តសណ្ដោងរ៉ឺម៉ក ដឹកទូកុងតឺន័រ បានបើកវ៉ាខាងស្ដាំរថយន្តគាត់។ លុះវ៉ាផុតបន្តិច រថយន្តនោះ បានឆ្វេងបត់ត្រលប់ក្រោយ កាត់ទទឹងចំពីមុខរថយន្តគាត់ ដែលកំពុងបើកលឿនគួរសមដែរ ទើបមិនអាចជាន់ហ្វ្រាំងទាន់ ហើយក៏ជ្រុលទៅបុកគ្នាពេញទំហឹង ហើយរថយន្តគាត់ក្រឡាប់ចូលប្រឡាយតែម្ដង ។
សមត្ថកិច្ច បានប្រាប់ថា នៅក្នុងឧប្បត្តិហេតុនេះ មិនបានបណ្តាលឲ្យអ្នកបើកបររថយន្តទាំង២គ្រឿងរងរបួសធ្ងន់ធ្ងរនោះទេ ប៉ុន្តែរថយន្តទាំង២គ្រឿង រងការខូចខាតដូចគ្នា ដោយរថយន្តបែនដឹកដីខូចធ្ងន់ជាង។ ដោយឡែកអ្នកបើកបររថយន្តសណ្ដោងរ៉ឺម៉កសម្រាប់ដឹកទូកុងតឺន័របានរត់គេចបាត់ ក្រោយពេលកើតហេតុនគរបាលខណ្ឌកំបូល បានចុះទៅធ្វើការវាស់វែង និងចាត់ចែងតាមជំនាញ ៕
ចែករំលែកព័តមាននេះ