រាជធានីភ្នំពេញ៖ សពស្ត្រី២នាក់ត្រូវបានគេប្រទះឃើញអណ្ដែតទឹកជាបន្តបន្ទាប់ នៅស្រះជីកមួយកន្លែងស្ថិតក្នុងភូមិសំរោងទាវ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ បន្ទាប់ពីបាត់ខ្លួនអស់រយៈពេល២ថ្ងៃ។ ហេតុការណ៍នេះ បង្កឲ្យមានការភ្ញាក់ផ្អើលកាលពីវេលាម៉ោង៧ព្រឹកថ្ងៃទី០១ ខែមីនា…
រាជធានីភ្នំពេញ៖ សពស្ត្រី២នាក់ត្រូវបានគេប្រទះឃើញអណ្ដែតទឹកជាបន្តបន្ទាប់ នៅស្រះជីកមួយកន្លែងស្ថិតក្នុងភូមិសំរោងទាវ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ បន្ទាប់ពីបាត់ខ្លួនអស់រយៈពេល២ថ្ងៃ។
ហេតុការណ៍នេះ បង្កឲ្យមានការភ្ញាក់ផ្អើលកាលពីវេលាម៉ោង៧ព្រឹកថ្ងៃទី០១ ខែមីនា ឆ្នាំ២០២៥ ហើយប្រជាពលរដ្ឋ ក៏បានរាយការណ៍ទៅសមត្ថកិច្ចនគរបាលជំនាញ ដើម្បីចុះត្រួតពិនិត្យ។សពស្ត្រីរងគ្រោះដែលបានស្លាប់ ១-ឈ្មោះសោម មរកត អាយុ១៩ឆ្នាំ ជាស្ត្រីមានជំងឺសរសៃប្រសាទ
(រលាកស្រោមខួរ), ២-ឈ្មោះអ៊ុក ចិន្ដា អាយុ៤៥ឆ្នាំ មានសតិមិនប្រក្រតីដែរ ។ អ្នកទាំងពីរមានលំនៅក្នុងភូមិសំរោង សង្កាត់ឃ្មួញ ខណ្ឌសែនសុខ រាជធានីភ្នំពេញ។
តាមព័ត៌មានឲ្យដឹងថា នៅវេលាម៉ោង៧ព្រឹកថ្ងៃទី១ ខែមីនា នេះ សពស្ត្រីម្នាក់ត្រូវបានប្រជាពលរដ្ឋដែលធ្វើដំណើរឆ្លងកាត់ប្រទះឃើញអណ្ដែតទឹកស្រះជីកនៅកន្លែងកើតហេតុ។ ភ្លាមៗក៏បង្កឲ្យមានការភ្ញាក់ផ្អើលដល់ប្រជាពលរដ្ឋ ហើយរាយការណ៍ទៅសមត្ថកិច្ចដើម្បីចុះត្រួតពិនិត្យ។
នៅព្រឹកនោះ ក៏បានដឹងដល់ក្រុមគ្រួសារចុះទៅដល់កន្លែងកើតហេតុដោយប្រាប់ឲ្យដឹងថា ស្ត្រីរូបនោះមានជំងឺប្រចាំកាយ និងបានបាត់ខ្លួនតាំងពីថ្ងៃទី២៧ ខែកុម្ភៈ ឆ្នាំ២០២៥។ នៅកន្លែងកើតហេតុគេរកឃើញមានស្បែកជើងចំនួន២គូ និងខោអាវដែលគេសង្ស័យថា ស្ត្រីរួបនោះបានចុះលេងទឹកហើយលង់ទឹកស្លាប់។
បន្ទាប់ពីមានការភ្ញាក់ផ្អើលប្រទះឃើញសពស្ត្រីទី១ បានប្រមាណជា៥ម៉ោង នៅវេលាម៉ោង១២ ថ្ងៃត្រង់ថ្ងៃទី១ ខែមីនា ឆ្នាំ ២០២៥ ក៏មានការភ្ញាក់ផ្អើលជាថ្មីម្ដងទៀត បន្ទាប់ពីគេប្រទះឃើញសពស្ត្រីទី២ បានផុសអណ្ដែតឡើងនៅក្នុងស្រះទឹកនោះដែរ ។
តាមព័ត៌មានពីក្រុមគ្រួសារសពបានឲ្យដឹងថា សពស្ត្រីទី២ក៏ជាមនុស្សមានសតិមិនប្រក្រតីដូចគ្នាហើយតែងតែផឹកស្រាជាប្រចាំនិងដើរលេងជាមួយគ្នាជារៀងរាល់ថ្ងៃហើយបានបាត់ខ្លួនដំណាលគ្នាកាលពីថ្ងៃទី២៧ ខែកុម្ភៈ ឆ្នាំ២០២៥ ។
តាមព័ត៌មានឲ្យដឹងថា ស្រះទឹកនោះ ជាស្រះជីកយកដីលក់ដែលមានទំហំប្រមាណជិតជាង១០ហិចតានិងមានជម្រៅប្រមាណ៣០ទៅ៤០ម៉ែត្រ។ បន្ទាប់ពីមានការភ្ញាក់ផ្អើលនគរបាលជំនាញក៏បានសហការជាមួយនគរបាលមូលដ្ឋាន ហើយបានអូសសពឡើងលើកគោកដើម្បីត្រួតពិនិត្យ។
តាមការត្រួតពិនិត្យនគរបាលជំនាញ និងក្រុមគ្រូពេទ្យអមសាលាដំបូងរាជធានីភ្នំពេញ ក៏បានធ្វើការសន្និដ្ឋានថា សពស្ត្រីរងគ្រោះទាំងពីរស្លាប់ដោយសារលង់ទឹក ។ សពត្រូវបានសមត្ថកិច្ចប្រគល់ទៅឲ្យក្រុមគ្រួសារនាំយកទៅធ្វើបុណ្យតាមប្រពៃណី៕
ចែករំលែកព័តមាននេះ