អន្តរជាតិ ៖ តម្លៃមាសជួបប្រទះការធ្លាក់ចុះនៅថ្ងៃទី២៨ ខែកុម្ភៈ ឆ្នាំ២០២៥ ហើយត្រូវបានកំណត់ដើម្បីប្រកាសអំពីការធ្លាក់ចុះប្រចាំសប្តាហ៍ដ៏ច្រើនបំផុត ចាប់តាំងពីខែវិច្ឆិកា ឆ្នាំ ២០២៤ ក្រោយពេលប្រធានាធិបតីសហរដ្ឋអាមេរិក…
អន្តរជាតិ ៖ តម្លៃមាសជួបប្រទះការធ្លាក់ចុះនៅថ្ងៃទី២៨ ខែកុម្ភៈ ឆ្នាំ២០២៥ ហើយត្រូវបានកំណត់ដើម្បីប្រកាសអំពីការធ្លាក់ចុះប្រចាំសប្តាហ៍ដ៏ច្រើនបំផុត ចាប់តាំងពីខែវិច្ឆិកា ឆ្នាំ ២០២៤ ក្រោយពេលប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានប្រកាសពន្ធនាំចូលថ្មី បូករួមនឹងកត្តាប្រាក់ដុល្លារអាមេរិកឡើងថ្លៃ ស្របពេលអ្នកវិនិយោគកំពុងរង់ចាំទិន្នន័យអតិផរណាសំខាន់ៗនៅអាមេរិក។ នេះបើយោងតាមប្រភពពីទីភ្នាក់ងារ Reuters ចេញផ្សាយនៅរសៀលថ្ងៃទី២៨ ខែកុម្ភៈ។
តម្លៃមាសបានធ្លាក់ចុះ ០.៥% ក្នុងតម្លៃ ២,៨៦២.០៥ដុល្លារក្នុងមួយអោន ឬ ៣,៤៥០ដុល្លារក្នុងមួយតម្លឹង បន្ទាប់ពីបានកត់ត្រាការកើនឡើង៨សប្តាហ៍ជាប់គ្នា។ ចំណែកអនាគតមាសរបស់អាមេរិកបានធ្លាក់ចុះ ០.៨% ក្នុងតម្លៃ ២,៨៧៣.៨០ដុល្លារក្នុងមួយអោន។ នេះជាការធ្លាក់ចុះលើកទី៣ ក្នុងរយៈពេលប៉ុន្មានសប្តាហ៍ថ្មីៗនេះ ដែលមាសបានបាត់បង់តម្លៃ៤០ដុល្លារ ឬច្រើនជាងនេះ បន្ទាប់ពីការធ្លាក់ចុះរហូតដល់ ៦៣ដុល្លារ ដែលបានកត់ត្រាកាលពីថ្ងៃទី១៤ ខែកុម្ភៈ កន្លងទៅ។
អត្រាប្ដូរប្រាក់នៅថ្ងៃទី២៨ ខែកុម្ភៈ ឆ្នាំ២០២៥ ប្រាក់រៀល ៤,០២៥រៀលស្មើនឹង១ដុល្លារអាមេរិក។ សន្ទស្សន៍ប្រាក់ដុល្លារត្រូវបានកំណត់សម្រាប់ការកើនឡើងប្រចាំសប្តាហ៍ ០.៧% ដោយការពង្រឹងតម្លៃប្រាក់ដុល្លារអាមេរិកបានរួមចំណែកយ៉ាងសំខាន់ដល់ការធ្លាក់ចុះតម្លៃមាស ខណៈដែលអ្នកវិភាគក៏បានកត់សម្គាល់ថា ប្រហែលពាក់កណ្តាលនៃការធ្លាក់ចុះតម្លៃមាស អាចត្រូវបានកំណត់ដោយភាពរឹងមាំនៃប្រាក់ដុល្លារ។
លោក ត្រាំ បានប្រកាសកាលពីថ្ងៃព្រហស្បតិ៍ថា ពន្ធ២៥% លើការនាំចូលទំនិញពីម៉ិកស៊ិក និងកាណាដា ដែលត្រូវបានផ្អាករយៈពេល១ខែ នឹងត្រូវចូលជាធរមាននៅថ្ងៃទី៤ ខែមីនា ខាងមុខនេះ រួមជាមួយការដាក់ពន្ធ ១០% បន្ថែមទៀតលើការនាំចូលរបស់ចិន ដែលជាការបន្ថែមលើការដំឡើងពន្ធ ១០% កាលពីដើមខែកុម្ភៈ។ ការផ្លាស់ប្តូរនេះកើតឡើង ពាក់ព័ន្ធជុំវិញបញ្ហាជនអន្តោប្រវេសន៍ខុសច្បាប់ និងការជួញដូរសារធាតុ Fentanyl ដែលប្រើប្រាស់ជាធាតុផ្សំផលិតគ្រឿងញៀនចូលមកកាន់ទឹកដីសហរដ្ឋអាមេរិក។
វិនិយោគិនក៏កំពុងរង់ចាំទិន្នន័យសន្ទស្សន៍តម្លៃនៃការចំណាយលើការប្រើប្រាស់ផ្ទាល់ខ្លួន (PCE) ដែលជារង្វាស់អតិផរណារបស់ធនាគារកណ្តាលអាមេរិក (Fed) ដែលនឹងចេញផ្សាយនៅវេលាម៉ោង១:៣០នាទីរសៀល ម៉ោងក្នុងស្រុក ថ្ងៃទី២៨ ខែកុម្ភៈ ដើម្បីថ្លឹងថ្លែងការចំណាយរបស់អ្នកប្រើប្រាស់គ្របដណ្តប់លើសកម្មភាពសេដ្ឋកិច្ចរបស់អាមេរិក៕
ចែករំលែកព័តមាននេះ