រាជធានីភ្នំពេញ ៖ យោងតាមប្រភពពីប្រជាពលរដ្ឋបានប្រាប់ឲ្យដឹងថា ស្ត្រីម្នាក់ឈ្មោះ សេង សម្ផស្ស អាយុ៣២ឆ្នាំ អតីតកម្មការិនីរោងចក្រកាត់ដេរ មានស្រុកកំណើតនៅក្រុងសួង ខេត្តត្បូងឃ្មុំ…
រាជធានីភ្នំពេញ ៖ យោងតាមប្រភពពីប្រជាពលរដ្ឋបានប្រាប់ឲ្យដឹងថា ស្ត្រីម្នាក់ឈ្មោះ សេង សម្ផស្ស អាយុ៣២ឆ្នាំ អតីតកម្មការិនីរោងចក្រកាត់ដេរ មានស្រុកកំណើតនៅក្រុងសួង ខេត្តត្បូងឃ្មុំ សព្វថ្ងៃរស់នៅភូមិព្រៃក្រោយ ឃុំព្រៃពួច ស្រុកអង្គស្នួល ខេត្តកណ្ដាល បានជួបស្នេហ៍ជាមួយបុរសម្នាក់ឈ្មោះ ចាន់ សុភ័ក្ត្រ ហៅតាស្រម៉ូម អាយុ៤៣ឆ្នាំ មុខរបរមិនពិតប្រាកដ ក្នុងពេលទៅលេងហ្គេមអនឡាញជួបគ្នា ។
ប៉ុន្តែតាស្រម៉ូមនោះមានប្រពន្ធ និងកូនរួចទៅហើយ ដោយបានស្នាក់នៅផ្ទះជួលនៅក្នុងភូមិព្រៃទា២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ហើយអ្នកទាំង២បានបង្កើតបានកូនស្រីម្នាក់ និងកូនប្រុសម្នាក់ ។ ប៉ុន្តែតាស្រម៉ូមដែលជាប្ដីហេងស៊យអត់ទទួលខុសត្រូវលើរូបនាងទេ ហើយកូនស្រីម្នាក់ត្រូវបានបងប្អូននាងជួយយកទៅចិញ្ចឹមនៅសល់កូនប្រុស នាងទៀតនាងគ្មានលទ្ធភាព គិតតែពីដើរយកឲ្យគេជួយចិញ្ចឹម និងប្រុងយកទៅបោះចោលដុតចោល ។
ប្រជាពលរដ្ឋបាននិយាយបន្តទៀតថា ពួកគាត់នៅចាំបានថា កាលពី៤ខែមុន ក្នុងអំឡុងចុងខែវិច្ឆិកា ឆ្នាំ២០២៤ ដែលពេលនោះកូនប្រុសរបស់នាងទើបតែមានអាយុជាង១ខែប៉ុណ្ណោះ នាងបានបីកូនដើរទៅរកស្ត្រីអ្នករើសអេតចាយម្នាក់ និងអ្នកដទៃផ្សេងទៀត ដើម្បីឲ្យជួយចិញ្ចឹមកូននាងទាំងយប់ ប៉ុន្តែពេលនោះគ្មាននរណាទទួលយកទៅចិញ្ចឹមឡើយ ។
បន្ទាប់មកនាងបានទុកកូនចោលនៅ និងផ្ទះអ្នករើសអេតចាយជាច្រើនម៉ោងបង្កឲ្យមានការភ្ញាក់ផ្អើលដល់អ្នកភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ ទៅចោមរោមមើល ហើយពេលនោះទំនងជាមិនដាច់ចិត្ត ក្រោយមកនាងក៏បានត្រឡប់ទៅយកកូនវិញ ។ ខណៈនោះដែរ លោកមេភូមិត្រពាំងពោធិ៍ និងប្រជាការពារសង្កាត់បានជួយឧបត្ថម្ភលុយខ្លះ និងធ្វើការណែនាំកុំឲ្យនាងបោះបង់កូនចោលទើបនាងស្ងប់ចិត្ត ហើយនាំកូនចាកចេញទៅបាត់ទៅ ។
ប្រជាពលរដ្ឋបានប្រាប់ឲ្យដឹងបន្តទៀតថា ដោយឡែក នៅវេលាម៉ោង១១ព្រឹក ថ្ងៃទី០២ ខែមិនា ឆ្នាំ២០២៥ ស្រាប់តែនាងបង្កើតឲ្យមានការភ្ញាក់ផ្អើលជាថ្មីម្ដងទៀត ដោយលើកនេះស្ត្រីរូបនោះ និងឈ្មោះ ចាន់ សុភ័ក្ត្រ ហៅតាស្រម៉ូម ជាប្ដីបានឈ្លោះប្រកែកគ្នាបែកផ្សែង រឿងលោកប្ដីហេងស៊យ សក់ពណ៌ទង់ដែងវែងដាបស្មារូបនោះ អត់ផ្ដល់លុយឲ្យសម្រាប់ទិញទឹកដោះគោឲ្យកូនបៅ ។ ខណៈនោះនាងបានដេញវាយ និងរើសដុំថ្មគប់ ព្រមទាំងជេរប្ដីផ្អើលតាមដងផ្លូវក្នុងភូមិជម្ពូវ័ន២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ហើយក្រោយមកនាងក៏បានយកក្រដាស់ខ្ចប់កូនប្រុស អាយុជាង៥ខែយកទៅបោះចោល នៅក្នុងដីឡូត៌មួយកន្លែង ក្នុងភូមិខាងលើ ហើយក៏មានប្រភពខ្លះទៀតថា នាងប្រុងដុតសម្លា.ប់កូនចោលទាំងរស់ថែមទៀតផង ។
ប្រជាពលរដ្ឋបានបញ្ជាក់បន្ថែមទៀតថា ប៉ុន្តែពេលនោះ ត្រូវបានអ្នកភូមិឃើញហើយបានជួយសង្គ្រោះកូនប្រុសនោះទាន់ពេល រួចបានរាយការណ៍ទៅកាន់អាជ្ញាធរសង្កាត់ចោមចៅទី៣ ដើម្បីយកកូនប្រុសម្នាក់នោះទៅថែរក្សាបណ្ដោះអាសន្នរង់ចាំប្រគល់ឲ្យទៅមន្ទីរសង្គមកិច្ច និងយុវនិតិសម្បទារាជធានីភ្នំពេញទៅទទួលយកទៅចិញ្ចឹម ។
លោកប្ដីរបស់នាងម្នាក់នោះគ្មានមុខរបរពិតប្រាកដនោះទេ ប៉ុន្តែញៀ.ននឹងការលេងល្បែងហ្គេមអនឡាញ ហើយក្រោយពេលកើតហេតុនគរបាលប៉ុស្តិ៍ចោមចៅទី៣ បានចុះទៅស្វែងរកប្ដីប្រពន្ធ២នាក់នោះ ដើម្បីនាំខ្លួនមកធ្វើការសាកសួរដែរ ប៉ុន្តែភ្លាមៗនោះអ្នកទាំង២បាននាំគ្នារត់គេចខ្លួនបាត់អស់ពីកន្លែងកើតហេតុ ។
ដោយឡែក នៅវេលាម៉ោងជាង២រសៀល ថ្ងៃទី០២ ខែមិនា ដដែលនោះសមត្ថកិច្ចបានតាមហៅស្ត្រីខាងលើ និងបុរសជាប្ដីឲ្យទៅកាន់សាលាសង្កាត់ចោមចៅទី៣ ខណ្ឌពោធិ៍សែនជ័យ ដើម្បីជួបជាមួយអាជ្ញាធរសង្កាត់ នគរបាល និងមន្ត្រីនៃមន្ទីរសង្គមកិច្ច ហើយនាងលើកកូនពីក្នុងអង្រឹងដែលអាជ្ញាធរចងឲ្យដេកមកបីឱប ហើយនាងបានប្រកែកយ៉ាងដាច់អហង្កាថា នាងមិនបានយកកូនទៅដុតចោលទាំងរស់ដូចពាក្យចចាមអារ៉ាមខាងលើនោះទេ ហើយនាងក៏មិនមានចិត្តសាហាវឃោរឃៅដល់ថ្នាក់នោះដែរ ។
តាមពិតនាងគ្រាន់តែយកកូនទៅទុកចោលនៅក្នុងដីឡូត៌មួយប៉ុណ្ណោះ ហើយការដែលនាងធ្វើបែបនេះ ក៏ព្រោះតែនាងឈ្លោះប្រកែកជាមួយប្ដី ព្រោះប្ដីនាងអត់ជួយផ្ដល់ប្រាក់ឲ្យនាង ដើម្បីទិញទឹកដោះគោឲ្យកូនបៅសោះ ទុកឲ្យនាងចិញ្ចឹមកូតែម្នាក់ឯងទាំងលំបាកលំបិន ហើយពេលនេះកូនប្រុសនាងមានអាយុជាង៥ខែហើយ ប្ដីអត់ជួយចិញ្ចឹមសោះ ។
ស្ត្រីនេះបាននិយាយពីរឿងស្នេហារបស់នាងថា នាងបានមានទំនាក់ទំនងស្នេហាលួចលាក់ជាមួយបុរសឈ្មោះចាន់ សុភ័ក្ត្រ ហៅតាស្រម៉ូមនោះ រយៈពេល៣ឆ្នាំមកហើយ នៅពេលជួបលេងហ្គេមអនឡាញជាមួយគ្នា ចំណែកតាស្រម៉ូមក៏មានប្រពន្ធ និងកូន រយៈពេលជាង១០ឆ្នាំមកហើយដែរ ។ ស្នេហាលួចលាក់របស់ពួកនាងនេះបង្កើតបានកូនស្រីម្នាក់ និងកូនប្រុសម្នាក់ ប៉ុន្តែកូនស្រីត្រូវបានបងប្អូននាងនៅឯខេត្តព្រះសីហនុជួយយកទៅចិញ្ចឹមហើយ នៅសល់កូនប្រុសម្នាក់នេះនាងគ្មានលទ្ធភាពចិញ្ចឹមទេ ព្រោះប្ដីលួចលាក់អត់ខ្វាយខ្វល់ជួយសោះ ។
នាងម្នាក់នោះបាននិយាយទៀតថា ស្នេហាលួចលាក់នោះ ក្រោយមកត្រូវបានបែកធ្លាយដល់ប្រពន្ធដើមរបស់ប្ដី ហើយប្រពន្ធដើមរូបនោះតែងតែទៅរករឿងជេរបញ្ចោរនាងជាបន្តបន្ទាប់ទៀតផង ប៉ុន្តែនាងមិនបានបែកគ្នាជាមួយប្ដីនោះទេ នាង និងប្ដីនៅតែបន្តទាក់ទងគ្នា ហើយនាងតែងតែបានជិះម៉ូតូកង់បីស្កាត់ជួបជាមួយប្ដីនៅម្ដុំជម្ពូវ័នជាបន្តបន្ទាប់ ។
ដោយឡែក កាលពី៤ខែមុន ដោយសារតែគ្មានលទ្ធភាពចិញ្ចឹមកូន នាងពិតជាបានបីកូនរកអ្នកជួយចិញ្ចឹមមែន ប៉ុន្តែពេលនោះគ្មានអ្នកយកទើបនាងចិញ្ចឹមកូនម្នាក់ឯងរហូតមក ។
ចំណែកតាស្រម៉ូមជាប្ដីបាននិយាយផងដែរថា មិនមែនមិនជួយសោះទេ គាត់ក៏បានជួយខ្លះដែររឿងចិញ្ចឹមកូននេះ ហើយនៅវេលាព្រឹកថ្ងៃកើតហេតុ អ្វីដែលឈានដល់ការឈ្លោះប្រកែកគ្នានេះ គឺដោយសារតែប្រពន្ធចុងរូបនេះជេរគាត់ ហើយមិនត្រឹមតែជេរគាត់ប៉ុណ្ណោះទេ ថែមទាំងជេរទាំងប្រពន្ធដើមគាត់ទៀតផង ។ មិនតែប៉ុណ្ណោះ នាងប្រពន្ធចុងរូបនេះបានខលប្រាប់គាត់ថា អ្ហែងទៅមើលកូនផងអញទម្លាក់កូនចោលហើយ ទើបពេលនោះគាត់ខឹងហើយក៏មានការឈ្លោះប្រកែកគ្នាឡើងបែបនេះតែម្ដងទៅ ។
ក្រោយពីការជជែកគ្នានៅសាលាសង្កាត់ចោមចៅទី៣នោះ អ្នកទាំង២នាក់ប្ដីប្រពន្ធបានគិតច្បាស់ និងសម្រេចចិត្តច្បាស់ហើយ គឺពួកគាត់ប្រគល់កូនប្រុសរូបនេះទៅឲ្យខាងមន្ទីរសង្គមកិច្ច និងយុវនិតិសម្បទា រាជធានីភ្នំពេញយកទៅចិញ្ចឹមតែម្ដង ប៉ុន្តែពុំបានបញ្ជាក់ថា ពួកគាត់នៅតែទំនាក់ទំនងគ្នា ដើម្បីបង្កើតកូនមកបន្តទៀត ឬអត់នោះឡើយ ៕
ចែករំលែកព័តមាននេះ